شەعبان مزوری

ماموستا گازندێ ژ خوە بکە


شه‌عبان مزیری
ئه‌ڤه‌ نێزیك پێنج ساله‌ پشتی گیروكرن و پاشان پاشكه‌فتنا موچه‌ی ژ لایێ هوكمه‌تا هه‌رمی ڤه، نه‌رازیبونا هه‌ما بێژه‌ هه‌می ته‌خێن جڤاكێ گرتن. ده‌ما موچه‌ نه‌بیت هێزا كریارێ لده‌ف موچه‌خورا‌ دادبه‌زیت و ئه‌ڤ چه‌نده‌ نه‌راسته‌وخوه‌ بازارێ هه‌میێ كز دكه‌ت، ئه‌ڤ یه‌كه‌ زۆركارتێكه‌ره‌ لسه‌ر كه‌سێن لبازارا ئازاد كاردكه‌ن و تایبه‌تی كاركه‌رێن گرێدای داهاتێ رۆژانه‌ و پێكهاته‌ك سه‌ره‌كیه‌ دناڤا جڤاكێ دا و بتایبه‌تی لسێكته‌رێ ئاڤه‌دانی دا. بكورتی نیف ئیفلاجه‌ك خسته‌ ئابوریا جڤاكێ.
دژ نه‌دان و پاشكه‌فتا موچه‌ی ماموستایێن په‌روه‌ردێ و به‌شه‌ك ژ ئه‌وا ژێرا دبێژن خوه‌ندنا بالا نه‌رازیبونا خوه‌ نیشاندان، ژمارا هه‌را به‌رچاڤ ژڤان ماموستایێن قوناغا سه‌ره‌تایێ بون،. دڤان سالێن ده‌رباسبویدا بچه‌ندان كومبون،خرڤه‌بون و خوه‌پیشاندان هاتن ئه‌نجامدان كو ئه‌م دكارین بێژین پشكا شێری ل زۆنا كه‌سك بون و پشكا روڤی لزۆنا زه‌ر بون. به‌شه‌ك ژ وان چالاكیان بێ ئالۆزی ده‌رباس نه‌بون، هه‌ر ژ گه‌فلێكرن و كرێتكرنا به‌شداربویا هه‌یا ته‌قه‌كرن و زیندان كرنا به‌شه‌ك ژ وان كه‌سێن به‌شداربوین.
داخوازێن ره‌وا دڤێت هه‌مو مروڤه‌ك ئازاد پشگیریێ لێ بكه‌ت و به‌ره‌ڤانیێ ژ كه‌سێ زیان پێكه‌تی بكه‌ت، لێ زۆر جاران پێویسته‌ ئه‌م پرسێ ژخوه‌ بكه‌ین، گه‌لو كه‌نگی پشتگرتنا كه‌سه‌كی یانژی كومه‌كێ دێ بچاكی لسه‌ر ته‌ڤایا جڤاكێ ڤه‌گه‌ریت؟ بو نمونه‌ ئه‌گه‌ر ئه‌م پشتگیریا ماموستا بكین ئه‌ڤرو لسه‌ر مافێ وان، سوبه‌ چه‌ند هیڤی مه‌ هه‌یه‌ كو هه‌مان ماموستا پشتگیریا كه‌سانه‌ك دن یان كومه‌ك دن بكه‌ت كو هاتیه‌ مافبنپێكرن؟
من دڤێت ره‌شكاوانه‌ په‌یاما خوه‌ بگه‌هینم ماموستایێن به‌رێز لسه‌ر رولێ وان یێ په‌روه‌ردێ و پاشان لسه‌ر موچێ وان. من دڤێت به‌رسڤێ بو چه‌ند پرسێن نه‌ زه‌لال لسه‌ر ماموستا ببینم. ٢٩ ساله‌ ئه‌ڤ ده‌ستهه‌لاتداریه‌ هه‌یه‌ و ٢٩ ساله‌ كه‌رتێ په‌روه‌ردێ پاشڤه‌دچیت؟ خوه‌نده‌ڤانێ مه‌ نه‌خوه‌نده‌ڤا دبیت سال بو سالێ؟ ده‌رسێن تایبه‌ت زۆر دبن سال بو سالێ؟
ئه‌ڤ پرسه‌ و چه‌ندین پرس و ره‌فتارێن كارمه‌ندێن كه‌رتێ په‌روه‌ردێ وا نیشاندده‌ن كو ماموستا بمن بهه‌مان مێژیێ ده‌ستهه‌لاتێ سه‌ره‌ده‌ریێ لسه‌ر كێش و بێشێن خوه‌ دكه‌ت. بمن ئه‌گه‌ر ئه‌ڤ ده‌ستهه‌لاتدارێن كالفام به‌ریا ٢٩ سالان ئه‌ڤ له‌شكه‌رێ ماموستا لپشتا وان نه‌با وێ نه‌كاریبون پێنج سالا ل ده‌ستهه‌لاتێ مابانه‌، به‌رێز ماموستا هه‌لویستێ ته‌ چبو
١ ده‌ما قوتابی ب پێشه‌نگیا ته‌ ماموستا رێزدكرن بو پێشوازی و چه‌پله‌قوتانێ بو جه‌نابێ……..
٢ به‌رێز ماموستا چه‌ند جاران تو لدژی وێ یه‌كێ‌ رادوه‌ستیای ده‌ما لژێر هه‌ر بوهانه‌كێ ده‌رگه‌هێ قوتابخانا دگرتن و دكره‌ پشودان؟
٣ به‌رێز ماموستا چه‌ند جاران هوین لدژی كورتكرنا سالا خوه‌ندنێ راوه‌ستیاینه‌؟
٤ به‌رێز ماموستا وه‌ جاره‌كێ ژی كومبونه‌ك خرڤه‌بونه‌ك كربو یان كریه‌ كانێ بوچی دو سالێن خوه‌ندنێ هه‌ڤده‌م نه‌ ده‌ست پێكرینه‌ نه‌ بداوی هاتینه‌؟
٥ به‌رێز ماموستا وه‌ پرس ژ خوه‌ كریه‌ كانێ بوچی به‌شه‌ك به‌رچاڤ ژ ماموستا‌ ل هه‌فتیێ چوار تا شه‌ش ده‌رسا پێشكێش دكه‌ت؟
٦ به‌رێز ماموستا ته‌ چه‌ند جارا ده‌نگێ خوه‌ بلندكریه‌ كو ل هنده‌ك قوتابخانا جهێ هه‌می ماموستا نینه‌ دانیشن و لبه‌شه‌ك دن ژ قوتابخانا زۆر پول بێ ماموستانه‌؟
٧ به‌رێز ماموستا ته‌ چه‌ند قوتابی كرێت كرینه‌ بگوتن و ره‌فتارێن خوه‌؟
٨ به‌رێز ماموستا ته‌ چه‌ند قوتابیێ خوه‌ فێری بوهایێن ئازادیێ كرینه‌؟ بمن چه‌وا مزگه‌فت جهێ په‌روه‌ردا ئیسلامێ رادیكاله‌ وه‌سا قوتابخانه‌ژی وه‌ كریه‌ جهێ په‌روه‌ردا كویلا.
٩ به‌رێز ماموستا چه‌ند ژوه‌ خوه‌ ماندیكریه و هه‌ولدایه‌ سه‌ربورێن خوه‌یێن په‌روه‌ردێ بكه‌ن كتێب ژبو نفشێن بێن، ئانكو بو وه‌ خه‌م بویه‌ سه‌رئه‌نجامێ سالانه‌ چه‌وابن؟‌
١٠ به‌رێز ماموستا چه‌ند ژوه‌ لدژی ده‌رسێن تایبه‌ت بون بو قوتابیا؟
١١ دڤان ٢٨ سالێن ده‌رباسبویدا بسه‌دان ئه‌گه‌ر نه‌ بهه‌زارا ماجستێر و دوكرتورا‌ لزانكویێن باشور هاتینه‌ ئه‌نجام، لێ خوه‌دانێ دوكتورا و ماجستێرا پرس ژ خوه‌ كرینه‌ كانێ ڤانا چسوده‌ك گه‌هاندیه‌ خه‌لكی؟ نه‌خاسمه‌ بملیونا دۆلا هاتینه‌ خه‌رجكرن.
ئه‌ڤ پرسه‌ و گه‌له‌ك پرسێن دی هه‌نه‌ كو ئه‌‌م دكارین گه‌نگه‌شێ لسه‌ر بكین لێ ماموستا به‌رپرسه‌ك هه‌رێ مه‌زنه‌ ژڤێ وێرانیا ئه‌م تێدا دژین، ئه‌ڤه‌ به‌رهه‌مێ وێ په‌روه‌ردێیه‌‌، بێ په‌روه‌رده‌ به‌ربوین كولانا، ئه‌ڤه‌ به‌رهه‌مێ فێركرنا ته‌یه‌ نه‌ خوه‌نده‌ڤان كرنه‌ رێبه‌ر، ئه‌ڤه‌ به‌رهه‌مێ وێره‌كیا ته‌یه وه‌لات كره‌ زیندان، ئه‌ڤه ‌به‌رهه‌مێ خوه‌راگریا ته‌یه‌ خه‌ما خه‌لكێ بویه‌ ئالف.
بكورتی و بكوردی به‌نی ئازادیێ به‌لاڤنا‌كن، نه‌خوه‌نداڤا خه‌لكی فێری خوه‌ندنێ ناكن، ملكچه‌ك قه‌هره‌مانا دوروست ناكن……………. و ته‌ڤنێ درێژه‌ ‌

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close