١.گوران ژ قوناغا رێڤەبرنێ یا حکومەتێ لڤی دەمی رازیە؟
دەستپێکا دەستبکاربوونا حکومەتێ ودماوێ ڤان هەشت هەیڤێن بوری ژتەمەنێ وێ،تا راددەکێ پێنگاڤێن بەرچاڤ بو پێش هاتن هاڤێتن،وەکو نەهێلانا بریارا پاشەکەفتکرنا موچێ فەرمانبەران، ودەرکرنا چەند بریارەکێن تایبەت ب چاکسازیێ ونەهێلانا روتینی لدامودەزگەهێن حکومی. ولسەرئاستێ پەیوەندیان ژی دگەل بەغداد،کابینا نوی یاحکومەتا هەرێمێ شیا جارەک دی رازی بکەت وباوەریێ بو حکومەتا بەغداد دروستبکەت وپەیوەندیان وەکو پێش رفراندوما ٢٠١٧ ڤەگەرینتەڤە ورێککەفتنێ لدور پشکا هەرێمێ ژبودجا ٢٠١٩ێ دگەل بەغداد مورکەت.
لێ سەرباری ڤێ هەمیێ ژی،هێشتا گەلەک کێشە مانە هەلاویستی وگەلەک بادەکێن هەین،گرنگ بوو حکومتا هەرێمێ چارەسەرکربانە،لێ تا نهو فەراموشکرینە ودەست بونەبرینێ،وەکو بادەکێن گەندەلیێ دگشت سەکتەرێن دارایدا،وشەفافیەتکرنا داهاتێ نەفتێ،وباشترکرنا خزمەگوزاریان وخوشترکرنا رەوشا ئابوری وژین وژیارا خەلکی وهەولا ڤەدیتنا ئالییەتەکێ کربایە بو ڤەگەراندنا پاشەکەفتێ فەرمانبەران.
ئەڤ بادەکە هەمی هێشتا ماینە سەر ڕەفاتکێن بلند ویێن توزوکی بووین فەربوو حکومەتێ هەر زوی هندەک پێنگاڤ دڤی بواریدا هاڤێتبان.
ئەڤجا چنکو ئەدائا حکومەتێ سەدەرسەد دئاستێ پێدڤێدا نینە،بێگومان گوران سەرنج و تێبینیێن خو هەنە وداخوازێ دکەت حکومەت شیانێن پتڕ ب مەزیخیت ویا جددیتربیت دئەرکێن خودا.
٢.ئەگەررەوشا رێڤەبرنا هەرێمێ بڤی ئاوایی برێڤەچوو بریارا گوران دێ چ بیت؟
دیارە هەرێما کوردستانێ یا درەوشەکا زورخرابدا دبوریت،سەدەمژی هەم قەیرانا ئابوریە ئەڤا ژئەنجامێ بەلاڤبوونا ڤایروسێ کورونا هاتیەپێش ونرخێن نەفتێنە کو برەنگەکێ زور دژوار دابەزینە، تا وی راددەی گشت ئابورێن جیهانێ بتەمامی شلەژان کرینە،سەدەمێ دیژی هوکارێ ناڤخویە وحوکمرانیا نەسەرکەفتی ونەساخلەما ٢٩ سالێن ئێکەتی وپارتیە وەکری هەرێم بگەهیتە ڤێ رەوشا نهو حکومەت شیانێن پێدانا موچێ هەیڤەکێ فەرمانبەرا نەبیت.
راستە گوران ژی دگەل پارتی وئێکەتیێ پشکدارە دڤێ کابینێدا،لێ هەر ئێک لدویف قەبارەو وپێگەه وسەنگا خو،ودچوارچوڤێ وێ یاسایا دەستهەلات بو هاتین دەستنیشانکرن،ئەرک وکارێن خو بجه دئینن.
کەواتە ب هیچ رەنگەکێ گوران نەبەرپرسیارە ژوێ گەندەلیا ٢٩ سالێن حوکمرانیێ،وئەوکێموکاسی وگەندەلیا نوکەژی هەی،ستافێ گوران دحکومەتێدا ئەگەر جارەکێ ٥٪ێ بەرپرسیاربیت ئەڤە پارتی وئێکەتی ٩٥٪بەرپرسیارترن.
٣.گوران هەتا کەنگی دێ چاڤا ل ڤێ رەوشێ گریت؟
بزاڤا گوران چ جارا چاڤ ل رەوشا هەرێمێ نەگرتینە،بەلکو هەر کێموکاسییەک هەبت،هەرخیانەتەک یان گەندەلیەک ودزیەک کەسەکی یان لایەنەکێ کربت،گوران بێدەنگ نەبوویە وپشت نەدایێ وهەرئێکسەر بو رایا گشتی یا هەرێما کوردستانێ یا راگەهاندی ودهەماندەمدا پروژە وبەرنامەیێن چارەسەرکرنێ بو پێشکێشکرینە،وهەر ژروژا دامەزراندنا بزاڤا گوران ٢٠٠٩ وتا نهو هەمیشە دگەل خەموخەیالێن خەلکی بوویە وبەرەڤانی ژ ژین وژیارا خەلکی وژماڤ وکەرامەتا هەر تاکەکێ کوردستانی کریە،ولسەر ئاستێ هەردو فراکسیونێن گوران ل بەغداد ول هەولێرێ،درێغی نەکریە وهەتا بەری چەند روژەکان،هەڤالێن مە ل فراکسیونا پەرلەمانێ هەولێرێ دوو پروژێن زور گرنگ پێشکێشی پەرلەمان وحکومەتا هەرێمی کرینە،پروژێ ئێکێ بو ئەنجامدانا چاکسازیێ دگرێبەست وقەرزێن کومپانیێن نەفتێ یێن بیانی وخومالیدا،وپروژێ دیتر بو چاکسازی وچاڤدێریا خالێن سنوری وسەروسامانێ سروشتی وداهاتێ نەفتێدا.
وهەتا لسەر ئاستێ هەرچوار پارچێن کوردستانێ ژی،گوران هەمیشە خودان هەلویستەک نشتیمانی بوویە،تایبەت بوشورەشا کوردێن باکور وکانتونێن روژئاڤا،هەمیشە پشتەڤانیا ئعلامی وسیاسی وجەماوەری کریە بو شورەش وخەباتا وان یا رەوا دژی لەشکەرکێشیا دەولەتا تورک،وخڕڤەبوونێن پشتەڤانیێ وبەخشین وکومەک وهاریکاری پێشکێشی خەلکێ ئاوارەیێ کوردێن روژئاڤا کریە.
ئەڤە هەمی بەلگەنە کو گوران پشت نەدایە خەلکێ کوردساتنێ بگشتی وپرسێن نشتیمانی ونەتەوی،ونەژی پشت دایە داخوازیێن خەلکێ هەرێمێ ونە چاڤ ل گەندەلیێ ودزیێ ورەوشا خرابا هەرێمێ گرتینە.
٤.گوران نەگەهشتیە وێ بریارێ کارتا سور بو حکومەتێ بلند بکەت؟
گوران رێککەفتنا دگەل پارتی هەی ولگور وێ رێککەفتنێ گوران پشکداری حکومەتێ بوو،وژدویر ونێزیگڤە گوران بهویری چاڤدێریا ئەدائا حکومەتێ وپەرلەمانی دکەت وهەر شەش هەیڤا جارەکێ پیداچوونێ وهەلسەنگاندنێ دخالێن رێککەفتنێ ورەوش وپێشهاتێن سیاسی وئابوری وجڤاکی ل هەرێمێ وعێراقێ وجیهانێ دکەت،وگوران باش دزانت ودڤێت خەلک ژی بزانیت،کو ئەڤ رەوشا سەختا هەرێمێ یا باساناهی نینە وبهەیڤەکێ ودوو وسێیا چارەنابیت،ئیرادە ودەم وهەڤتێگەهشتن وهەڤکاری ووێرەکی پیدڤێن.
وچنکو گوران بزاڤەکا جاکسازخوازە وژبەرپرسایەتیێ ناڕەڤیت، وباوەری بکارێ هەڤپشک وهەما هەنگیێ هەیە،لەوما چوویە حکومەتێ وپروژە بو چارەسەرکرنا ڤی بارودوخێ هەرێم گەهشتیێ هەیە.وهەر ژبەر ڤێ مەرەمێ وئەو روحییەتا نشتیمانی هەی،بزاڤا گوران چەندین جارە داخوازێ ژپارتی وئێکەتیێ کریە کومبونەکا سێقولی ئەنجامبدەن،لێ مخابن چ ژهەردو حزبا نە پارتی ونەئێکەتی تا نهو ئامادەیا خو دەرنەبریە.
ئەڤجا براستی ئەگەر حکومەتا هەرێمێ بڤی شێوەی بمینیت،بێگومان گوران دێ هێتەدەنگ ودێ هەلویستێ خو هەبیت،چنکو ئەم یێ چووینە حکومەتێ برێککەفتن پێخەمەت گەندەلی نەمینت وچاکسازی بهێنەکرن ورەوشا خەلکی دهەمی بواراندا خوش ببیت،لێ ئەگەر ئەڤە هەمی نەهێنەکرن مانا گوران دحکومەتێدا هیچ رامانەک بو نابیت.
٥.ژیانا خەلکی بو گوران گرنگترە یان مان دحکومەتێدا؟
بیگومان ئەڤێ بەراوردی پێ نەڤێت،گوران خەلک وخوش ژیاریا خەلکی بسەرفەرازی وبکەرامەت گرنگترە ژهەر پلەوپوستەکێ،هەمی لایەک دزانیت کو گوران هەرژدامەزراندنێ ل ٢٠٠٩ وتا نهو ژبەر هەلویستێن وێ یێن نشتیمانی وپێداگریا وێ لسەر مافێن خەلکی وبەرنامەو پروژەوخەباتا وێ یا مەدەنی وپەرلەمانی،هەم ل هەرێمێ وهەمژی لبەغداد ژبو بنبرکرنا گەندەلیێ وئەنجامدانا چاکسازیێ وبجهئینانا عەدالەتا جڤاکی پیخەمەت ژین وژیارەکا ئازادانە وبکەرامەت بو خەلکێ کوردستانێ دەستەبەربکەت،گوران بکاک نەوشێروانێ رەحمەتی وبسەرکردایەتی وکادر وئەندام وجالاکڤانێن خوڤە،هەمیشە باجێن مەزن کەفتینە سەر،وتوشی چەندین دەردەسەریا ونان برینێ بوونە،هەرەشا کوشتنێ ونەمانێ وگرتن ورەڤاندنێ وتیرورکرنێ وبارەگا سوتنێ دگەل گوران هاتیەکرن،وتانهوژی هەست پێدهێتەکرن کو نەیارێن گوران زور بنهێنی وبدزیڤە،شیانێن مەزن تەرخانکرینە وبزاڤا ژناڤبرنا گوران دکەن.
ئەڤجا چوونا گوران ومانا گوران بو ناڤ حکومەتێ بو نەهێلانا گەندەلیێ وچاکسازیێ ودابینکرنا ژیانەکا خوشە بو خەلکی،ئەگەر ئەڤە هەمی نەهاتەکرن وخەلکی چ فایدە نەکر ژمانا گوران دناڤ حکومەتێ، ل وی دەمی دێ مە هەلویست هەبیت ودێ وێ بێژین یا باب وباپیران ژکەڤندا گوتی:(چیا نەچیت دەروێش دچیت).
٦.گوران یا بەرهەڤە داخوازیا لێبورینێ ژ خەلکی بکەت؟
هەلبەت گیانێ لێبورینێ وداخوازیا لێبورینێ،دوو چەمکێن پێگڤە دگرێداینە،هەردوو ئێک ژنیشانێن مروڤایەتیێ وهەست بەرزیێ وشارستانیەتێ،هیچ جڤاکەکا مروڤایەتیێ ئاڤا نەبوویە وپێشکەفتن وئاشتی ووەکهەڤیا جڤاکی وئاشتی وحەزژێکرن بخوڤە نەدیتیە ئەگەر ئەڤ ساخلەتە لجەم تاکێ وان نەبیت ودچوارچوڤێ ژیانا خودا پڕاکتیزە نەکربیت.لەوما بگرنگ دبینم تاک وجڤاکا کوردستانی ژی،بسەرکردە ورێبەر وحزب ولایەنێن خوڤە،ڤێ ساخلەتێ دناڤبەرا خودا دگەل هەڤال وخێزان ومللەتێ خودا پەیرەوبکەن،هیچ شەرمەک وکێماسییەک تێدا نینە مروڤی شاشییەک(بتایبەت دگەل مللەتێ خو) کربیت وپاشی پەشیمان بت وداخوازیا لێبورینێ بکەت،لێ دەربارەی گوران، بگرە ژکاک نەوشیروانێ رەحمەتی وهەتا چالاکڤانەکێ ئاسایی یێ گوران نە خیانەتەک نشتیمانی ونە دزی وگەندەلی کریە ونەژی بوونە داردەستەکا داگیرکەر ودوژمنێن کوردستانێ،ئەڤجا بوچی دێ داخوازیا لێبورینێ کەن؟
٧. مەرجێن گوران بو بەشداریکرنێ دحکومەتێدا هاتینە بجه؟
مەرجێن گوران یێن سەرەکی بنبرکرنا گەندەلیێ وئەنجامدانا چاکسازیێ وشەفافیەتە دداهات وسەروسامانێ گشتی وخوشکرنا ژیانا خەلکییە،ئەڤە ژئەوەلیاتێن گورانن وهەر ژپێخەمەت ڤان گوران پشکداری ڤێ کابینێ بوویە،هندەک بریار یێن هاتینە دەرکرن ژسەروکاتیا ئەنجومەنێ وەزیران کو چاکسازی دداهات وباج وقەرزێن کومپانیان بهێنەکرن،لێ مخابن تا نهو نەکەفتیە دبوارێ جێبەجێکرنێدا،وهێشتا گەلەک بادەکێن ماین وحکومەتێ دەست بو نەبرینێ.
٨. بوچی هەلویستێ گوران ل بەغداد وهەرێمێ ژێک جودایە؟
گوران ئێک پەیاما هەی ولسەر ئێک سکە وئێک رێباز دچیت وخەباتێ دکەت کو ئەوژی رێبازا کاک نەوشێروانیە،وهیچ جیاوازیەک دناڤبەرا هەلویستێ گوران نینە نەل بەغداد ونەل هەرێمێ، هەردوو فراکسیونێن مە ب ئێک نەفەس وئێک روحییەتا گورانخوازیێ یا جاران،پروژێن نەتەوەی وستراتیژیک پێشکێشدکەت وبەرگریێ ژهەبوون وماف وژین وژیارا خەلکی دکەت.
حاجی رێکانی / ئەندامێ جڤاتا نشتیمانی یا بزاڤا گوران
