د ڕاگەهاندنەکێدا لەقا دهوک یا سەندیکا ڕۆژنامەنڤیسێن کوردستانێ ئاشکراکر کو،
هێزێن ئێمناهیێ شەش ڕۆژنامەنڤیس ل دەمێ ڕومالکرنا خۆپێشاندانا ماموستا و فەرمانبەران دەستەسەرکرینە، و بنگەهەکێ پۆلیسان دەلیڤە نەدایە شیرەتکارێ یاسایێ سەندیکایێ ب ڕوڵێ خۆ ڕابیت و بەڕەڤانیێ ژ ڕۆژنامەنڤیسێن دەستەسەر کری بکەت.
دەقێ ڕاگەهاندنا لەقا دهوک یا ڕۆژنامەنڤیسێن کوردستانێ.
روونکرنەك ژ لژنەیا بەرەڤانیکرنێ ژ ئازادیێن ڕۆژنامەڤانی و مافێن ڕۆژنامەڤانان ل سەندیکایا ڕۆژنامەنڤیسێن کوردستانێ
ل وی دەمێ خرڤەبوونەك ژلایێ هەژمارەك ژ فەرمانبەر و ماموستایان ل پارێزگەها دهوکێ ل ڕۆژا شەمبی 16/5/2020 ل وێ خرڤەبوونێ هێزێن پۆلیسان هەژمارەك ژ ڕۆژنامەڤانان دەستەسەرکرن و کەل و پەلێن وان یێن وێنەکرنێ دەست ب سەردا هاتەگرتن ، بێی هەبوونا هیچ بەهانەیەکا یاسایی و ئەڤە دهێتەدان پێشلکاری بۆ یاسایا کارێ ڕۆژنامەڤانیێ یا هەژمار 35 یا ساڵا 2007ێ ئەوا رێگریێ ژ ڕاگرتن یان زیندانیکرنا ڕۆژنامەڤانی ل دەمێ کارێ وی دکەت ، پشتی چەندین پێکۆڵێن ڕژد ژ لقا دهوك یا سەندیکایا ڕۆژنامەڤانان بۆ ئازادکرنا ڕۆژنامەڤانان بەرپرسێ بنگەهێ پۆلیسێن نزارکێ ڕەتکر پارێزەرێ سەندیکایێ بەژداری پێڕابوونێن ڤەکۆلینێ ببیت و ڕێگری ل نوونەرێ سەندیکایێ هاتەکرن بۆ چوونا دناڤ بنگەهیدا و ئەڤە دهێتەدانان ڕەفتارەکا نەیاسایی ، لەوڕا داخازێ ژ جهێن پەیوەندیدار ل دهوکێ دکەین ب ئازادکرنا هەر شەش ڕۆژنامەڤانێن هاتینەگرتن و زڤڕاندنا کەل و پەلێن وان ب زویترین دەم ، و ئەم دووبارە ئیدانەیا گرتنا ڕۆژنامەڤانان و ڤان ڕەفتارێن نەبەرپرسانە بەرامبەر نوونەرێ سەندیکایێ ل دهوکێ دکەین.
لژنەیا بەرەڤانیکرنێ ژ ئازادیێن ڕۆژنامەڤانی و مافێن ڕۆژنامەڤانان ل سەندیکایا ڕۆژنامەنڤیسێن کوردستانێ
16/5/2020
