سه‌ردار هێتوتى
ژ به‌ر كو پتریا راگه‌هاندنا كوردى دكه‌ڤیته د كڤانێ (رۆژنامه‌ڤانیا زه‌ر دا) چونكى هه‌ر كه‌ناله‌كێ میدیایى سه‌ر ب گرۆپ و تاقم و پارته‌كا سیاسیه و بزاڤا دكه‌ته كو رویێ پارتا به‌رامبه‌ر كرێت و نه‌شرین بكه‌ت بێى كو ئه‌ڤ كه‌نال و كاربده‌ستێن وێ بزانن یێ جڤاكێ كوردى به‌ره‌ڤ هه‌لوه‌ریانێ و دژبه‌ریێ و ئێك دوو قه‌بیل نه‌كرنێ دبه‌ن.
د ڤێ نڤیسینێ دا دخازم رویێ جانێ میدیا و راگه‌هاندنێ بۆ رایا گشتى بده‌مه زه‌لال كرن، كو كارێ راگه‌هاندنێ كرێتكرن و خرابكرنا رایا گشتى ب تنێ نینه، به‌لكو به‌روڤاژى راگه‌هاندن زه‌لالكرنا هه‌مى بویه‌رانه بۆ به‌رچاڤێ جه‌ماوه‌رى.
ئه‌ركێ راگه‌هاندن و سازیێن رۆژنامه‌ڤانیێ گه‌هاندنا په‌یام و نووچه و هه‌مى هزر بوچونێن لێك جدانه بو جه‌ماوه‌رى دا كو جه‌ماوه‌ر ژى لگوره‌ى هزرا خۆ بریارێ ل سه‌ر بده‌ت و شروڤا ره‌وشا نه‌ته‌وه‌ى و ژینگه‌هى و نیڤ ده‌وله‌تى بو به‌رچاڤ ببیت.
هه‌روه‌سا دڤێت ب رێكا سازیێن راگه‌هاندنێ جه‌ماوه‌رێ ب ئاگه‌هـ بیت ل سه‌ر هه‌مى پێشهات و بویه‌رێن جیهانى و نافخۆیى و د هه‌مان ده‌م دا ئه‌ركێ ڤان سازیان پێگه‌هاندنا مروڤیه لسه‌ر ئه‌ركێن جڤاكى، چونكى د جیهانا نوكه دا مروڤ ناهێته پشت گوهڤه هاڤێتن و كه‌س نه‌شێت رێبه‌ندێ ل سه‌ر رێكا هزر و بیرێن وى دانیت. راگه‌هاندن دشێت د ناڤا جڤاكان دا ئارمانجێن نوى درست بكه‌ت بۆ به‌ره‌ڤ پێشڤه‌برنێ و داهینانێ.
خاله‌كا دیتر ژ ئه‌ركێن راگه‌هاندنێ ئه‌وه دیالوكێ په‌یدا دكه‌ت چونكى مروڤێ سه‌رده‌م یێ گرێدایى دیالۆگێ یه داكو بیروبوچوونێن ژێك جدا دگه‌ل هه‌ڤ ئالوگور بكه‌ن ژ بۆ به‌ره‌ڤ پێشبرنا ره‌وشا ژیانێ.
راگه‌هاندنا سه‌رده‌م كلتوران ژ ئێك نێزیك دكه‌ت، توخیبان ناسناكه‌ت، شه‌رمێ ژ هه‌بوونا ره‌وشت و تیتالێن ژئێك جدا ناكه‌ت، ره‌نگێ مروڤى، به‌ژنا وى، وه‌لات و كێشوه‌رێ وى نابیته ئه‌گه‌رێ رێگریێ ل هه‌مبه‌رى دانه‌ناسینا چاند و كلتورا وى و د هه‌مان ده‌م دا خوشیێ ژى بۆ جڤاكى په‌یدا دكه‌ت.
له‌ورا دڤێت راگه‌هاندنا مه یا كوردى ب گشتى خۆ ژ وى زمانێ زڤرێ بكاردئینن بده‌نه پاش، دیارێن جڤاكى نه‌هه‌رفینن، ژ هه‌بوونا خۆ ببن خۆدان و شانازیێ بۆ گه‌لێ خۆ چێكه‌ن كو خۆدان هه‌بوونا خۆنه.
