سەرۆکاتیا هەرێما کوردستانێ ڕاگەهاند، ئەڤرۆ د جڤینا بەرهەم سالح و نێچیرڤان بارزانی دا ل سلێمانیێ ڕەوشا سیاسی و پێنگاڤێن پشتی پێکئینانا حکومەتا عێراقێ و پێدڤیا چارەسەرکرنا کریزان هاتنە گۆتۆبێژکرن.
ئەڤرۆ دووشەمبیێ سەرۆکاتیا هەرێما کوردستانێ د ڕاگەهاندنەکێ دا دازانین، “بەرهەم سالح سەرۆک کۆمارێ عێراقێ و نێچیرڤان بارزانی سەرۆکێ هەرێما کوردستانێ دەربارەی ڕەوشا عێراقێ و هەرێما کوردستانێ جڤیان و تێدا ڕەوشا سیاسی و پێنگاڤێن پشتی پێکئینانا حکومەتا عێراقێ و پێدڤیا چارەسەرکرنا کریزان گۆتۆبێژکرن”.
ئاماژە ب وێ یەکێ ژی کریە، د هەڤدیتنێ دا بەحسا پێشهاتێن سیاسیێن عێراقێ هاتیە کرن و هەردووئالیان تەکەزی ژ پێدڤیا چارەسەرکرنا کریزان و ناکۆکیان کریە، ب ئاراستەیا ئینانە پێشا ئارامی و ئاڤەدانیێ د ژیان و دەبارا وەلاتیێن تەڤاهیا دەڤەران ب هەرێمێ ژی ڤە.
ڕاگەهاندیە ژی، بەحسا پێکئینانا حکومەتا نوویا عێراقێ ب سەرۆکاتیا کازمی و تەکەزی ژ پشتەڤانی و هەڤبەندیا دگەل حکومەتا فیدرالی دا کرنە ژ پێخەمەت دەربازکرنا کریزان و باشکرنا دەبار و ساخلەمیا وەلاتیان، تێکشکاندنا تیرۆرێ و ئارامیا ئەولەهیێ ل هەموو دەڤەرێن عێڕاقێ، ب تایبەت یەکئالیکرنا پرسا بودجە و مووچەیێ فەرمانبەران.
هەروەسا بەحسا پێدڤیا یەکڕێزی و کێمکرنا ئالۆزیان ل عێراقێ کرنە ب ئاوایەکێ کو هەموو هێز و شیانان بۆ دەستەبەرکرنا ئارامی و دەبارا خەلکی و ئەنجامدانا چاکسازیا بنەڕەتی تەرخان بکەن و ل جهێ هەڤڕکیێن تەسک، لگۆری دەستوری خزمەتا خەلکی و داخوازیێن وان بکەن.
د داویێ دا ژی، هەردوو ئالیان تەکەزی ژ یەکڕێزی و تەبایێ د هەرێمێ دا کریە، ب ئاوایەکێ هەموو ئالی دوور ژ ئالۆزیان، شیانێن خۆ بۆ چوون لدیڤ داخوازیا پێدڤیێن وەلاتیان و دابینکرنا دەبارا وان و ئارامیا سیاسی و ئەولەهیێ تەرخان بکەن.
