دۆنالد ترەمپ د پەیوەندیەکا تەلەفۆنی دا ژبۆ دەستبکاربوونا وی وەک سەرۆک وەزیرێ نوویێ عێراقێ پیرۆزباهی ژ مستەفا کازمی کر.
ئەڤرۆ دووشەمبیێ نڤیسینگەها ڕاگەهاندنا سەرۆک وەزیرێ عێراقێ بەلاڤکر، دۆنالد ترەمپ سەرۆکێ ئەمریکا د پەیوەندیەکا تەلەفۆنی دا ژبۆ دەستبکاربوونا وی وەک سەرۆک وەزیرێ نوویێن عێراقێ پیرۆزباهی ژ مستەفا کازمی کر و ناڤبری ژی سوپاسیا سەرۆکێ ئەمریکا کر.
دیاکریە ژی، کازمی د پەیوەندیا تەلەفۆنی دا تەکەزی کریە کو عێراق دخوازیت باشترین پەیوەندی دگەل ئەمریکا دا هەبیت، ترەمپ ژی ڕاگەهاندیە کو عێراق ولاتەکێ بهێزە و ڕوولەکێ گرنگ هەیە د ئارامیا دەڤەرێ و جیهانێ دا.
ژ ئالیەکێ دیڤە، هەر ئەڤرۆ نڤیسینگەها مستەفا کازمی بەلاڤکر، کو مستەفا کازمی و حەسەن ڕۆحانی سەرۆک کۆمارێ ئیرانێ پەیوەندیەکا تەلەفۆنی ئەنجامدانە و تێدا سەرۆک کۆمارێ ئیرانێ هیڤیا سەرکەفتنێ بۆ حکومەتا نوویا عێراقێ خواستیە و ڕاگەهاندیە، ئیران د تەڤاهیا بیاڤان دا دێ پەیوەندیێن خۆ دگەل عێراقێ پێشڤەبەت و دخوازیت لگۆری ڕێنمایێن خۆپاراستنێ دەرگەهێن سنوریێن د ناڤبەرا هەردوو ولاتان دا بهێنە ڤەکرن.
ئەڤە ژی دەمەکێ دایە، حەفتیا دەربازبوویی پەرلەمانێ عێراقێ ب پڕانیا دەنگان باوەڕی ب کابینەیا مستەفا کازمی دا.
