مەڵبەندێ چوارێ ئێکەتی نیشتیمانی: خۆپێشاندان مافەکێ ڕەوا و شەرعیێ خەلکێ کوردستانێ یە
مەڵبەندێ چوارێ دهوک یێ (ی.ن.ک) ڕاگەهاندنەک دەربارێ خۆپێشاندانێن ماموستا و فەرمانبەر و چالاکڤانێن مەدەنی ل باژارێ دهوک بەڵاڤکر و تێدا داخوازکر ڕێز ل ماف و داخوازیێن خۆپێشاندەران بهێتەگرتن، و خۆپێشاندان ب مافەکێ ڕەوا و شەرعی دا زانین.
دەقێ ڕاگەهاندنا ماڵبەندێ چوارێ ئێکەتی نیشتیمانی کوردستان
خەلکێ شەرەفمەندێ دەڤەرا بادینان و باژارێ دهوک
ڕێزدار کارگێریا پارێزگەها دهوک
ماموستا و فەرمانبەرێن بەرێز و مەفخواز
دیارە ڕەوشا ئابووری و داراییا ئالوز و نالەبار، کو دەرئەنجامێ بەڵاڤبوونا ڤایرۆسێ کوڕۆنا و داکەفتنا بهایێ نەفتێ لسەرانسەری جیهانێ پەیدابووی، بوارێ دارایێ هەرێما کوردستانێ و ژیان و ژیارا خەلکێ کوردستانێ ژی ئالۆزکر، و ماوێ پێنچ هەیڤا ژ ساڵا 2020 دەربازبوون و هەتا نوکە مووچێ هەیڤا ئێک نەهاتییە دابەشکرن، لەورا ژنەچاری خەلکێ کوردستانێ پەنا برییە بەر خۆپێشاندان و چالاکیێن مەدەنی، و ل پارێزگەها دهوک ژی ماموستا و فەرمانبەران بۆ بدەستڤە ئینانا مافێن خۆ یێن ئاسایی و ڕەۆا، ل ئێڤارییا ڕۆژا شەمبی ڕێکەفتی 16 گولانێ خۆپێشاندانەکا مەدەنیانە و ئاشتیانە سازکر، بەلێ مخابن ژلایێ هێزێن ئەمنی ڤە ڕێگری لێهاتەکرن و هژمارەکا ماموستا و فەرمانبەر و چالاکڤانان هاتنە دەستەسەرکرن.
ئەم وەکو مەڵبەندێ چوارێ ئێکەتی نیشتیمانی کوردستان، ژ پێگەهێ باوەری بوون ب بنەمایێن دیموکراسیەتێ و ئازادیا خۆپێشاندان و ئازادییا ڕا دەربڕینێ، خۆپێشاندان و خڕڤەبوونا 16 گولانێ یا ماموستا و فەرمانبەرێن باژارێ دهوک ب ڕەوا و شەرعی دزانین، بمەرجەکی ژ چارچووڤێ مەدەنیانە و ئاشتیانە دەرنەکەڤیت.
هەڤدەم داخوازێ ژ دەستهەڵاتا خۆجهییا پارێزگەها دهوک دکەین ل گورەی پڕنسیپێن دیموکراسی و مافی مروڤ سەرەدەریێ دگەل خۆپێشاندەران بهێتەکرن، و بزووترین دەم سەرجەم خۆپێشاندەر و چالاکڤان و ڕۆژنامەنڤیسێن ژلایێ هێزێن ئێمناهیێ ڤە هاتینە دەستەسەرکرن، بهێنە ئازادکرن.
ئومێدەوارین حکومەتا هەرێما کوردستانێ خو ل داخوازیێن خەلکی بکەتە خودان و چارەسەریەکا بلەز بۆ قەیرانا دارایی ببینیت و مووچێ سەرجەم فەرمانبەرێن هەرێما کوردستانێ دابین بکەت، و بەرنامە و پڕۆژێن گونجای داڕێژیت پێخەمەت کێمکرنا ڕێژەیا بێکاریێ و خۆشگوزەرانییا وەڵاتیان، کو شایستەی ژیانەکا باشترن.
ئێکەتی نیشتیمانی کوردستان
مەڵبەندێ چوارێ دهوک
16/5/2020
