کۆما جڤاکێن کوردستان-کەجەکێ ڕاگەهاند، ئەوێن هێرشا تورکیا قەبولکرین و پشتەڤانی لێ کرین، هەڤکارێن قڕکرنا کوردانە. هەروەسا دبێژیت، پارتی و یەکێتی ژی لهەمبەر وان هێرشان بەرپرسیارن.
هەڤسەرۆکاتیا دەستەیا ڕێڤەبەریا کۆما جڤاکێن کوردستان-کەجەکێ، د ڕاگەهاندنەکێ دا دیارکر، ئەڤ هێرشێن تورکیا هێرشێن قرکرنا کوردانە و ژبەر ڤێ یەکێ ژی هەر هێزەکا سیاسی و کەسایەتیا کو ئەڤ هێرشە قەبوولکرین و هەڤکاربوونە و چاڤپوشی کرینە، هەڤکاری قڕکرنێنە.
گوتیە ژی، “ئاشکرایە د ناڤبەرا عێراقێ و تورکیا دا لسەر کوردن لهەڤهاتنەکا بەرژەوەندیێ هەیە، ژبەر کو لهەمبەر هێرشێن سەر گەلێ شنگال و مەخموورێ و هەلویستەکی بهێز نیشان نەدا و هێرش شەرمزار نەکرن، ئەڤە ژی نیشانەیا وێ یەکێیە خاوەنداریا گەلێ خۆ ناکەت و بەرپرسیاریا خۆ جیبجی ناکەت”.
بەحسا وێ یەکی ژی کریە، پەدەکە و یەنەکە (پارتی و یەکێتی) ژی ژ وان هێرشان بەرپرسیارن، ڕاستە فەرمانا گۆرەپانا ئەسمانی د کۆنترۆلا هێزێن عێراق و هەڤپەیمانان دایە، لێ لسەر ئەسمانێ کوردستانێ دهێنە ئەنجام دان، ژبەر ڤێ یەکێ ژ ڕوویێ ئەخلاقیڤە بەرپرسیاریا وانە لهەمبەر هێرشان ڕاوەستن.
دبێژیت ژی، بێدەنگیا وان (پارتی و یەکێتی) لهەمبەر ڤان هێرشان وەسا دکەت ببنە هەڤکارێن هێرشا قڕکرنێ و دەستێ وان ژی چوویە خوینا کوردان.
ئەڤە ژی دەمەکێ دایە، دەما دوو ڕۆژانە ئارتێشا تورکیا ب ڕاگەهاندنا ئۆپەراسیۆنەکێ ب بەرفرەهی هێرشی سەر چەندین دەڤەرێن هەرێما کوردستانێ دکەت، لگۆری وەزارەتا بەرەڤانیا تورکیا، د یەک شەڤ دا بالەفرێن وان ٨١ ئارمانج ل باشورێ کوردستانێ بۆمبەباران کرنە، شەڤێ دی ژی ڕاگەهاند، کو هێزەکا وان یا کۆماندو ب مەرەما ئەنجام دانا ئۆپەراسیۆنا پەژای هاتیە دەڤەرا هەڤتەنینا زاخۆ.
