بیرا من دھێت ھێشتا ئەز زاروک بوم، دبیت نێزی ١٣ سالیێ بووم، باڤێ من ھەر تم وسا دگوو بێ حیجاب نەدەرکەڤن ژبەر خو پاراستنێ ژ چاڤێن دەردوورێن خۆ، من حیجاب ل بەرخو دکر و باوەریەکا تەمام من پێ ھەبوو کو دێ من ژ چاڤێن دەردورێن من پارێزیت، لێ ب راستی دبێژم دوو جارا پسمامێ من دخواست د رێیا ئەم د چوین ناڤ رەزی دا دەست درێژیێ ل سەر من بکەتن، و من خواست بکەمە ھەوار لێ نە حیجاب و نە بابێ من ئاگەھ ژ ھەوارا من نەبوو..
حیجابێ نەشیا من ب پارێزیت دەما ئەز ژ دبستانێ ڤەدگەریام و کومەکا کرێکاران د رێ دا فیت فیتا وان و گوتنێن وان یێن نە شرین، دەروونێ من ھەمی سەر ئێک و بنک کر.
حیجابێ نەشیا من و خیشکێن من ب پارێزیت دەما ئەز ١٤ سالی و خیشکێن من یێن ٩ و ١٢سالی بابێ من پشتی دایکا من ژ مال چوی، دەست درێژیا سێکسی لسەر مە کری، و ڕۆژێ ژ وی دەمی و ھەتا نوکە تیشکێن خۆ لسەر ژیانا مە راکرین و بویە تریک ستان.
حیجابێ نەشیا من ب پارێزیت دەما ئەز ل تەکسیێ سوار بویم و ئاژوتڤانی دەستێ خۆ ل جەستەیێ من دایی و نەگەھاندیم بنەجھا من ڤیایی..
ب تەمامیا ڤان سالان حیجابێ نەشیا د ڤان شەڤ و ڕۆژ و دبستان و ژور و بازار و کولانێن ڤی باژێر و لسەر ڤێ ئاخێ ب پارێزیت..
ھەست پێ دکەم کو بتنێ بەربەستەکە ب ناڤێ خوپاراستنێ دناڤا گەرم و سەرما و ھەناسێن بن دەست دا و وێ نەشیا ل ھەمبەر ڤێ من ب پارێزیت..
ب نێرینا من ژن دناڤا نیقاب-حیجاب.. بتنێ وەک ئیپراخەکێ لێ دھێت و دبیتە خوارنەک دلڤەکەر ژبۆ چاڤ برسیێن دەردوورێن خۆ..
ئارامی یان ئەولەویت تشتەک نینە پەیوەندی ب جل و بەرگان ڤە د جڤاکی دا پێک بینیت.
حیجاب بەربەستەک نەبوو کو مە ب پارێزیت دڤێت ل جھەکێ دی دا، د رێیەکا دی دا ل ئەولەویەتا خۆ بگەرین و ببینین..
(ھشیاری-زانابوون-ھێز)
من رێز ژبۆ ھەڤالێن خۆ یێن ب حیجاب ھەیە و ئەڤ نێرین و تەجروبەیێن راستەقینە یێن من و ژنێ ناسکرینە..
