سه‌ردار هێتوتى
ل وه‌لاته‌كى، ده‌ما كو نه‌دادى هه‌بیت و یه‌كسانى نه‌بیت، دراڤ بۆ هنده‌كان زێده و بۆ هنده‌كان هه‌ر نه‌بیت، یاسا هنده‌كان ب سالان زیندان بكه‌ت و نه‌وێریت ل هنده‌كان بنێریت، دادگه‌ه ملكێ ده‌وله‌تێ نه‌بن و ب تبلا هنده‌كان كار بكه‌ن، رۆژه‌كێ بۆ نه‌داران داعش بهێت، رۆژه‌كێ به‌غدا بودجه نه‌ده‌ت، رۆژه‌كێ كۆڤید19 بهێت و پاریێ نانى د مال دا نه‌مینیت، ل وى ده‌مى دێ چاوا ژیان هه‌بیت؟
ب سالان به‌رى نها ب ناڤ هنده‌ك گروپێن كارى په‌یدا بوون، كارێ وان زه‌لالكرنا گرنگیا پروسێسا زه‌واجێ بوو ل كوردستانێ، وان ل گوره‌ى یاسایێن نیڤ ده‌وله‌تى و یاسایێن شه‌ریعه‌تا ئیسلامێ پالدانا گه‌نجان دكرن دا كو بچنه د هێلینا زێرین دا، هه‌روه‌سا به‌رى ده‌مه‌كى ژى په‌رله‌مانتاره‌كى خاست توپه‌كى بپه‌قینیت و ب چه‌ند رۆژان سوسیال میدیا ب خۆ ڤه مه‌حتل كر و ل دیماهیكێ گوت: دڤێت هه‌ر خێزانه‌كا كورد ژ پێنج زاروكان كێمتر نه‌ئینیت چونكى رێژا كوردان ل عیراقێ دا یا به‌ره‌ڤ كێمبوونێ دچیت.
گروپێ گه‌نجان ل وى ده‌مى كاره‌كێ جان و رێك و پێك دكر چونكى داهات وه‌ردگرت و نوكه یێن د ناڤا كه‌ڤلیشكێ كه‌زانێ دا و نه‌شێن هه‌ر خۆ و بوچوونێن خۆ دیاربكه‌ن، ئه‌وى په‌رله‌مانتارى ژى نه‌شیای و نه‌زانى كانێ پێنج زاروك دڤێت چه‌ند داهات ژ بۆ هه‌ر مالباته‌كێ هه‌بیت دا وان پێ ب خۆدان بكه‌ن!
ئه‌ڤرۆ ئه‌م ل به‌ر ره‌حما داهاتێ به‌غدا یێ به‌ره‌ڤ برسیبوونێ دچین، برسیبوون ب تنێ ئه‌و نینه كو د ماله‌كێ یان ژى د ناڤا كومه‌لگه‌هى دا چه‌ند ماله‌ك برسی ببن به‌لكو برسبوون ل وى ده‌مى په‌یدا دبیت ده‌ما ملله‌ت و حكومه‌ت پێكڤه بكه‌ڤنه د ناڤا نه‌داریێ دا و حكومه‌تێ شیانێن دابینكرنا چ تشته‌كى ژ بۆ گه‌لێ خۆ نه‌بن، له‌ورا یا باش ئه‌وه ب زیترین ده‌م حكومه‌ت لێپێچینێ ژ دز و گه‌نده‌ل و مافیا ڤى وه‌لاتى بكه‌ت و ڤى ملله‌تى ژ ده‌ستێن وان قورتال بكه‌ت.
