سه‌ردار هێتوتى
د دیرۆكا مرۆڤاتیێ دا شه‌ڕێن مه‌زن و وێرانكه‌ر ل دژى ژێنگه‌هێ په‌یدا بووینه، و ئه‌ڤـ شه‌ڕه یێن بووینه ئه‌گه‌ر بۆ تێكدانا هه‌ڤسه‌نگیا ژینگه‌هێ و وێرانكرنا وێ، شه‌ڕێن مرۆڤى ل هه‌مبه‌رى ژینگه‌هێ بێ ئه‌گه‌ر نه‌بووینه و ئه‌و ژى ب تنێ مه‌ره‌م پێ هنده كو مرۆڤ د ڤێ ژینگه‌هێ دا بژیت, پشتى هنگى شه‌ڕێ داگیركرنا ئاخێ و به‌رفره‌هكرنا ده‌ستهه‌لاتێ (شه‌ِرێ مروڤى ل دژى مروڤى) په‌یدا بوویه بۆ ده‌ست كه‌فتنا كه‌ڕه‌ستێن خاڤ ل ناڤ ژینگه‌هێ بێ به‌رچاڤـكرن و ئاگه‌هدار بوون ژ وێڕانكرنا ژینگه‌هێ، كو ژێده‌رێ سه‌ره‌كى یه بۆ ژیانا مرۆڤایه‌تیێ.
پشتى كو مرۆڤان ده‌ست ب ڤه‌دیتنا ماده‌ه‌یێن خاڤ كرى و شیاى وان بده‌ست بێخن، ل وى ده‌مى شۆڕه‌شا هه‌ره مه‌زن ل دژى ژینگه‌هێ هاته ده‌ستپێكرن و بوویه ئه‌گه‌رێ زێده‌بوونا كارگه‌هێن مه‌زن یێن چێكرنا كه‌لوپه‌لێن ژیانێ و جهێ خه‌بتاندنا هژماره‌كا زێده یا مرۆڤا چونكى دگه‌ل كو مرۆڤ پێدڤى ب كه‌لوپه‌لان بوو د هه‌ما ده‌م دا هژمارا زێده یا مرۆڤان ل سه‌ر رویێ عه‌ردى ئه‌و بخۆ ژى بویه مه‌ترسى ل سه‌ر هه‌بوونا ژینگه‌هه‌كا پاقژ.
ئه‌ڤرۆ ب گشتى جیهان و ب تایبه‌ت هه‌رێما كوردستانێ، ژ به‌ر نه‌پێگیریێن ژینگه‌هێ یێ كار لسه‌ر تێكدانا ژینگه‌ها وه‌لاتى دكه‌ن و دڤێت ژ لایێ چالاكێن ژینگه‌هێ و خه‌مخورێن بیاڤێ هشیاریا نه‌ته‌وى و ژینگه‌هپارێزیێ ڤه كارێن مه‌زن و هزرێن باش بهێنه كومكرن دا كو ژینگه‌ها مه ل هه‌ر تێكدانه‌كێ بهێته پاراستن دگه‌ل كو كۆڤید19 شیایه تا ڕاده‌كێ هه‌ره مه‌زن هه‌واى پاقژ بكه‌ت لێ دڤێت ئه‌م ژى وه‌ك مرۆڤ عه‌ردى پاقژ بكه‌ین ژ هه‌مى وى پلاستیكێ مه ب ده‌ستێن خۆ هاڤێتیه د دلێ عه‌ردى دا، دا كو بشێین بۆ ژیانه‌كا به‌رده‌وام عه‌ردێ خۆ ب پاقژى بۆ نفشێن پاشه‌ڕۆژێ بهێلین.
