ده‌ست خۆش به‌غدا
سه‌ردار هێتوتى
ژ به‌ر برسێ، نه‌داریێ، زێده بارگرانیێ، نه‌بوونا ده‌لیڤێن كارى، نه‌مانا بهایێ كارێ ده‌ستى و چاندن و جوتیاریێ و هه‌ر جوره رێنجبه‌ریه‌كێ، كه‌رب ژ دلێن حكومه‌تا هه‌رێمێ ب تنێ ئه‌ڤ په‌یام هه‌یه بۆ به‌غدا ژ به‌ر نه‌دانا مه‌هیانه‌یا حكومه‌تێ دا كو بشێت موچه‌یێن فه‌رمانبه‌رێن خۆ پێ ئه‌دا بكه‌ت.
ب راستى هه‌ڤۆكا ده‌ست خۆش به‌غدا، زێده یا ره‌ش و كرێت و شه‌رمینه، هه‌ڤوكه‌كا قرێژگرتیه ب نفش په‌رێسیا عه‌ره‌بى ڤه ، زولمێ و زورى و ئه‌نفالان ب بیرا مه دئینیت، چه‌لێ و ئیران و تركان دووباره ل نیك مه زندى دكه‌ت لێ زكێ برسى چ هایا وى ژ ئه‌ڤا بورى نینه كانێ به‌غدا و كاربده‌ستێن وێ چ ب سه‌رێ گه‌لێ مه ل باشوورێ كوردستانێ ئینایه و ب ده‌هان سالان چه‌ند شوره‌شێن مه هاتینه ته‌په‌سه‌ركرن و چه‌ند عه‌گیدا جانێ خۆ قوربانى ڤێ ئاخێ كریه.
حكومه‌تا هه‌رێما كوردستانێ تاكه حكومه‌تا هه‌رێمیه كو چ پلان بۆ قه‌یرانان نینه و نابن ژى، چونكى ب تنێ هزرا وێ ل سه‌ر فروتنا نه‌فتێ یه داكو بشێت خه‌لك و ده‌وله‌تێ پێ رێڤه ببه‌ت و وێ هه‌مى سكته‌رێن دیتر یێن ژیانێ پشت گوهڤه هاڤێتنه یان ژى ژ لایێ هنده‌ك كه‌سێن بالا ده‌ستڤه هاتینه قورغكرن كو د شیانا حكومه‌تێ نینه لێپێچینێ ب وان كه‌سان بكه‌ت.
به‌غدا هه‌مان به‌غدایا پێشى سیهـ سالان و ژوردایه، هه‌مان هزر و عه‌قل یێ وێ برێڤه دبه‌ن ب تنێ سه‌روچاڤ هاتینه گوهاتن، وێ به‌س پلانا حه‌لكرنا گه‌لێ كورد هه‌یه، لێ كاربده‌ستێن مه ژى نوكه مژیلى تژیكرنا خزینكێن خونه و هایا وان ژى ژ خه‌لكێ وان نینه به‌س ئه‌گه‌ر د ناڤبه‌را هه‌ر دوو كاربده‌ستان دا نه‌چار بین ئێكى هه‌ڵبژێرین چ پێنه‌ڤێت كورد هه‌ر باشترینه له‌ورا وه‌رن دا پێكڤه هه‌ر كه‌س ب رێیا خۆ كار بكه‌ین ژ بۆ سه‌ره‌راستكرنا شاشیێن حكومه‌تا خۆ بلا قه‌ت باوه‌را مه ب لژنه‌یا و وزاره‌تا ب ناڤ پلاندانێ نه‌مینیت و ده‌ست ده‌ینه كارى و رێكا ژیانێ بگرینه به‌ر.
