ئارام تیگران ھونەرمەندەکی ئەرمەنی یە کو ب کوردی و ئەرمەنی ستران گوتینە، د سالا ١٩٣٤ دا ل باژارێ قامشلۆ (بنخەتێ) ھاتیە دونیایێ، د رۆژا ٨ێ تەباخا ٢٠٠٩ دا ل ئاسینایێ پایتەختا یۆنانێ وەغەرا داویێ کر.
ئارام کورێ تیگران مەلیکیان د سالا ١٩٣٤ د ل قامیشلۆ د ناڤا مالباتەکا ھەژار د ھاتیە دونیایێ. کارێ خوەیێ ھونەری ب ئەڤینەک تژی جوش و خوەشی ژ تەمەنێ ١٨ سالیێ د ناڤا دەوات و شاھیێن کورد و ئەرمەنیان دا دەستپێکر، بابێ وی د کارێ ستران گۆتنێ دا پر ئەو ھاندا کو ریا ھونەرێ بدۆمینە. سالا ١٩٦٦ ب مالباتا خوە را چووینە ئەرمەنستانێ و ھەیا سالا ١٩٨٥ د رادیۆیا ئێریڤانێ دە مینا خەباتکارەکێ خەبتی.
ئارام تگران، سالا ١٩٦٦ ب ھەڤکاریا خەلیل مورادۆڤ کو بەرپرسیارێن پارا کوردییا رادیۆیێ بوون، ب ئاوایەکی بەرفرەھ دەست ب کارێ خوەیێ سترانبێژیێ کر، ئارام ئەڤیندارێ ستران و ئاوازێن کوردی ب ھەڤکاریا جەمیلا جەلیل و کەرەمێ سەیاد بوو و کەتە ناڤا دەریایا سترانێن کوردی و ب مەلەڤانتیا د ناڤا ڤێ دەریایا بێبن دە بوو ھۆستا و شەھرەزایەکێ پسپۆر.
ئاواز و ھەلبەستێن وی ژ ناڤا دلێ جڤاتا کوردان دەرکەتنە، مینا سترانا “بلبلۆ، کەچێ ژ بۆنا تە ئەز دینم، ھەی لۆ لۆ دەلال، شەڤ چوو،چیایێ گابارێ، زیلان، دچم-دچم، ب ھەسرەتا ئێریڤانێ، چل-چل کەزی، ئەی وەلاتۆ ئەم ھەلیان، ئەلماسا من ژ دەرسێ تێ، ئاخ دێ و باڤێ مە” و ب دەھان سترانێن دن ب ریا ئارام دیگران کەتن سەر زمانێ گەل و ژ کوردان را بوون سامانەک نەتەوی کو د ناڤا رووپەلێن دیرۆکا ھونەرێ دا نایێن وەندا کرن.
د سالا ١٩٩٠ دا وەک پەنابەر بۆ ئەورۆپایێ چوو. د رۆژا ٨ێ تەباخا ٢٠٠٩ دا ل ئاسینایێ پایتەختا یۆنانێ وەغەرا داویێ کر.
