لیژنا چاندنێ د جڤاتا نوونەرێن عیراقێدا هۆشداری ژ كارتێكرنا بەنداڤا ئەلیسو دا لسەر پلان و پڕۆژێن چاندنێ ل عیراقێ
دبەیاننامەكێدا سەلام شەممەری سەرۆكێ لیژنا چاندنێ د جڤاتا نوونەراندا ڕاگەهاند، سەرجەم پلان و پڕۆژێن ستراتیژیێن حكومەتا عیراقێ و وەزارەتێن پەیوەندیدار دبوارێ چاندن و ئاڤدانێدا، پشت بەستیێ ب وێ ڕێژەیا ئاڤا هەردوو رووبارێن دیجلە و فورات و چەنداتییا ئاڤا عمباركری دكەن
سەلام شەممەری گوت: نەبوونا ڕێككەفتنەكێ دناڤبەرا بەغدا و ئەنقەرە دا لسەر بەهرا عیراقێ ژ ئاڤا رووبارێ دیجلە، دێ كارتێكرنەكا خراب كەتە سەر سەكتەرێ چاندنێ و پلانێن گەشەپێدانا وی كەرتی، و شەممەری داخواز ژ حكومەتا عیراقێ كر، بزووترین دەم دگەل توركیا بگەهیتە ڕێككەفتنەكێ بۆ مسوگەركرنا بەهرا عیراقێ ژ ئاڤا هەردوو رووباران، و رێ نەهێتەدان حكومەتا ئەنقەرە ئاڤێ وەكو كارتەكا فشارێ بۆ هندەك مەرامێن سیاسی ل دژی عیراقێ بكار بینیت.
