ئەڤرۆ ٩٤ رەوشەنبیرێن عەفرینێ بەیاننامەیەک بناڤێ “عەفرین… قیرینا زەیتوونێ” سەر قرکرنا ل عەفرینێ ئاراستەی ئالیێن کوردی یێن رۆژئاڤایێ کۆردستانێ کر.
دەقێ بەیاننامەیێ:
داگیرکرنا عەفرینێ دەرباسی سالا سیێ بوو، بێ تو ئاسۆیێن بداویھاتنا بۆبەلاتا ھاتیە سەرێ دەڤەرێ، دەما ڤەگەرا شێنیێن وێیێن رەسەن بۆ مالێن خوە، خویا بکە. ھین ب سەدھەزاران شێنیێن وێیێن ب دارێ زۆرێ ھاتنە کۆچکرن ل کامپێن پەنابەری، گوند و باژارێن شەھبا، حەلەب و دەڤەرێن سوورییێن دن شەرپەزە نە، ھەروەھا لێتەنگکرن ل سەرێ شێنیێن ئەفرینێیێن د ھوندری ھەرێمێ دە مانە،
بەردەوام دکە دا کو وان ژی کۆچبەر بکن و ژ مالێن وان دەرخینن. تێ زانین کو حکوومەتا ئەنقەرێ گرووپێن چەتەیانیێن پێ شەر کرنە، ب تالانکرنا عەفرینێ خەلات کرنە، وان ژی ھەمی کەرب و کینا خوە لێ ساخکرن، گیشت پلەیەکێ کو عەفرین وەکە دەڤەرەکە دەرڤە ھەمی زاگۆن و نرخان بوویە. لێ رەفتارێ گرووپێن پێخواس دەستھلاتدارە، کو کوشتنێ بەلاڤ دکن و پر جاران ژی خوە ب خوە، ل سەر پارێن دزی و تالانێ شەرێ ھەڤدو دکن.
دەنگێن ژ ھوندر دەردکەڤن، ددن خویاکرن کو ئەو د مال و گوندێن خوە دە ئاسێ مانە و بانگێ ل وژدانا مرۆڤاھییا مایە دکن، دا کو ژیانێ د ئاستا ھەری کێم دە رەھا بکن، تشتێ کو ل ور دقەومە جینۆساید و داویھانینا ھەبوونێیە، ئانکۆ ھەمی رەنگێن بنپێکرن و زێدەگاڤیان تێ بکارانین، ژ تاوانکاریێن کوشتنێ، رەڤاندن،
گرتنا ب زۆرێ، خوەستنا فدیەیان، ب سەر دە ژی کەسەک نزانە چ ل بارەگەھێن ئەولەھی و گرتیگەھێن تایبەت دقەومە. گەلەک تاوانکاریێن ل سەر مالووملک، نامووس و کەسان تێن کرن، و ئێدی نەما شێنیێن دەڤەرێیێن رەسەن ب ئارامیێ ھەست بکن نە ل کۆلانان و نە ژی ل مالان، و ب ئاوایەکی بێ راوەستان دەستەسەرکرن و قەوتاندنا خوەدیێن خانیان بەردەوام دکن.
ل ژێر دەستێ داگیرکەریێ دە، دیمەنێ جەندەکەکی ل چۆلێ، کەسەک د مالا خوە دە ھاتبە کوشتن یان سەرژێکرن، مێر یان ژن بە، ب ئاوایەکی نۆرمال دەرباس دبە، ھەروەھا بوویەرێن دەریشکاندنا مالان ب دارێ زۆرێ و دزین و کوشتنا خوەدیێن مالێ، بوویە دیاردە. ل ئەفرینێ، شڤانێن نشتەداگیر ب سەر خوەدیێن زەڤیانێن ناڤسال دە دقێرن و دبێژن: “ئەڤ زەڤی ملکێ مەیە… دڤێ تو ژێ دەرکەڤی”، لێ گاڤا ئەو ل بەر خوە ددە، تێ شەھیدکرن وەکە گەلەک ناڤسالێن دن، ژ بەر وێ ھێژایە ئەم ببیربینن کو ئارمانجگرتنا کالووپیران، ئارمانجکرنا داویتری خێزا بەرەڤانیێیا ژ بەر دیرۆک و تایبەتمەندیا ئەفرینێ ڤەیە.
تشتێ کو ل ئەفرینێ دقەومە جینۆسایدەکە چاندییە، ب بەردەوامی کار ل سەر گوھەرتنا ناسنامەیا ھەرێمێیا چاندی و جڤاکی تێ کرن. تورک-کرنا دەڤەرێ ب رێیا سەپاندنا زمانێ تورکی تێ کرن، ھەروەھا باوەری و گەردشێن جودا تێن چاندن و ژ ئالیەکی دن ڤە ئیسلامکرن د مەتریالێن خوەندنێ دە، ل گۆر رێبازا رێخستنا ئیخوان ئەل-موسلمین تێ فەرزکرن، د ڤی واری دە مەزەلێن ئۆلی، گۆرستانێن موسلمان و ئێزدیان سەرووبەر، ب تاوانێن کافرکرن و بێۆلدەرخستنێ تێن ھەرفاندن و دزین.
گوھەرتنا دەمۆگرافی، نە ئەنجاما داگیرکرنێیە، لێ ئەڤ پرۆژە یەک ژ ئارمانجێن ھەری سەرەکەیێن داگیرکرنێیە، تێ خوەستن ب رێیا کۆچکرنێ رە دەڤەر ژ شێنیێن وێ وەرە ڤالاکرن،
و یەک ژ نیشانێن وێ ئەو بوو ، گاڤا کو ئاستا ئێریشێن سەر ھەرێمێ گور دبوون ئالا ترکیێ ل سەر دەزگەھ و ئاڤاھیێن فەرمی ھات بلندکرن و داگیرکرن ھات راگھاندن، و ژ ھنگە ڤە، رۆژ ب رۆژ دەمۆگرافیا ھەرێمێ تێ گوھەرتن، ئانگۆ نشتەداگیران ب ھەژمارێن زێدەتر تینن دەڤەرێ و د مالێن شێنیێن دەڤەرێیێن رەسەن دە تێن نشتەجیکرن، و ئەوێن کو د مالێن خوە دە مانە ژی، ژێ تێ خوەستن کو کرێیا مالێن خوە بدن چەکداران!
ژ دەبارا ژیانێ، ھەرۆژ پلانا لێتەنگکرن، پەریشانکرن و برچیکرنا ب مەبەست، بەردەوام دکن، ئەڤ پلان ژی د رێیا سەپاندنا ڤێرگی، تەھسیلداریێن نە دادمەند، دەستەسەرکرنا مالووملکان، ھلکرنا دارێن زەیتوونان، شەوتاندن و ئێزنگکرنا تەوش ژ دارستانان رە تێ جیبجیکرن، ھەروەھا ئاڤ ژ بەنداڤا مەیدانکێ بۆ ویلایەتا رێھانیێ تێ دزین.
حکوومەتا ئەنقەرێ د دەما ستاندنا بریارا شەر دە، نە تەنێ ئامادەباشیێن لەشکەری ھازر کربوون، لێ وێ نەخشەیێن پێشوەخت ب گر و جیگەھێن شوونواری ژی ئامادەکربوون و ب تایبەت ئەوێن تێ پێشبینکرن کو گەوھەر و تەروەندەیێن دیرۆکی تێ دە ھەنە.
ل ژێر بن دەستێ داگیرکەریێ، پێڤاژۆیێن سیستەماتیک بۆ کۆلان و ڤەکۆلانا ل دەھێن جیگەھێن دیرۆکی بەردەوام دکن، و ژێ پارشەیێن شوونواری و ئانتیکا ھاتن دەرخستن و بۆ ترکیێ ھاتن شاندن. بێ گومان ئەڤ گاڤ ب مەبەستا ژناڤبرنا ناسنامەیا دیرۆکی و چاندییا دەڤەرێ نە.
عەفرین دۆزەکە پر-ئالییە، لێیێ ھەری ل پێش، ئالیێ وێیێ نەتەوییە، وێ لۆمێ بارەکی دیرۆکی ب ئاوایەکی یەکسەر دکەڤە سەر ملێن کوردان و ب تایبەتی دکەڤە سەر ملێن پارتی، ھێز و کەسایەتێن کوردێن خوەدی باندۆر، و ژ وان تێ خوەستن کو ل ھەڤ بکن و مالا کوردی بدن ھەڤ دا کو بەرسڤێ ل ھەمبەری کامپینەیا جینۆسایدکرنا گشتی و سیستەماتیکیا ل دژی ئەفرینێ تێ کرن، بدن و برینا وێیا کو ژ بێتری دو سالان دە خوین ژێ دھەرکە دەرمان بکن.
ئەم وەکە کەسایەتێن رەوشەنبیری و ئاکادەمیسیانێن کو ئیمازا خوە دانە سەر ڤێ بانگەوازیێ، ل سەر ناڤێن خوە ھەروەھا ل سەر ناڤێن ب ھەزاران کەسێن کو تێکلی ب مە رە کرنە، ئەوێن کو نھا ل ھوندری ئەفرینێ، ل کامپێن شەھبا و باژارێن دن دمینن، و ژ بەر کو باوەریا مە ھەیە،
دۆزا ئەفرینێ چارەنڤیسا کوردان دەستنیشان دکە، ئانگۆ تێ ناسکرن کو دۆزا ئەفرینێ بەشەکە ژ دۆسەیا کوردی د ناڤ پێنگاڤا چارەسەرکرنا کریزا سووری دە، وێ لۆمێ، ئەم ب ھێز دەنگێن خوە تەڤلی دەستپێشخەریا ھێزێن سووریا دەمۆکرات دکن،یا ب ئارمانجا یەکرێزیا د ناڤبەرا ھێزێن سیاسی دە ھاتیە، و ئەم تەکەز دکن کو پشتگریا مە ژ ڤێ دەستپێشخەریێ رە، ھەلوەستێن مرووزخوەشکرن و پیرۆزکرنێ دەرباس دکە، دا کو ھەر ئالی ب بەرپرسیاریا خوە ل ھەمبەری جڤاکا کوردی رابن.
ئیرۆ، ژ ھەمی ھێزێن کوردییێن سیاسی، رەوشەنبران، شارەزایێن زانستی، خوەدیێن پێنووسێن ئازاد ب رەنگێن خوەیێن رامانی، تێ خوەستن کو ل ھەمبەری جڤاکا ئەفرینێ،یێن ل ھودنر و کامپانێن پەنابەری و کۆچبەریێ دە، ھەلوەستەکە رژد و زەلال بدن، ژ چارچۆڤا گۆتارێن تێیۆریک دەرکەڤن، و بەرسڤا پرسێن شێنیێن عەفرینێ ل سەر چارەنڤیسا دەڤەرێ، ب ئاوایەکی یەکسەر بدن،
رێکێن بداویکرنا داگیرکەریێ وەرن دیتن، ھەروەھا چارەیەک ژ ئێشا شێنیان رە بێ دانین، ژ خوە ڤان ھێزێن سیاسی، ئەڤ ئەرک و ستووباریا ھلدانە ملێن خوە و خوە وەک نوونەرێن گەلێ کورد ددن ناسکرن، لۆما بەھانەیێن پاشخستنێ نەما تێن پەژراندن، ھەروەھا ب جارەکێ نەتێ قەبوولکرن دۆزا عەفرین داکەڤە مەیدانا بازارێ.
ھەروەھا ئەم بانگ ل ئالیێن ناڤدەولەتییێن سەرپەرەشتیێ دکن، کو دۆزا عەفرینێ و دەڤەرێن دنێن داگیرکری، د پلەیا یەکەمین دە وەرن دانین، ھەروەھا نەخشەرێ و بەرنامەیەکە کارا زەلال وەرە دانین دا کو داگیرکەریا ترکی ژ وان دەڤەران رە بێ داویکرن و کۆچکریێن وان دەڤەرێن داگیرکری،
ب ئاوایەکی ئارام ڤەگەرن سەر ئاخا خوە، ھەروەھا دڤێ چارەنڤیسا ب ھەزاران کەسێن بنچاڤکری وەرە ئاشکەرەکرن، کار ل سەر ئازادکرنا گرتیان وەرە کرن، ھەمی تاوانکار وەرن سزاکرن و مالباتێن قوربانیان وەرن قەربۆکرن
