نێرین

تایبەتمەندیێن ڕەوشەنبیرەکێ کورد

سەردار هێتوتی

ڕەوشەنبیر تەخا هشیاری و ئاڤاکەرا جڤاکان، زیکا هەست ب هەر بویەرەکێ دکەن ئەڤجا ئەو بویەر چ سیاسی بیت یان ئابووری یان ژی جڤاکی بیت یان ژی پەیوەندار بیت ب ئاسایشا نەتەوەی و د ڤان بیاڤان دا گەلەک کەس هەنە کو ب کەد خۆ ئاڤاکرینە و شیاینە ببنە چاڤدێرێن بیاڤێن خۆ یێن تایبەتمەند.
ل ڤی وەڵاتێ دوو هەرێمی و چار پارێزگەهی و سێ حکومەتی و بێ پەرلەمانی زێدە کەس ب ناڤ ڕەوشەنبیر هاتینە ئاڤاکرن، کو چێکەرێن دەستێن پارت و گرۆپ و ڕێکخراوێن تایبەتن و هەر ئێک ژ وان ل گورەی حەز و بەرژەوەندا خۆ ڤان ڕەوشەنبیران د لڤلڤینیت و ب ڕێکا وان پەیاما خۆ دهاڤێژنە د ناڤا جڤاکی دا بێی کو ژ دەرئەنجامێن وێ یێن مەترسیدار ل سەر ئاسایشا نەتەوی یان یا جڤاکی بفکرن.
ڕەوشەنبیرێن چێکری ل هەمبەری کوژمەکێ دڕاڤی و ل سەر ملێن خەلکی و ب داهاتێ کوردستانێ هەر ئێک ژ وان ئەڤڕۆ بۆ خۆ بوینە قۆتابخانە و ل گور نێرینێن خۆ شڕۆڤا ڕەوشا کوردستان و دەڤەر و جیهانێ دکەن و ب ئەمرێ سەمیانێن خۆ ڤەدلڤن و هندی دشێن ڕەوشا نافخۆ تێک ددەن.
بەری ریفڕاندۆما 2017 یا باشوورێ کوردستانێ، ب بەردەوامی من چاڤدێریا کەسەکێ ب ناڤ هەلگرێ ناما دکتورایێ و شارەزایێ سیاسەتا دەرڤە دکر و تا نوکە ژی جار جار سەرەکی ل حسابا وی یا فەیسبۆکێ ددەم، ڤی زانایێ مەزن ژ مێژە وەرە پێشبینیا کاڤلکرنا بەغدا کربوو و پایتەخت دابەشی سێ هەرێمێن شیعی ل باشوور و سونی ل ڕۆژئاڤا و ل باکوور و ڕۆژهەڵات ژی جهێ دەسهەڵاتا ناڤەندی کربوو، وی ساڵا بووری ئیران ل سەر نەخشە نەهێلابوو، و بشار سیدارە دابوو، و ترکیا ژی ل پەیمانا ئەتلەسی ئێخسبوو ژ دەرڤە.
پسیار ئەڤە، ئایا ڤی ڕەوشەنبیری دزانی کانێ چ ژ ڤان نێرین و بوچوونێن وی نابن ڕاستی یان ژی وی ب تمامی باوەری ل سەر خۆ هەبوو؟ وێجا بلا بەرسڤ بۆ وی و هەڤ ئاوازێن وی بیت، دخازم تایبەتمەندیێن وان زەڵاڵ کەم، د ناخا خۆ دا کەسەکێ ئاڤاکریە، هەلگرێ باوەرنامەکا دزیێ یە، دیڤەلانکێ پشت پەردا عەشیرەتگەریێ یە، کەسەکێ لاوازە د ئاستێ زمانێ کوردی دا و زێدە پەیڤێن بیانی و ب تایبەت عەرەبی د گۆتنێن خو دا بکار دئینیت، نە ل ئاستێ گشت جڤاکیە بەلکو ژ وان بلندترە، ل دیوانا بەرپرسانە، هێشتا ناڤەندەکا ئەکادمی نەدیتیە و نزانیت کارێ وان چیە، شارەزایێ سیاسەت و دبلوماسیەت و ئابوور و نوژداریێ و ئەندازیاریێ یە و د هەمان دەمدا دەروونناسەکێ زێدە شەهرەزایە.
ئەڤەنە پشکەک ژ وان تایبەتمەندیان، لەورا ئەڤڕۆ هەر تشت هاتیە گۆهارتن و هەولێر د دەمەکی دا ترافیکا عیراقێ بوو، د نوکە دا ژ بەر شڕۆڤا ڤان شڕۆڤەکاران بەغدا ڕێکا دیدارێ ژی نادەتە بەرپرسن کورد.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close