ئسماعیل طاھا جانگیر
بادینیێ بـ پارێزن ئه‌گه‌ر
رۆژه‌ك دێ هێت ودێ لـ خو گه‌ڕن، دێ په‌شێمان بن وزارۆكێن هه‌وه دێ هزار نفره‌تان لـ هه‌وه كه‌ن، دێ بێژن ده‌مه‌كى شێوه‌زاره‌ك هه‌بوو دگۆتنێ بادینى، خه‌لك پێ دئاخفت وپه‌رتۆك پێ چاپ دببون وهنده‌ك ژوان یێن مۆزه‌خانه وپه‌رتۆكخانێن گشتیدا ماین هوین وه‌ك شینوار ببینن، زانست وهزر وگۆتار وهه‌لبه‌ست پێ دهاتنه نڤیسین، نڤیسه‌ر وخوانده‌ڤایێن خو هه‌بوون، ده‌مه‌كى ل خواندنگه‌هـ وزانكۆیان وانه پێدهاتنه نڤیسین وگۆتن و…
بادینى یه ماكا دێرین وڕه‌سه‌نا زمانێ كوردى، كاكلكا كورمانجیێ یه، ئه‌گه‌ر هوین باوه‌رنه‌كه‌ن پرسیار ژئه‌حمه‌دێ نالبه‌ند وجه‌گه‌ر خوین وسه‌برى بۆتانى وسادق بهائه‌ددینێ ئامێدى بكه‌ن، بێژنه مه‌لا خه‌لیلێ مشه‌ختى وبه‌كربه‌گێ ئه‌رزى ومه‌لا حوسێنێ مارونسى، پرسیارا شێخ مه‌مدوحێ بریفكى ودكتور نافع ئاكره‌یى ومه‌لا مه‌نسورێ گێرگاشى بكه‌ن، بێژنێ چ بوو هه‌وه ب بادینى دنڤیسى وبۆ هه‌وه كره په‌یره‌و، هه‌وه چه‌ند قوته شه‌ڕ سه‌را وێ كرینه وچ ئارمانج ل پشت نه‌هێلان وبراندنا وێ هه‌نه؟..
ده‌م ده‌مێ خزمه‌تكرنا شێوه‌زارانه هندى كوردان زمانه‌كێ هه‌ڤگرتى نه‌بیت، زمانێ هه‌ڤگرتى ژى نابیت چنكو خودانێن شێوه‌زارێن دى دزانن دێ ئه‌و زمانێ هه‌ڤگرتى بیت ده‌مێ ل سه‌ر كاكلكا كورمانجیێ دهێته ئاڤاكرن، ئه‌و دێ بیته نیڤشكێ زمانێ ئه‌گه‌ر رۆژه‌كێ چێبو وبۆ كه‌توار، بنه‌مایێ هه‌ر دێرین وڕه‌سه‌نێ ڤى زمانى مه‌ترسیه ل سه‌ر وان ول سه‌ر شێوه‌زارێن وان، له‌و جه‌نگا نه‌هێلان وژناڤبرنا وێ دهێته كرن.
ئه‌گه‌ر نه بۆ ئه‌ڤا دگه‌ل بادینیێ دهێته كرن دگه‌ل سۆرانییا سلێمانیێ ناهێته كرن، ئه‌و دێ زمانێ خو پارێزن وناهێلن كه‌س ده‌ست تێوه‌رده‌ن، ئه‌و پاسه‌وانن وناهێلن كه‌نالێن مه‌زن ومیدیا پرۆفیشنال بكه‌نه گێلما گاڤانى وه‌كى دگه‌ل مه وشێوه‌زارێ مه هاته كرن، رێكێ ناده‌ن ئه‌ڤ سه‌رپێچیا نوكه ل سه‌ر بادینیێ هه‌یى ل سه‌ر شێوه‌زارێ وان بهێته كرن وئه‌ڤه بۆ خویانى وبیانیان دیار وبه‌رچاڤه.
ڤان كه‌نالان بادینى كریه ئارمانج وجه‌ماوه‌ر ژى ژنه‌زانین وهه‌ستنه‌كرن ب مه‌ترسیا وێ ب دویڤكه‌فتینه ورێخوشكه‌رن ئارمانجێن وان بگه‌هنه مه‌به‌ستێ، هه‌ر په‌یڤه‌كا هه‌ژار ژجهه‌كى ئینا ودانا جهێ ئێكا ره‌سه‌ن، هوسا زمان هه‌مى دێ تووشى كزى ولاوازیێ بیت، ئه‌و په‌یڤێن دهێنه بكارئینان پتریا وان دبێ هێزن، بێ ڕامانن، یێن باش ژى لادان ب بهانا زمانێ نوى یێ میدیا كوردى، نه‌خو میدیایێ زمانێ مه گێره‌كر ودا بایى.
فه‌رهه‌نگ ورێزمانێن دكه‌ڤندا هاتینه نڤیسین دشێن بهایێ بادینێ به‌رچاڤ بكه‌ن وب سه‌لمینن كا چ شێ,ه‌زاره‌كێ مه‌زنێ زێرینه، چه‌ند شیایه ببیته بڕبڕا پشتا زمانێ كوردى وزمانێ مه ژهه‌ر شێوازره‌كێ دى پتر خو پتر تێدا دبینیت، له‌و دبێژمه هه‌وه بادینیێ ب پارێزن وه‌كى ستوینه‌كا خورت وكارا یا زمانێ كوردى وئه‌ڤه ئه‌ركه ل سه‌ر ملێن هه‌میان، زمانزانان، مامۆستایان، خوانده‌ڤا ونڤیسه‌ران، میدیاكار وره‌وشه‌نبیر وهونه‌رمه‌ندان.. والسلام.
