سەردار هێتوتی
وان دخاست ب پەردێ خۆ یێ ڕەش، ب عەقلێ خۆ یێ تاری، ب باوەرا خۆ یا کەڤنە پەرەست، هەبوون و ڕەسەناتیا مە ژ ناڤ ببەن، دخاست یا مای ژ راستیا مە تێکەلی تاری پەرێسیا خۆ بکەن، مێرێ کورد نەهێلن و کچ و ژنێن کورد ل خۆ مارە بکەن، د وێ خەیالێ دا بوون کورد دێ ب ئەنفالەکا نوی ب تمامی ژ ناڤچن، لێ هەمی خەیالێن وان مانە ل سەر پشتا حێشترا برسی و نەگەهشتنێ و ناگەهنێ.
ئێزدیێن ڕەسەن، ئەوێن ب پەیڤێن زمانەکێ خۆدان هەبوونەکا هزاری سالی پەرەستنا یەزدانێ خۆ دکەن، ئەون راستیا ڕەسەناتیا مە یا کوردی ل ڤێ دەڤەرێ و لالش ژی باشترین نموونەیە.
چەکدارێن دەوڵەتا ئیسلامی ل عیراقێ و شامێ، هەلگرێن باشترین چەکێ دنیایی، هەبوونا ئەندامان ل سەرانسەری جیهانا ئیسلامێ و ب تایبەت سونەیێن عیراق و سوریێ دەما هێڕشی شنگالی کری وان مەرەم پێ داگیرکرنا چەند دونەمێن عەردی نەبوون، یان ژی وان نەدخاست خانیێن ئاخێ یێن خەلکی خراب بکەن چونکی چ خزینە و دراڤ د ناڤا دیوارێن وان پەلشخە خانیان دا نەبوون، لێ ب تنێ وان مەرەم پێ نەهێلانا ڕەسەناتیا گەلێ مە بوو کو ئەڤ ڕەسەنیە خۆ د ناڤا ئێزدیاتیا کوردان دا دبینیت، وان دخاست پەرەستنا ب کوردی نەمینیت چونکی ل ڤێ دەڤەرێ ژ بلی عەرەبی تاکە گەل یێن کو هێشتا ل سەر باوەرا خۆ و ب زمانێ خۆ پەرەستنا خودایێ خۆ دکەن کوردێن ئێزدینە و وان دخاست ژنێن جوانێن کورد ببن کەنیزێن وان چونکی ژ دیر زەمان و د گەل هەبوونا وان ئەڤە کار و پیشەیا وان بوو، لێ وان ژ بیر کربوو کورد چیانە و چیا د جهێ خۆدا نالڤیت و دگەل 73 فەرمانێن بەرێ ئێزدی ب ڕەسەنی مانە و دێ هەر ل سەر ڕەسەناتیا خۆ مینن.
دگەل کو تا ئەڤڕۆ ژی گەلەک ژ کچێن مە د دەستێ دیڤەلانکێن تاریێ دانە و هێشتا چارەنڤیسا وان نە یا دیارە، لێ دڤێت کاربدەست و چاڵاکێن کورد ل ئەوروپا بشێن ب هاریکاریا حکومەتا هەرێما کوردستانێ دوسیا کچێن ئێزدی ل سەر ئاستێ جیهانێ ب جینوساید ب ناڤ بکەن و بکەرێن وێ کریارێ بکەڤن بەر پێلێن دادگەهێ و گەلێ مە یێ ئێزدی ژی بگەهن مافێن خۆ.
