سه‌ردار هێتوتى
رۆژنامه‌گه‌رى كارێ هه‌ره پیروز و مه‌زنه كو كه‌سێ رۆژنامه‌ڤان ددانیته سه‌ر ملێن خۆ ژ پێخه‌مه‌ت راستیا هه‌بوونا هه‌ر بویه‌ره‌كێ، رۆژنامه‌ڤان ژ به‌ر په‌یاما خۆ به‌رهه‌ڤه روى ب روى هه‌ر دژواریه‌كێ ببیت، ئه‌و توخیبا ناسناكه‌ت، ره‌نگ و جوانیا مروڤان بۆ وى نابیته خه‌م، هه‌ژار و ده‌وله‌مه‌ند وه‌ك ئێك د چاڤێن وى دا دهێنه دیتن، چونكى ره‌وشتێ كارێ رۆژنامه‌ڤانیێ ل نیك وى یێ د گوپیتكێ دا.
ده‌مه‌كى به‌رى نوكه من ئاگه‌هـ ژ نوچه‌یه‌كى بى كو ئێك ژ مالپه‌ران به‌لاڤكربوو، تێدا هاتبوو كو ل هه‌رێما كوردستانێ پترى 8000 هه‌شت هزار رۆژنامه‌ڤانێن كارا و به‌شدار هه‌نه، ئه‌ڤه به‌س ئه‌ون یێن كو د ناڤا سه‌ندیكا رۆژنامه‌ڤانێن كوردستانێ دا ئه‌ندام، لێ پا ئه‌گه‌ر یێن نه ئه‌ندام ژى بهێنه هژمارتن چ پێنه‌ڤێت دێ هژمار دوو هنده لێهێت.
ل هه‌رێما كوردستانێ ژ به‌ر هه‌بوونا هزرا حزباتیێ و ژ بۆ قازانجێن خۆ یێن حزبى، هه‌موو پارتێن كوردستانێ هندى شیانه هه‌ر كه‌سێ د ناڤا رێزیتَ پارتێن خۆدا كو هه‌تا هژماره دوو بشێت بهه‌ژمێریت یێن كرینه ئه‌ندام د ناڤا سه‌ندیكا و ئێكه‌تیێن كارى دا و چ پێ نه‌ڤێت كو سه‌ندیكا رۆژنامه‌ڤانێن كوردستانێ ژى كو نوكه بالێ حزباتیێ ب ته‌مامى سیبه‌ر دایێ و ل ژیر ره‌حما كارێ حزبا شول و كریارێن خۆ برێڤه دبه‌ت و یا كه‌فتیه ژێر ڤێ بێ ره‌حمیا پارتێن كوردى و ئه‌ڤرۆ ب گشتى ده‌زگه‌هێن راگه‌هاندنێ و سازیێن چاپه‌مه‌نیێ ل ژێر سیبه‌را ڤان حزبانه و ب گشتى رۆژنامه‌ڤان نه‌شێن توخیبان ده‌رباس بكه‌ن و ب ئازادانه كارێ خۆ بكه‌ن.
دگه‌ل كو سوشیال میدیا شیایه هنده‌ك سنورانان ببریت و په‌نجێ بۆ گه‌له‌ك بابه‌تان درێژ بكه‌ت لێ ژ به‌ر هه‌بوونا ساویلكه مروڤێن نه‌زان د ئاست رێڤه‌بریا وان ناڤه‌ندێن سوشیالێ دا ئه‌وێ ژى تا راده‌كێ مه‌زن خرابى زێده‌تر هه‌یه ژ باشیێ بۆ جڤاكى.
ئه‌ڤرۆ رۆژنامه‌گه‌رى ژ به‌ر بێ ره‌حمیا پارتێن كوردى و نه‌بوونا ده‌لیڤێن باشێن بنه‌جها یاسایێ ل كوردستانێ هه‌ر كو دچیت یا به‌ره‌ڤ قوناغێن تاریبوون و مالئاڤاهیێ ڤه دده‌ته رێ و ئه‌ڤه ژى دێ بیته ئه‌گه‌ر بۆ كوره‌كرنا تاكێن جڤاكى.
