نێرین

ژن دناڤا کەرتێ ئابووری دا

سه‌ردار هێتوتى

ژن ئه‌و ته‌خا جڤاكیه‌ كو بێى گرنگى دان ب هه‌بوونا وێ، شیانێن وێ، حه‌زا وێ، جڤاك قه‌د به‌ره‌ڤ پێش ناچیت و ل جهێ خۆ ناڤه‌لڤیت، ژن دشێت ببیته‌ پالده‌ر و پشته‌ڤانه‌كا مه‌زن بۆ وه‌رار و داهینانا ناڤا جڤاكى كو د پاشه‌رۆژێ دا دبیته‌ ئه‌گه‌رێ به‌ره‌ڤ پێش برنا وه‌لاتان، ئه‌و دشێت مینا زه‌لامى و باشتر ژى رولێ خۆ د ناڤا سكته‌رێ ئابوورى دا بگێریت.
رولێ ژنان د سالێن بورى دا ل سه‌ر ئاستێ سیاسى به‌ره‌ڤ پێشچوونێن مه‌زن بخۆ دیتینه‌ و ئه‌و شیانه‌ ل ناڤه‌ندێن مه‌زنێن خۆدان بریار جهگر ببن، هه‌روه‌سا د ئاستێ ئابوورى دا ژى ژن ب گشتى شیانه‌ تا راده‌كێ باش جهێ خۆ په‌یدابكه‌ن و ببنه‌ هاریكارێن مه‌زن یێن به‌ره‌ڤ پێشبرنا جڤاكان.
ل سه‌ر ئاستێ كوردستانێ، ئایا تا نوكه‌ ژن شیایه‌ ببیته‌ خۆدا رێڤه‌به‌ریا خۆ یا ئابوورى؟ د ناڤا گوره‌پانا ململانا جڤاكى و ئابوورى دا ژن لكیڤه‌یه‌؟ ئایا بێى هه‌بوونا نیڤا جڤاكى، ده‌وله‌ت و جڤاك بخۆ دشێن بگه‌هنه‌ ئاستێ گه‌شه‌كرنێ؟
د سه‌رده‌مێ نوكه‌ دا چ پێنه‌ڤێت بێى هه‌بوونا ژنانا د ناڤا كه‌رتێ ئابوورى دا جڤاك پێش ناكه‌ڤیت ژ به‌ر كو هه‌ڤبه‌شیا ژنێ د كارێ ئابوورى دا گه‌له‌كا گرنگه‌ چونكى د سه‌رده‌مێ چاندنێ دا ژن ژى مل ب ملێ زه‌لامى د ناڤا كه‌د و خه‌باتێ دا بوو، وێ ژى روله‌كێ مه‌زن دگێرا د ئاستێ په‌یداكرنا داهاته‌كى بو مالباتێ
له‌ورا د سه‌رده‌مێ وه‌رارا ته‌كنولوژیایێ دڤێت ژن ژى مینا زه‌لامى یا هه‌ڤپشك بیت د ناڤا داهینان و وه‌رارا ئابوورى دا.
ژ خالێن لاوازێن جڤاكێ مه‌، ئه‌وه‌ تا نوكه‌ نه‌شیانه‌ وێ چه‌ندێ قه‌بول بكه‌ن كو بێى هه‌بوونا ژنه‌كا زانا و برێڤه‌به‌ر د ئاست كه‌رتێ ئابوورى دا قه‌ت پێشكه‌فتن چێنابیت.
خاله‌كا دیتر یا بهێز ژى بۆ پشكداریا ژنێ د ناڤا ئابوورێ دا ئه‌وه‌ كو كاركرن و هه‌بینا ئابووره‌كا سه‌ربخو ژ بۆ ژنان ئێك ژ فاكته‌رێن كێمكرنا دژواریا ل دژى ڤێ ته‌خا جڤاكى دهێته‌ ل قه‌له‌م دان.
له‌ورا ژ بۆ جڤاكه‌ك ساخله‌م و برێڤه‌به‌ر و خۆدان ئاسته‌ك بلند یێ هشیاریێ دڤێت د ئه‌ڤرۆ پاشدا ژن بهێنه‌ ناڤا گۆره‌پانا ئابوورى و بشێن ل ده‌ست پێكێ ب تمامى ئابوورێ مالێ و پاشان ئابووره‌كێ سه‌ربخۆ ل ده‌رڤه‌ بۆ خۆ ئاڤا بكه‌ن.

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close