سازیا ساخلەمیا جیهانی ڕاگەهاند، ڤاکیسنا کۆمپانیا ئەسترازینیکا کو ژ ئالیێ زانایێن زانینگەها ئۆکسفۆردڤە هاتیە پێشڤەبرن دێ بەریا هەموو ڤاکسینێن دی بەرهەڤ بیت. دبێژیت ژی، “بڕیارە د مەها تەباخا داهاتی دا، ڤاکسین بەرهەڤ ببیت”.
دکتۆر سومەیە سوامینەسان سەرۆکا ڤەکۆلەرێن سازیا ساخلەمیا جیهانی ڕاگەهاند، باشترین بەربژار د ناڤ ڤاکسینێن کۆرۆنایێ دا ژ ڕوویێ دەمی ڤە ڤاکسینا کۆمپانیا ئەسترازینیکایە، لێ ڤاکسینا کۆمپانیا مۆدێرنایا ئەمریکا ژی چ ژ وێ کێمتر نینە و قۆناغێن زۆر بۆ بەرهەڤبوونێ بڕینە.
دەربارەی ڤێ یەکێ ژی، دوهی حازم جەمیل، بریکارێ وەزارەتا ساخلەمیا عێراقێ ڕاگەهاند، ولاتێ وی د پەیوەندیێ دایە دگەل کۆمپانیا ئەسترازینیکا و دخوازیت ڕێژەیەکێ ژ ڤاکسینێ بکڕیت.
د دەمێن دەربازبوویی دا ژی، زانایێن زانینگەها ئۆکسفۆردا بەریتانی ڕاگەهاند، ڤاکسینێ دژە ڤایرۆسێ کۆرۆنایێ پشێڤەبرنە کو ب ڕێیا دەڤی دهێتە مێژتن و چێدبیت د چەند حەفتیێن داهاتی دا تەمام بیت.
