نێرین

داگیرکەرێ دیموکراتخاز

سەردار هێتوتی

ل دەمێ بووری گەلەک جاران پەیڤا دیموکراسیەتێ بۆ وەڵاتەکی دهاتە بکارئینان کو تێدا ب سەدان ساڵە گەلەکێ خۆدان زمان و ئەرد و چاند و کلتورەکێ جدا ژ یا وان تەپەسەرکرینە، هندەک خوینەرێن ماڵپەرا و سەردانیکەرێن جهێن گۆزاری و بازرگانێن بەرژەوەندخاز و کرێگرتیان وەک تابوورێ پێنجێ ل سەرێ کولانان، د ناڤا جڤاتان ل ناڤەندین ڕەوشەنبیریێ و د ناڤا کەناڵان دا گەلەک ب بەژن و باڵا ترکیا دلوراند و ئەردوغان ژی وەک فریادرەس بۆ ئازادی و دیموکراسیەتێ ل قەلەم ددا.
ترکیا ب ئەگەرێ پێگەهێ خۆ یێ جیوسیاسی شیایە ل سەر ئاستێ جیهانێ ببیتە خۆدان سەنگ چونکی خالا پێکڤە گرێدانا دوو کێشوەرانە و ل ناڤا ئاخا وێ را پشکەکا زوور ژ گازا ئەوروپا دهێتە دابین کرن و پەیوەندیێن وێ یێن بهێزێن ئابووری و سیاسی و زانستی ژی دگەل ئەوروپا زێدەتر پێگەهێ وێ بهێزکریە، لێ ئەڤە هەمی و زێدەباری گەلەک خالان دیتر ژی، لێ بەلێ نابیت کوردەکێ ب چاڤان تاری و ب گوهان کەڕ و ب دەڤی تێکدەر بشێت کارتێکرنێ ل سەر رایا بەشەکێ زێدە یێ خەلکی بکەت و ڤی داگیرکەرێ مەزن وەک دیموکراسیخاز ل قەلەم بدەت.
ترکیا بوو کو شۆڕەشا کوچگێری ژ ناڤبری و سەرکردێن وێ شەهید کرین چونکی وان ل دێرسمێ نەدخاست کولە و بەندەیێن ترکا بن، هەر ئەو بوین شێخ سەعید سێدارەدای چونکی شێخێ شەهید نەشیا زڵما وان ل سەر کوردان قەبیل بکەت و وان ب هاریکاریا دیڤەلانکێن خۆ کومارا ئاراراتێ تێکدا و سەرکردێن وان کوشتن و هند ژی ئێخستن زیندانێن تاری چونکی ئێحسان نۆری پاشا و هەڤالێن خۆ ژ بۆ کوردان کۆمارەک ئازاد و خۆسەر دڤیا.
وان ب ناڤ دیموکراسان نێزیکی 100 ساڵانە ب ناڤێ کۆمارا ترکیا یا ئێک گەل و ئێک زمان و ئێک ئاڵا کوردێن تەپەسەر کری و نوکە ژی دگەل ڤان گۆهرینێن مەزن یێن جیهانی هێشتا کورد د وێ کۆمارا ب ناڤ دیموکرسیخاز دا پلە دوونە و مافێ ژیانێ نینە.
لەورا دڤێت ب هشیارانە سەرەدەریێ دگەل تابوورا پێنجێ بکەین و نەهێلین زێدە کار ل سەر مێشکێ خەلکێ مە ل باشوور بهێتە کرن و پێدڤیە ب بەرنامە و ب ڕێکێن ئامیرێن ڤی سەردەمی یێن گەهاندنێ ناڤەندێن هزرا نەتەوی هەمی خرابکاریێن ترکا ل باکوور بیننە سەر شاشێن تیڤی و سوشیال میدیایێ.

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close