ڕێڤەبەرییا پەیوەندیان یا سەر ب سەرۆكاتییا توركیاڤە نەخشێ بنگەهێن سەربازیێن توركیا دناڤ ئاخا هەرێما كوردستانێدا لسەر تۆڕا كۆمەڵایەتییا تویتەری بەڵاڤكر و ب نەخشێ پارچەكرنا عیراقێ وەسفكرییە.
ڕێڤەبەرییا پەیوەندیان ل سەرۆكاتییا كۆمارا توركیا ب شێوێ گرافیك جهێ هژمارەكا سەربازگەهێن خۆ دناڤ ئاخا هەرێما كوردستانێدا كو 36 سەربازگەهـ و بنگەهێن لەشكەری نە، بەڵاڤكر و ئاشكرا كر كو بنگەهەكێ وان یێ سەربازی ل باژارێ هەولێرێ یە.
ل پێشی دەستپێكرنا ئۆپڕاسیۆنا پەنجێن پڵنگی، و ل گورەی زانیاریێن فەرمیێن وەزارتا بەڕەڤانییا توركیا، هژمارا بنگەهێن سەربازیێن وی وەڵاتی دناڤ ئاخا هەرێمێدا تنێ 20 بنگەهـ بوون، كەواتە پشتی دەستپێكرنا ئۆپڕاسیۆنێ، سوپایێ توركیا 16 بنگەهێن خۆ ل هەرێمێ زێدەكرینە.
لایەنێن ئۆپۆزسیۆنێ ل توركیا بەڵاڤكرنا نەخشێ پارچەكرنا عیراقێ ب پێنگاڤەكا مەترسیدار و نە دجهێ خۆدا وەسفكر، و دانە زانین كو بەڵاڤكرنا وی نەخشێ پارچەكرنا عیراقێ، بەروڤاژی هەڵویستێ ئاشكرایێ حكومەتا ئەنقەرە یە دەربارێ پاراستنا ئێك پارچەییا ئاخا عیراقێ، و دێ كارڤەدانێن خراب بو توركیا ل پەی خۆ ئینیت.
