لیژنا بلندا روی ب رویبوونا ڤایرۆسێ كۆرۆنا راگەهاند: ژ بەر بەردەوامییا ڤایرۆسێ كۆرۆنا، لیژنا بلندا ڤایرۆسێ كۆرۆنا و هەرسێ وەزارەتێ ناڤخۆ و ساخلەمیێ و ئەوقاف و كاروبارێن ئایینی و پارێزگەهێن هەرێمێ ب باش دیتن هەتا رۆژا 10 ی ڤێ هەیڤێ دەرگەهێن مزگەفتان نەهێنە ڤەكرن.
وێ لیژنێ د راگەهاندنەكێ دا دیار كر: هندەك حالەتێن نوی یێن كۆرۆنا ل هەرێما كوردستانێ هاتینە تۆمار كرن، ژ بەر هندێ، مە نەڤێت بەرپرسیارییەكا زێدەتر و زۆرتر بۆ بەلاڤبوونا وێ ئێشێ بكەڤیتە ستۆیێ مامۆستایێن ئاینی و مزگەفتان.
د وێ راگەهاندنێ دا هاتییە: بۆ ڤێ چەندێ رەئیا زانایێن ئایینی و جڤاتا بلندا فەتوایێ هاتییە وەرگرتن و بڕیارا نەڤەكرنا دەرگەهێن مزگەفتان هەمی هەرێما كوردستانێ ڤەدگریت.
وێ لیژنێ دیار كر ژی كو ئەڤە بابەتەكێ ساخلەمیێ یە و نابیت كەس بێژیت هاتییە سیاسیكرن، بەلكی بەرۆڤاژی هندێ، خۆجوداكرن و دەركەڤتن ژ بڕیارێن لیژنا بلندا روی ب رویبوونا ڤایرۆسێ كۆرۆنا، دێ بیتە ئەگەرێ جیاوازی و جوداكرنا سیاسی و جڤاكی، ژ بەر هندێ، داخوازێ دكەین وە هەدار هەبیت و هەتا رۆژا 10 هەیڤێ نڤێژ و پەرستن و خودێپەرێسییا خۆ ل مالێن خۆ ب رێڤە ببەن.
