لیژنا كاروبارێن ده‌رڤه یا په‌رله‌مانێ عیراقێ ، داخواز ژ حكومه‌تێ دكه‌ت پرسا بۆردومانێن توركی بكه‌ته كارناما روینشتنێن خۆ یێن داهاتی ، ب پێدڤی ژی دزانیت به‌رسڤدانا هێرشێن توركیا نه بتنێ د سنورێ ئیدانه‌كرن و نه‌رازیبوون ده‌ربڕینێ بیت.
ل گور راگه‌هاندنه‌كا لیژنا كاروبارێن ده‌رڤه یا په‌رله‌مانێ عیراقێ كو ئه‌ڤرۆ ئه‌ینی هاتیه به‌لاڤكرن تێدا دبێژیت : جیهان و ده‌ڤه‌ر ب ره‌وشه‌كا نازك و بێ پێشینه‌یا د دیرۆكا هه‌می مرۆڤایه‌تیێ دا ده‌رباز دبن كو پێدڤی یه مرۆڤ پشته‌ڤانیا برایێ خۆ یێ مرۆڤ بكه‌ت ژ پێخه‌مه‌ت ده‌ربازبوون ژ وێ تایا هه‌ڤبه‌ری مرۆڤایه‌تیێ بووی كو هه‌تا نها ژی ئه‌گه‌ره بۆ ژ ده‌ستدانا خۆشتڤی و كه‌س و كاران ، دڤێت د ڤێ ره‌وشێ دا ب ئاوایه‌كێ جودا هزربكه‌ین و هه‌ستێ مرۆڤایه‌تیێ یێ زال بیت ب سه‌ر مه دا.
هه‌روه‌سا لیژنا كاروبارێن ده‌رڤه یا په‌رله‌مانێ عیراقێ د وێ راگه‌هاندنێ دا دبێژیت: زێده‌باری هندێ ژی كو ئه‌ڤه 10 رۆژ ده‌رباز نه‌بوون كو ل هه‌ڤبه‌ر بۆردومانێن توركیا بۆ سه‌ر ده‌ڤه‌رێن هه‌رێما كوردستانێ ،وه‌زراه‌تا ده‌رڤه بالیۆزێ توركیا گازی كر و یاداشته‌كا نه رازیبوونێ راده‌ستكریه ، لێ دیسا سه‌ر و شنی ده‌ستدرێژیه‌كا دی ل ده‌ڤه‌ره‌كا دیا پارێزگه‌ها سلێمانیێ رویدا و هژماره‌كا وه‌لاتیان بوونه قوربانی و زیانه‌كا مادیا مه‌زن ژی ب به‌ر جهێ رویدانێ كه‌فتیه.
لیژنا كاروبارێن ده‌رڤه یا په‌رله‌مانێ عیراقێ زێده‌باری ئیدانه‌كرنا وان ده‌ستدرێژیێن توركیا داخواز ژی ژ حكومه‌تا عیراقێ دكه‌ت ڤێ پرسێ بێخیته ناڤ به‌رنامێ كۆمبوونێن داهاتیێن په‌رله‌مانی دا به‌رسڤدانا هێرشێن توركیا نه بتنێ د سنورێ ئیدانه‌كرن و نه‌رازیبوون ده‌ربڕینێ بیت ، به‌لكو پێدڤی یه حكومه‌ت هنده ڕێكاران بگریته به‌ر ژبۆ رێگریێ ل دووباره‌بوونا وان هێرشێن توركیا .
