نێرین

کەمپین و خونیشاندانێن کوردا ل ئەورۆپا

وەلاتێن ئەوروپی دستور بو ملەت و وەلاتێن خو دانانە.
یاسایێن مافێن کەمپین و خونیشاندانا ژی د ناڤ وان دستوران دا هەنە. ئەو یاسا رێکی یان مافی دەنە ھەرکەسەکی و هەر لایەنەکی بو ئاریشە و کێماسیا ب کەمپینا رابن و خونیشاندانا بکەن.
د ڤان ٣٠ یان ٤٠ سالێن بوری دا گەلەک کوردا قەستا وەلاتێن ئەوروپی کرنە و بووینە هەڤوەلاتێن وان وەلاتان.
کوردا ژی ل ئەوروپا ماف هەبوویە و یێ ھەی بو پرسێن خو یێن نەتەوەیێ و وەلاتێ خو کوردستانێ ب کەمپینا رابن و خونیشاندانا بکەن.
د ٣٠ یان ٤٠ سالێن بوری دا کوردان ژی بو پرسێن نەتەوەیی گەلەک کەمپین و خونیشاندان کرنە.
بێگومان، وەختێ کورد ب کەمپینەکێ رادبن یان خونیشاندانەکێ دکەن ئەو حەز دکەن ھەوارا خو بگەھینە سازیێن وان وەلاتا و داخازا ھاریکاریێ ژ وان بکەن
ل ڤێرێ دڤێت ئەم پرسیارەکێ ژ خو بکەین!.
ئەرێ ژ وان ھەمی کەمپین و خونیشاندانێن کوردا د ڤان ٣٠ یان ٤٠ سالێن بوری دا ل ئەوروپا کرین رێژە چەند ژ سەدێ سەروک و حوکمەتێن وان وەلاتێن ئەوروپی د ھەوارا کوردا ھاتنە و ھاری کوردا کریە؟.
ب دیتنا من سەرکردە و حوکمەتێت ئەورۆپی ١٥٪‏ ژی د ھەوارا کوردا نەھاتنە!. ١٥٪ گەلەک کێمە!.
ئەز ھزر دکەم هەکە ئەنجامێن کەمپین و خونیشاندانێن کوردا ژ ٥٠٪‏ کێمتر بن، باشترە کورد وان کەمپین و خونیشاندانان نەکەن!.
ئەز باوەر ناکەم کو کوردا هزرا خو د ڤێ رێژەیا کێم دا کربیت!. ژ بەر کو مخابن کورد ملەتەکێ هەستنازکە (عاطفی یە).
یا ژ کوردان ڤە یا گرنگ هەما بەس ئەوە کو ئەو کەمپینا و خونیشاندانا ل بەر پەرلەمانێن ئەوروپی بکەن و هزر دکەن هەکە وان ئەو کەمپین و خونیشاندان کرن خلاس کوردستان دێ رزگار بیت. لێ نە چ ئەنجامێن پێشچاڤ بدەست ڤە دئینن و نە ژی کوردستان رزگار دبیت!. بو وان ئەو ئێک نە ئاریشە یە. یا گرنگ ئەوە کو وان کەمپین و خوپیشاندان کر.
پرسیار: ئەرێ بوچی حوکمەتێن ئەوروپی وەکی پێدڤی و د تەنگاڤییا دا ھاری مە ناکەن؟.
چنکو ئەو چ پێنگاڤا ناھاڤێژن ھەکە د بەرژەوەندیێن وەلات و ملەتێن وان دا نەبن!.
ل دەڤ وان یا هەری گرنگ ئەوە کو ل وەلاتێن وان مافێ مروڤا و مروڤایەتی و ئازادی و دادپەروەری بو ملەتێن وان ھەبیت. ئەو چ جارا بەرژەوەندیێن وەلات و ملەتێن خو بو پەیداکرنا مافێن مروڤا، مروڤاتیێ، ئازادیێ و دادپەروەریێ ل وەلاتەکێ دی یان بو ملەتەکێ دی تێک نادەن!.
ھەکە ل دژی سەرکردایەتی یان رژێمەکا وەلاتەکێ دی رابن ژی ئیلاھ بەرژەوەندیێن وان یێن د هندێ را و یان بو پاراستن یان بو ب دەستڤەئینانا دەستکەفتان ب وی کاری رادبن!.
بوچی حوکمەتێن ئەوروپی گوھێ خو نادەنە کەمپین و خونیشاندانێن مە کوردا، ھاری مە ناکەن و مە ژ ھەژی دەولەتبوونێ نابینن؟.
مخابن کوردیت دەرڤەی وەلاتی ژی د ناڤ خو دا ئێک نینن. دژاتیا ئێک دکەن. بو ئێکودوو د خرابن!. ژ کەربێن ئیکودوو دا هەر هندەک کورد یێن چووینە دگەل حزبەکا وەلاتێن ئەوروپی ئانکو خو ل دەرڤەی وەلاتی ژی د ناڤ حزبێن وەلاتێن ئەوروپی دا ژی ئێک نینن!.
نوکە بو نموونە بەس ل ئوسلو بەلکی ژ ٣٥ کومەلێن گەنج و لاو و ژن و ئافەرەتا یێن ب ناڤێ کوردان ل دەڤ باژێرڤانیا ئوسلو دقەیت کرینە!.
ئەو جئدابوون و رەفتارێن وان زەرەرێ دگەھینتە وان ب خو و ناڤودەنگێن وان و ئەو ب دەستێن خو خو ل پئێشچاڤێن حوکمەتێن ئەوروپی کێم دکەن!.
ڤێجار ل کوردستانێ ژی خرابترە، سەرکردێن حزبێن مە کوردا بو پارە و مالێ دونیایێ ھەتا خو ل دونیایێ هەمیێ بر و خو ل پێشچاڤێن دونیا عالەمی شکاند!.
ئەرێ ئەوروپی پێتر حەژ ترک و عەرەب و فارسا یان مە کوردا دکەن؟.
مخابن ٩٠٪‏ کورد ل دەرڤەی وەلاتی ژ بەر هەستنازکبوونا خو یا زێدە ھزر دکەن کو حوکمەتێن ئەوروپی پێتر ژ عەرەب، ترک و فارسا حەژ مە کوردا دکەن. بەلێ چ راستی بو وێ چەندێ نینە!. حوکمەتێن ئەوروپی سەد ژ سەدێ پێتر حەژ ترک و عەرەب و فارسا دکەن چنکو ئەو خودان دەولەت و پارە نە و بەرژەوەندیێن وان دگەل ئێک هەنە!. ئەو پێتر ل خوشیێ و مفا و بەرژەوەندیێن خو دگەریێن!.!.
د ڤان ٤ سالێن دوماهیێ دا ژ لایەکی ڤە حوکمەتا عیراقی یا داگیرکەر کەرکوک و باژێرن باشور و ژلایێ دی ڤە حوکمەتا ترکیا یا داگیرکەر عەفرین و چەندین باژێرێن رۆژئاڤا ل پێشچاڤێن ئەوروپیا داگیر کر و بهارا پێتر سەرۆکێن ئەوروپا گوت کو ئەو نەرەعەتیا عیراق و ترکیا تێدگەهن و عیراق و ترکیا د حەقن!. چ وەلاتین ئەورۆپی هاری مە کوردا نەکر و هێرشێن عیراقێ و ترکیا نەراوەستاندن هەرچەندە کوردا ل باشور و رۆژئاڤا د شەرێ داعشێ دا ١٣ یان ١٤ هزار شەهید دان!.
ئەوروپی گەلەک بەحسێ مافێن مروڤا دکەن!.
ئەرێ ما کورد نە مروڤن؟.
کا مافێن مروڤا بو کوردا؟.
بوچی ترک، عەرەب و فارس ملەتێ کورد بندەست کریە و مافێ وان نادەنێ؟
ئەرێ ما ترک، عەرەب و فارس و ئەوروپی ب تنێ مروڤن؟.

ئەرێ تێکەلیێن حوکمەتێن ئەوروپی دگەل کوردا و داگیرکەرێن کوردستانی د چاوان؟.
وەکی تێکەلیا د ناڤبەرا زەنگین و فەقیران دا یە!.
زەنگین ھەڤالینیا فەقیرا ناکەن!. بەس ھەڤالینیا زەنگینێن وەکی خو دکەن!.
راستە کو کتوماتەکا سیاسەتمەدارێن ئەوروپییا دوستێن کوردانن. بەس بھارا پێتر ئەون ئەوێن کەتی و رەوشا وان پیچەکێ ژ یا کوردان باشترە!.
ئانکو ئەوروپی وەک حوکمەت حەژ ملەتێ کورد ناکەن چنکو ئەم د بێ دەولەت و حەکمەتین!.

پرسیار: ئەرێ پا ئەم چ بکەین؟
١) مادەم حوکمەتێن ئەوروپی وەکی پێدڤی و د تەنگاڤیا دا ھاری مە کوردا نەکەن دڤێت ئەم کورد بەس ب رێکا کەمپینا و خونیشاندانا ھەوارا خو بەینە دەڤ وان و داخازا هاریکاریێ ژێ بکەین!.
٢) دڤێت کوردێن دەرڤە خو چێکەن، ببنە ئێک، ژ دل هاری ئیک بکەن و پشتا خو بەس ب خو گەرم کەن یان ھەکو ئەم ب کوردیا عەرەبی دبێژین دڤێت کورد ئیعتیمادا خو بدەنە سەر خو. کورد ژدل بو نەتەوا خو شول کەن، ژدل ل بھا و نرخێن خو یێن نەتەوەیی (زمان، ئەدەبیات، چاند (وەکی گێرانا ئاهەنگا نەوروزێ پێکڤە)….ھد.) خودان دەرکەڤن. دڤێت کورد بەرژەوەندیێن وەلات و ملەتێ خو بداننە د سەر بەرژەوەندیێن شەخسی، حزبی و عەشائیری و یێن بیانی دا و دەست و دەڤ ژ بەرژەوەندیێن خو یێن شەخسی و حزبی بەردەن!.
ب ئێک ھێز جھێ خو د ناڤ حزبێن سیاسی یێن وەلاتیت ئەوروپی دا رێکبێخن داکو هەکە ئەو حزبا ئەو دگەل روژەکێ چوو سەر حوکمی ب هاریکارییا ئەندامین خو یێن کورد هاری کوردان بکەن!.
ھەکە کوردا ئەو تشتێن باش ھەمی کرن حوکمەتێن ئەوروپی دێ ھزرەکێ بو کوردا کەن و دێ بێژن ئەڤە ملەتکێ ژیر و د ئێکگرتی و ئەو مە کوردا ژھەژی دەولەتبوونێ بینن و هوسا دێ شێن ئەنجامێن مەزن و باش بدەست خو ڤە ئینن.

ئەلند دارڤین
٢٠٢٠.٥.١٥

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close