سه‌ردار هێتوتى
ناخازم ب به‌ژن و باڵا حكومه‌تێ بێژم، چونكى ئه‌و بخۆ خۆدان باشترین پێناسه‌یه كو هه‌تا نوكه ل سه‌ر خۆ نڤیسیى و بۆ ده‌مێ 29 ساڵانه ژ لایێ مه هه‌میان ڤه یا زانایه، به‌ژن و بالێن وێ حكومه‌تێ نه هنده د جان و ڕیك و پێكن نه‌ژى كه‌زیێن وێ زێده درێژن كو هه‌ر كه‌س ببیته شه‌یدایێ وێ، ب تنێ عاشقێن وێ كۆمه‌كا ده‌ست درێژن كو ل ئه‌لندا وێ هه‌تا نوكه تێر نه‌بوینه.
پروژێ چاكسازیێ ئه‌وێ دا هێته بجهكرن و گه‌له‌ك خه‌لك یێ ل سه‌ر ب باوه‌ر بوو، هه‌مى هیڤى ل به‌ر ئاڤێ دا برن و وه‌سا دیار بوو كو هه‌ر د بنه‌كوكێ دا چ پروژه نه‌بوینه ب تنێ ناڤێ چاكسازیێ ل سه‌ر هه‌مى لاپه‌رێن وێ هاتبوو قه‌یدكرن بێى هیچ برگه و ناڤه‌رۆكه‌ك، ئه‌ڤرۆ ئه‌وا هاتیه ڕاگه‌هاندن كو دووباره دێ ده‌ست بۆ كێمكرنا مووچه به‌ن و دێ ژ بۆ پاشه‌كه‌فتى ڤه‌گه‌رین ئه‌و ژ نه‌بوونا پروژه و حه‌زا كاریه ژ لایێ هه‌مى حزبێن كوردى ڤه، چونكى نه‌شێن ده‌ستێ خۆ بۆ چاكسازیێ ببه‌ن و بن دیوارێن موچه شێر ناڤێ وان د ناڤا لیستان دا نه‌هێلن.
ئه‌ڤرۆ دڤێت كاربده‌ستێن حكومه‌تێ د زانا بن كو سه‌بر و هه‌دارا هاولاتیان چ نه‌مایه، گرۆپێن فشارێ ژى یێن شیاى باندوورێ بێخنه سه‌ر لایه‌نێ هزرى یێ ڤى خه‌لكى و د رۆژا نوى دا خه‌لكى ب تنێ داهاته‌ك ژ بۆ ژیانا خۆ دڤێت له‌ورا ئه‌ڤ كاربده‌سته بلا ل خۆ بزڤرن به‌رى كو خه‌لك وان بزڤرینیت، زڤرینا ل نیڤا ڕێكێ ژى دێ بۆ وان ب پیروزى ل قه‌له‌م ده‌ین چونكى تاكه هیڤیا مه مانه‌ڤه‌یا ڤان ده‌ستكه‌فتانه یێن كو ڤى گه‌لێ ژار و به‌له‌نگاز خوهـ و خوین بۆ رێشتى.
