سەردار هێتوتی
پرۆسا هەڵبژارتنان یا کو چ جاران ل ڤی وەڵاتی د دەم و گاڤا خۆ دا برێڤەنەجوی ژ بۆ خەلکی وەک قۆمارەکێ لێهاتیە کو هەردەم خەلک خوسارەت و کاربدەست د فایدەنە.
ل ساڵا 1992 کو بۆ جارا ئێکێ هەڵبژارتنێن پەرلەمانی ل هەرێما کوردستانێ بڕێڤە چووی، خەلکێ رەپ و ریت، یێ ژار و بەلەنگار، خەلکێ ئاوارە و بێ پارە د ڕۆژا دیارکریدا ددەنە ڕێ بەرەڤ سندوقێن دەنگدانێ، هند ژ وان ل وەڵاتێ ئیرانێ چ ب ڕێکێن فەرمی بن یان ژی ب قەچاخ بن دهێنە هەرێمێ، گەلەک ژ گەلێ مەیێ ل ئەوروپا ژ بەر حەزا وان یا پشکداریێ د وێ ڕۆژێ دا هیڤی دخاستن چ جاران ئەڤ ڕێکا وەغەرێ نەببا بەهرا وان، ئەڤێن وی سەردەمی ل باشوور هیڤی بۆ پاشەڕۆژێ دارشتبوون، ڤی گەلی ب وێ نیەتێ دەنگ دا داکو ئەو ببن سەرکەفتیێن ئێکێ و بشێن دەستهەڵاتێ لگورەی بەرژەوەندا خۆ و پاراستنا کیانێ کوردی و بەرژەوەندا نەتەوی بگوهرن، وان دخاست گەل د ڕێزا ئێکێ دا بیت، ماف هەمی دابینکری بن، ساخلەمی و پەروەردە و ڕێک و پر دئاڤا بن، کار هەبیت و بێ کار ل ڤی وەڵاتی نەبن، موچە ئارمانجا وان نەبوو لێ چاڤەرێ پێدانا مافان بوون. بەس مخابن د ئێکەم هەڵبژارتن و هەتا دووماهی هەڵبژارتن چ ژ وان حەزێن بەلەنگازان بجهـ نەهاتن چونکی دەسهەڵات د بەرژەوەندا تەخا سەردەست و خۆفروش و دیڤەلانکاندا بوو، جاشێن دهی بونە خۆدانێن هەمی تشتین ئەڤڕۆ، عەردێ وەڵاتی ژێر ب ژێر ب ڕێکەفتن هاتە فڕۆتن و سەروەتا وەڵاتی نەکەفتنە د خزمەتا گشتی دا. گوند هەر ب خرابی و کاڤل مانەڤە، کارەب چ جاران نەبوو یا شەڤ و ڕۆژی، ساخلەمی بوو بازرگانی و پەروەرد بۆ هەڵوەریانا سیستەمی، دگەل ڤان هەمی نەدادیان ئەڤڕۆ ژی جارەکا دیتر گەل یێ ل ژڤانا سەرکەفتنێ د ناڤا قۆمارەکا ب ناڤ هەڵبژارتن دا و یێ د وێ هزرێ دا ئەلندا حەزێن خۆ ببینن و بشێن ببنە خۆدانێن خۆ لێ ئەڤا ل کوردستانێ دمەشیت قۆمارا ژیانێ یە و هەردەم گەل دێ یێ خوسارەت بیت.
