د. شه‌عبان مزوری
راسته مرن كه‌رێ به‌تالانه لبه‌ر ده‌رگه‌هێ هه‌می مالانه، لێ ژێ ده‌ركه‌ڤیت كو مرن دوماهیا مه هه‌میا، دیسان ئه‌وژی نه داپه‌روه‌رانه‌یه، گه‌له‌ك كه‌سێن نه ته‌نها خرش به‌لكو زیانبه‌خش پر ژی درێژن، جارنا مروڤ هزر دكه‌ت قه‌ی مرن ژی بخوه دوژمنێ مروڤێن به‌رهه‌مداره له‌وما پرانیا كه‌سێن ژیر و زانا ژی كورتن. ئه‌ڤرو ل دهوكا داسنیا مرنێ په‌نجێن خوه لقركا یه‌ك ژ ره‌وشه‌نبیر، نڤیسكار، هوزانڤان، مروڤ و وه‌لات دوست شداندن و روحا سه‌دیق شه‌رو ژ ناڤمه بر.
سه‌دیق شه‌رو زاروكاتیا خوه بسێویتی پشتی مرنا بابێ وی بریه سه‌ری، لێ ئه‌ڤ یه‌كه نه‌شیان رێ لوی بگره كو خوه‌ندنا خوه بپله‌یێن باش ببه‌ت سه‌ری. ڤیانا وی بو په‌رتوكێ وه‌لێ كر كو بچیت زمان و ئه‌ده‌با عه‌ره‌بی ل زانكویا موسل بخوینیت چونكه لوێ سه‌رده‌مێ پرانیا سه‌رچاوا بزمانێ عه‌ره‌بی بون. مل بملێ ڤیانا په‌رتوكێ، ڤیانا وه‌لات و نه‌ته‌وا خوه لپێشیا هه‌می تشته‌كی بو. من باش لبیره سالا ١٩٧٤ ده‌ما پرانیا خه‌لكێ مه باژار به‌رداین و ده‌ركه‌تێن چیا شه‌رو مامۆستایێ مه بو، ره‌وشا خواندنگه‌هێ بو بروژ و ئه‌ڤاریا ره‌وشا دیوانا بو. بێژه‌ره‌ك بێ به‌ڤل بو د چیروك و سه‌رهاتیا دا، ده‌نگه‌ك پر زه‌لال و روی به‌شوش بو د سترانادا.
پشتی ئاشبه‌تالیا ١٩٧٥ ماموستا شه‌رو هێدی هێدی من پتر ناسكر لباژێرێ موسل. ده‌ما ناڤ ئینانا ژنێ په‌یڤه‌ك كرێت و كێماسی بو، شه‌رو هه‌لگرێ ئالا وه‌كهه‌ڤیا ره‌گه‌زێ نێر و مێ بو ئه‌گه‌ر نه‌بێژم ل بادینا لێ بكێماسی لناڤا گوندێ مه، مروڤاتیا شه‌روی زۆر ئاسان بو مروڤی ناسكربا كو پێكهاتیبو بمن ژ رێز و ڤیان بو خه‌لكێ هه‌مه‌جور، ژیێن جودا، پله‌یێن جودایێن خواندنێ و ره‌وشا كومه‌لایه‌تی، من جاره‌كێ نه‌دیت بو كو دل ره‌قیه‌ك، گازنده یان نه‌ڤیانه‌ك هه‌مبه‌ر كه‌سه‌كی نیشان بده‌ت. بكێماسی ئه‌ز باسا خوه دكه‌ن دبه ئه‌ز هه‌ر سێ تا چوار جاران هاتبام كوردستانێ لێ من یه‌ك جار سه‌ره‌دانا وی كربا لێ دیسان برێز و گرنژین پێشوازیا من دكر و هیچ گازنده نه دكر.
شه‌رو كه‌سه‌ك خوه‌شتڤی بو ژ لایێ پرانیا شاگردێن خوه، زۆر هه‌ولددا كو هه‌می شاگردێن خوه به‌ره‌ف ره‌وشه‌نبیریه‌ك گشتی ببه‌ت. لدویف به‌شه‌ك ژ شاگردێن وی مامۆستا شه‌رو پتر وه‌ك هه‌ڤال دهاته ناسكرن ژ ماموستا، زۆر بو وان لسه‌ر بابه‌تێن جوراوجور دئاخفت، روله‌ك به‌رز هه‌بو د هشیاركرنا هه‌ستا نه‌ته‌ویدا، مروڤه‌ك بێترس و شه‌رمو د دیاركرنا دیتنا خوه‌یا سیكولاردا، به‌رده‌وام داخوازیا جوداكرنا ئولی ژ ده‌وله‌تێ دكر، مه‌ردانه به‌رسینگێ مه‌لایێن ده‌هول قوت و زرنابێژێن بابێ عوده‌ی دگرت، تا ره‌وش گه‌هشتی وێ یه‌كێ كو به‌شه‌ك ژ مه‌له‌یێن خوێریێن باژارێ دهوكێ قه‌تلێ وی حه‌لال كر دسالێن هه‌شتیا ژ سه‌دسالا بیستا، هه‌روه‌سا به‌شه‌كێ مه‌زن ژ مه‌لان داخوازا دادگه‌هكرنا ماموستا شه‌روی كرن لژێر ناڤێ دژاتیا وی بو ئولێ ئیسلامێ. لێ بموخابنیڤه دبێژین ئه‌و مه‌لێن دوستێن ده‌ستهه‌لاتێ وه‌ك ئه‌ڤرو باسا كوشتن و تالانكرنا خه‌لكێ كورد نه دكرن، باسا وێرانكرنا گوندا نه‌دكرن، لێ ماموستا شه‌رو بو خوه كرنه ئارمانج.
ده‌ست هه‌لاتدارێن ئه‌ڤرو ژی ده‌ما ماموستا شه‌رو دژی تالانی و بێ دادپه‌روه‌ریا وان هاتی ده‌نگ، مه‌له‌فێ به‌عسیاتیێ و خیانه‌تێ بو دوروست كرن و ملكه‌چكرن بشێوه‌ك كرێت لسه‌ر ته‌لڤزیونێ شانویا وان په‌سه‌ند كه‌ت و داخوازا لێ بورینێ ژ خه‌لكه‌كی بكه‌ت كو پشتی ده‌مه‌ك كورت پێشی ده‌بابێن سه‌دام كه‌فتین و هه‌ڤلێر داگیكرین. دبه هنده‌ك بێژن ئه‌و سه‌رده‌م چو، پێویست ناكه‌ت ئه‌م برینێن كه‌ڤن ڤه‌كولین، لێ ئه‌ز دبێژم وه‌ك هه‌رده‌م ئه‌م نابیت بیره‌وه‌ریا ژبیر بكه‌ین، ژبو یێن نه‌خوه‌ش بنبر بن و یێن خوه‌ش به‌رده‌وام بن.
من زۆر جاران گوتیه ژیان به‌فره و ناڤ چیایه، به‌فر دهه‌لیت لێ چیا دمینیت، ماموستا سه‌دیق شه‌رو پسمامێ بێ به‌ڤل سه‌ره‌رای هه‌ولدانا گه‌له‌ك ناڤپیسا ژبو كرێت كرن و پیسكرنا ناڤێ ته، ته ناڤه‌ك پر جوان ژبو مه هه‌میا لپاش خوه هێلا، كه‌له‌خێ ته ژناڤ مه باركر لێ جهێ ته دێ ڤالا مینیت و ناڤێ ته خه‌لكێ ته بئه‌ڤینا خوه دێ زندی هێلیت نه وه‌ك هنده‌كا دێ بخورتی لسه‌ر خه‌لكی سه‌پینن. سه‌رێ مه ساخ و گیانێ ته شاد شەرو.
