راسته ئه‌م كورد دبێژین مرن كه‌رێ به‌تالانه لبه‌ر ده‌ریێ هه‌می مالانه و بو من بخوه یه‌ك روژ دژیانا من دا مرن كێشه نه‌بویه، چونكه وه‌ك فه‌یله‌سوفێ رومانی ئێمیل سیوران دبێژیت ئه‌م ژ مژێ هاتینه و به‌ره‌ف تاری بونێ دچین و د ده‌مه‌كیدا ئه‌م هزر دكین ژ مرنێ دره‌ڤین،
لێ راستیا وێ اێم ژ هه‌بونا خوه دره‌ڤین به‌ره‌ف مرنێ بازددین. كه‌س ژمه نكاره خوه ژڤێ قه‌ده‌رێ قورتال كه. بمن هه‌می تشته‌ك دسورشتیدا د به‌لانسه‌كێ دایه شه‌ڤ و رۆژ لهه‌ڤ دچه‌رخن، روناهیا كاره‌به ژ دو لایه‌نێن هه‌ڤدژ پێكتێن و هه‌رده‌ما لهه‌فكه‌تن ژكار دكه‌ڤن له‌وما هنده‌ك هه‌ڤدژی پێویسته مل بمل بچن.
ئه‌گه‌ر مه وه‌ك مروڤ گومان لسه‌ر راستیا پرانیا تشت و هزرێن لدور خوه هه‌بن لێ یه‌ك راستیا ئه‌م نكارین ژێ بره‌ڤین ئه‌وژی رۆژه‌كێ ئه‌م بوینه و رۆژه‌كێ دێ مرین. وه‌ك دوكتور بومه زۆر كه‌س هزردكن دبه ژ پرانیا خه‌لكێ دن ئاساییتره مرنێ،
لێ وه‌نینه هه‌رچه‌نده ئه‌م دبیت هه‌فتیێ راپورتا كێماسی مریه‌كی بنڤیسین، به‌لێ دراستیدا ئه‌م هه‌می هه‌ول و كوششا خوه ددین ژبو هه‌ر تاكه كه‌س تاكو بشێین ژیانه‌ك ساخله‌م هه‌بیت. ئه‌م پتر ژ هه‌می خه‌لكێ دن كه‌سوكارێن مریا تێدگه‌هین، ئه‌م دوزانین ته‌نها مرنه ئومێدا هه‌ڤدیتنێ دكوژیت.
مرنه موخابن نرخا گه‌له‌ك مروڤا تازه ده‌ردخیت، تازه ئه‌م ئاگادار دبین كو جهێ مروڤێ مری ڤالایه و بمن یا ژهه‌میێ نه‌خوه‌شتر زۆر كه‌س دمرن و ژیان ده‌رفه‌تێ ناده‌تێ یا دسه‌ریدا هه‌ی لگه‌ل خه‌لكێ دن هه‌ڤپاركه‌ت. كورونا دبه گه‌له‌ك بێژن نه‌خوه‌شیه و پرانیا مروڤا كێم زۆر بنه‌خوه‌شیه‌كێ دمرن له‌وما جودایی نینه. راسته
كورونا نه‌خوه‌شیه، لێ نه‌خوه‌شیا ڤێ مالوێرانێ بمرنا نه‌خوه‌شی بداوی ناییت، ئازارێت وێ هه‌یا خوه‌شتڤیێن قوربانیێن وێ د ژیاندا بن بمن نكارن ژبیر بكه‌ن. چونكه خوه‌شتڤیێ مروڤی هه‌ر نه‌خوه‌شیه‌ك هه‌بیت مروڤ دكاره سه‌ره‌دانا وی بكه، مال ئاڤایێ لێ بكه به‌ری مرنێ، ده‌ستێ وی بگڤێشه و بێخه ناڤده‌ستێن خوه یان سینگێ خوه ژبو ئازاری وی كێمكه و خه‌ما دلێ خوه پێبره‌ڤینه.
زۆر ئازاره خوه‌شتڤیه‌ك مروڤی لنه‌خوشخانێ بیت و مروڤ نكاریت ببینیت، دوستێ مروڤی بمریت مروڤ لژێرخاك كرنا وی ئاماده نه‌بیت، خێزان نه‌كاریت شینیا مرنا خوه‌شتڤیێ خوه بكیت،
روندكێت زاروكا بێن خوار و كه‌سه‌ك نه‌بیت دله‌ی دلێ وان بده‌ت، زاروك دسه‌هما شه‌ڤێدا خه‌وكه‌ن دوسته‌كه بابێ وان یان دایكا وان نه‌بیت ده‌ستێ خوه بسه‌ریدا بینیت. دوكتور رێبه‌ر گیانه ته شادبیت، كه‌سه‌ك ماندی نه‌ناس پشتی بێی دلێ خوه ته ده‌ست ژ خواندنێ به‌ردای و ده‌ست دایه چه‌كی بهیڤیا رزگاركرنا هاولاتی و وه‌لاتێ خوه. بوی پێشمه‌رگه‌ك ماندو نه‌ناس دناڤ رێزێن چه‌كدارێن حزبا سوسیالیست دا. پاشان به‌ره‌ف ئه‌وروپا هاتی و
خوه‌ندنا خوه وه‌ك دوكتور بدوماهی ئانی و چه‌ندان سالا وه‌ك بسپوره‌ك سه‌ركه‌فتی خزمه‌تكری و هه‌یا دناڤا نه‌خوه‌شا دا نه‌خوش كه‌تی و گیانێ خوه گوری ئه‌ركێ خوه‌یێ مروڤاتیێ كری. من و دوكتور رێبه‌ر ته‌نها چه‌ند هه‌فتیا بهه‌ڤرا كاركریه لێ بسالان مه هه‌ڤدو ناسكریه. رێبه‌ر مروڤه‌ك به‌شوش بو،
هه‌ڤال دوست بو، وه‌لاتپارێز بو، زۆر خه‌ون و هیڤی هه‌بون له موخابن لگه‌ل خوه برن. بمن خه‌ما ژهه‌میێ ماستر ئه‌و وه‌لاتێ خه‌بات لرۆژێن گران و ته‌نگاڤ ژبو دكر پشتی ئه‌وا ژێرا دبێژن ئازادی خوه لوه‌لاتێ خوه بیانی دیت، چونكه مه زۆر ده‌هول قوت و زرنابێژ هه‌نه
هه‌یا رۆژا ئه‌ڤرو خوه بزانا و ئه‌كادیمی بناڤ دكه‌ن لێ چونكه ل ئه‌كادیمیێن وان وانا ره‌وشتی نینه له‌وما زۆره جهێ بێ ره‌وشت لێ خوه‌دان ره‌وشت بچنێ. بكورتی و بكوردی دبێژم ژیان به‌فره و ناڤ چیایه، گه‌رم تێت به‌فر دچیت لێ چیا دمینیت. ته ژناڤ مه باركر دوكتور رێبه‌ر، لێ ناڤێ ته وێ بمینه شانازی بو زاروكێن ته.جهێ ته به‌هه‌شته
دكتور شه‌عبان مزیری
