ل سەرانسەری جیهانێ و هەمی ولاتێن دونیایێ دەما کەسەک دبیتە فەرمانبەرێ حکومەتێ د هەمبەر دا مووچە پێدهێتەدان وەکی د یەکەم رۆژ دا بۆ هاتیە دیارکرن، لدیف پیڤەرێن نێڤدەولەتی پێدڤیە دەمژمێرێن کارکرنێ ژ ٨ دەمژمێران زێدەتر نەبن، هەر ٣٠ رۆژان جارەکێ مووچە پێ بهیتەدان، ژبلی حکومەتێن دکتاتور، بۆ چ حکومەتەکێ نینە بێ رازیبوونا خەلکی و ب ئاوایەکێ ئیجباری مووچەیێن فەرمانبەرێن خۆ پاشکەفت بکەن، ژبەرکو ئەو ولاتێن سیستەمێ پاشکەفتی پەیرەو دکەن ب ئاوایەکێ ئارەزومەندانەیە و هەر کەسەک پشکەکا داهاتێ خۆ بۆ سێکتەرەکێ خزمەتگوزاریان دابین دکەت مینا ساخلەمی و پەروەردە.. د دەمێن پێدڤی دا ئەو سێکتەر بێبەرمبەر دێ خزمەتا وان کەت، لێ هەرێمێ زێدەباری پاشکەفتێ ب ئیجباری و بێی هەبوونا خزمەتگوزاریان لهەمبەر وی پارەی، دیف دا نیڤ مووچە و روبع مووچە بسەر وان دا پارڤەکرن و چ فەرمانبەرەک نزانیت دێ پاشکەفتێ وی ڤەگەریت یان نە، پشتی ڤێ هەمیێ ژی جارەکا دی مووچەیێ فەرمانبەران بهێتە بڕین و ناهێنە ڤەگەراندن، دگەل ڤان پێنگاڤێن لسەری هەمیان حکومەت چ لێخوشبوونان دگەل وەلاتیان نەکەت، ئەڤە ژی کارەکێ نەرەوایە.
زێدەباری ڤێ هەمیێ د دەما دابەشکرنا مووچەیان دا، چەند رۆژان وەزارەتا دارایی خشتەکێ بۆ دابەشکرنا مووچەیی بەرهەڤدکەت، کو کابینا نەهێ یا حکومەتا هەرێمێ ژ ٢٣ وەزارەتان و پێنج دەستەیان و سەروکاتی و چەند دیوانان پێکدهێت، ئەگەر هەر روژەکێ مووچە ب وەزارەتەک و دەستەیەکێ بهێتەدان، واتە نزیکی مەهەکێ دێ دابەشکرنا مووچەی ڤەکێشیت، واتە هەیا مووچێ مەهەکێ دهێتەدان مەهەکا دی ب خشتەی و دابەشکرنێ ڤە دچیت، ئەگەر ب ڤی ئاوایی بیت، جارەکا دی سال لدیف خشتێ حکومەتا هەرێمێ دێ ب شەش مەهـ هێتە هەژمارتن، ئەگەر مەرەم بڤی کاری نەدروستبوونا قەرەبالغێ بیت ژبەر هەبوونا ڤایروسێ کۆرونایێ، بەری کۆرۆنایێ ژی هەر ب هەما ئاوایێ نها مووچە هاتینە دابەشکرن.
تشتێ هەری سەیر ئەوە حکومەتا هەرێمێ دەمەکێ درێژ بەحس لسەر چاکسازیێ دکەت و پشتی دەربازبوونا نزیکی سالەکێ ژ ڤێ کابینێ نەک هەر بتنێ حکومەتا هەرێمێ چ نەکریە، بەلکی مووچەیێ فەرمانبەران ژی بڕینە، نەکارینە مووچەی د دەمێ خو دا دابەش بکەن، ئەگەر هوون نەکارن چاکسازیێ د خشتەیێ مووچەی دا بکەن و د ٣ رۆژان دا هەمی مووچان دابەش بکەن، چاوا هوونێ بکاربن جاکسازیێن دی بکەن؟ خشتە چ بێ رامانیەکە هەوە داهێنایی؟ تشتێ هەری مەزن ئەوە خەلکی باوەری ب دەستهەلات و دەستهەلاتدارێن هەرێمێ نەمایە، و رەهەندێن نیشتیمانی هاتینە لاوازکرن، دەما رەوش بڤی ئاوایی بیت، خەلک ژی خەما دەستهەلاتێ ناخوت، دەما خەلک گەهشتە ڤی ئاستی ژی دێ بیتە هەڤدژێ دەستهەلاتێ و هەر دەما دەرفەت بۆ هەبیت دێ تولا خۆ هەلینن.
میر نێروەی
