چاند و هونه‌ر

ئاکرێ باژێرێ دیرۆك و جوانیێ

بێوارحسێن زێباری
ئاکرێ هه‌میشه‌ خودى تایبه‌تمه‌ندیێن خۆ یێن كه‌لتوورى و پێگه‌ها چاند و په‌یڤ و هونه‌رێ ره‌سه‌نێ گه‌لێ خۆ بوویه‌ و بدرێژاهى یا ویستگه‌هێن دیرۆكێ وارگه‌هێ ته‌بایێ و پێكڤه‌ژیانێ بوویه‌ كو ل ڤى وارگه‌هى گه‌له‌ك زانا و بلیمه‌ت و روناكبیران سه‌رهه‌لداینه‌ و خزمه‌ته‌ك مه‌زن ئاراسته‌ى پروسه‌یا چاندى و په‌یڤسازى و هونه‌رى یا گه‌لێ خۆ كرینه‌، یا هه‌ژى دیاركرنێ یه‌ كو دهه‌مى بیاڤ گه‌هێن ژیانێ دا باژێرێ ئاكرێ رۆلدار و پێشه‌نگ بوویه‌ نه‌مازه‌ دبیاڤێ رۆژنامه‌ڤانیێ دا ئاكرێ پێگه‌هێ خۆیێ به‌رچاڤ دپێڤاژۆیا رۆژنامه‌ڤانى یا كوردى دا هه‌بوویه‌ كو لسالا 1950 ئێكه‌م گاڤا رۆژنامه‌ڤانى ل ئاكرێ لسه‌ر ده‌ستێ نڤیسكار و رۆژنامه‌ڤان و شه‌هیدێ په‌یڤا ئازاد (شاكر فه‌تاح) هاته‌ هه‌لاندن ئه‌وژى ب وه‌شاندنا ئێكه‌م رۆژنامه‌ لژێر ناڤێ (ئاكرێ) كو دكارین بێژین كو ئێكه‌م گاڤا رۆژنامه‌ڤانه‌كێ بوو لسه‌ر ئاستێ بادینان، دوێ قۆناغا هه‌ستیاردا رۆژناما ئاكرێ شیا ڤالاتییه‌كا رۆژنامه‌ڤانى یا به‌رچاڤ پربكه‌ت و ببیته‌ به‌رێ بنیاتى بۆ پێڤاژۆیه‌كا رۆژنامه‌ڤانى یا كوردى ل باژێرێ ئاكرێ كو هه‌تا نوكه‌ بوویه‌ خودى گه‌له‌ك ویستگه‌ه و به‌رهه‌م و ده‌ستكه‌ڤتێن گرنگ و بالكێش، له‌وما من وه‌كه‌ رۆژنامه‌ڤانێ پویته‌دار بفه‌ر زانى وێ ئه‌زموونا درێژا رۆژنامه‌ڤانى كو گه‌له‌ك قوناغ ده‌ربازكرینه‌ پتر بده‌مه‌ ناسین و به‌رچاڤ بكه‌م و نه‌هێلم گه‌له‌ك ژ لایه‌نێن وێ ونداببن و جهێ خۆ د روپه‌لێن دیرۆكێ دا نه‌بینن، ئه‌ڤجا هه‌ر لسالا 2017ێ من ئه‌ڤ پروسه‌یه‌ ده‌ستپێكر و بدرێژاهى یا هن سالێن بوورى من هه‌ولدا هه‌مى ده‌رگه‌هان بقوتم داكو سه‌رهه‌لى وان هه‌مى قوناغان ببم یێن كو پێڤاژۆیا رۆژنامه‌ڤانیا كوردى ل ئاكرێ تێدا ده‌ربازبووى و وان داتا و پێزانین و دیكیومێنتان بده‌ست بێخم.
كو ئه‌ڤ كاره‌ ژى هند یێ هیسان نه‌بوو ژبه‌ركو دیكیومێنتكرنا ئه‌زموونه‌كا گرنگ مینا ئه‌زموونا رۆژنامه‌ڤانى ل باژێره‌كێ دێرین و پێشه‌نگ مینا باژێرێ ئاكرێ پێدڤى ب گه‌له‌ك گاڤ و شیان و هه‌ولایه‌، دڤێت بێژم ژى كو لگور شیان و سه‌ربوورا خۆیا رۆژنامه‌ڤانى سوپاس بۆ خودێ مه‌زن ئه‌ز شیام ڤى به‌رهه‌مى پێشكێشى په‌رتووكخانا گه‌لێ خۆ و باژێرێ خۆ بكه‌م و داخازا لێبورینێ ژى دكه‌م بۆ هه‌ر كێم و كاسییه‌كێ ، هیڤیدارم ئه‌ڤ به‌رهه‌مه‌ دئاستێ خزمه‌تێ و به‌رپرسیاریێ دابیت و ببیته‌ جهێ پویته‌دانێ.
تێزانین ئه‌ڤ به‌رهه‌مه‌ یی نڤیسەر و رۆژنامەڤان ، زێرەڤان تەمو یە ب هاریكارى و پشته‌ڤانیا رێزدار ( سه‌باح بیت الله ) هاتییه‌ ب چاپ گه‌هاندن كو‌ ژ 150 به‌رپه‌ران پێك دهێت، هه‌روه‌ها نڤیسكار ( كه‌مال ره‌مه‌زان ) كارێ پێداچوونا زمانى كار لسه‌ر كرییه‌ و كارێ دیزاینێ ژى ژبال دیزانینه‌ر ( ئازاد مسته‌فا ) كار لسه‌ركرییه‌ و ل ته‌هرانا پایته‌ختێ ئیرانێ هاتییه‌ چاپكرن و هه‌ژمارا سپاردنێ ژى ل په‌رتوكخانا به‌درخانیان ل دهوك هه‌ژمار پێ هاتیه‌دان

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close