فەرمانگەها میدیا و زانیاری راگەهاند، پشتى کو پەرلەمانتار سۆران عومەر ل دەزگەهێن راگەهاندنێ چەندین تومەتێن نەراستەوخۆ ئاراستەی سەرۆکێ حکومەتا هەرێمێ کرین، سەرۆکێ داواکارێ گشتى داخوازکر، بەلگێن پێدڤی دەربارەى رادەست بکەت، لێ ناڤبری چ بەلگەیەک پێشکێش نەکریە و خۆ ژێ ڤەشارتیە.
ئەڤرۆ دووشەمبێ، فەرمانگەها میدیا و زانیاری یا حکومەتا هەرێمێ راگەهاند، “پشتى کو پەرلەمانتار سۆران عومەر ل دەزگەهێن راگەهاندنێ چەندین تومەتێن نەراست و بێ بنەما ئاراستەی سەرۆکێ حکومەتا هەرێمێ کرین، سەرۆکێ داواکارێ گشتى داخواز ژ پەرلەمانتارێ ناڤبری کر، بەلگێن پێدڤی دەربارەى وێ تەمەتێ رادەست لیژنەیا مافێن مرۆڤی ل سەرۆکاتیا داواکارێ گشتى بکەت، و راستیا تەمەتێ بسەلمینیت، ئەگەر نە دێ ئەو تومەت چنە د خانا پوختان و ناڤکرێت کرنێ دا و د ئەنجام دا دێ ریبری یاسایێ هێنە کرن”.
دازانین ژى، “پشتى چەندین ئاگەهدارکرنان، ناڤبری چ بەلگەیەک لسەر تومەتێ پێشکیش نەکریە و خۆ ژێ ڤەشارتیە، ژبەر وێ یەکێ داخواز ژ سەرۆکاتیا پەرلەمانێ کوردستانێ کریە کو لدیف پەیرەوێ ناڤخۆ یێ پەرلەمانى رێکاران بگریتە بەر هەیا راستى زەلال دبن و سنورەک بۆ ناڤکرێتکرن و تومەتێن ناڤبری بدانن”.
بەحس ژى کر، ” خەلکێ کوردستانێ دزانن سەرۆکێ حکومەتێ د دەمێ دەربازبووى دا چەند یێ بهێن فرەهبوویە ل هەمبەر تەمومەتێن پشکەک ژ پەرلەمانتاران، لێ هند نەمایە کو ئەڤ بابەتە ببیتە دیاردە برێکا کارێ پەرلەمانتاریێ، بۆ مەرەمێن سیاسی و راستیی لبەر رایا گشتى بەرزە بکەن”.
دیار ژى کر، “نەهێلانا پارێزبەندیا پەرلەمانتاران ژ ئالیێ یاسایی ڤە رێک پێهاتیەدان و ب رامانا ژێ وەرگرتنا ئەندام پەرلەمانیێ نینە، پرۆسەیەکا یاسایی و مەدەنی یە، هەر دەما پەرلەمانتار یاسایێ بنپێ بکەت، لدیف پەیرەوێ ناڤخۆیێ پەرلەمانێ کوردستانێ لدیف مادێ ٢٤ پارێزبەندیێ لسەر هەلبگریت هەیا دادگەهـ بکاریت ژئالیێ یاسایی ڤە ریکاران وەربگریت”.
