رێکـخراوێن جـڤاکێ سـڤیل ئـازادی پێـش بودجـەی دڤـێن
ئازادی بنچینە و بنیاتە بو هەر رێکخراوەکا چالاک و بەرهەمدار ،ژبەرکو ئازادی بو چالاکڤان و رێکخراوێن جڤاکێ سڤیل نیخوازی و گەشەپێدانە،و دابینکڕنا ئازادیێ ئەرکێ حکومەتیێە و مافێ چالاکڤان و رێکخراوێن جڤاکێ سڤیلە ، و ئەڤە داخازیەک نینە بەلکو ئازادی مافەکێ سەرەکی و دومدرێژە هەمی هاولاتیانە بگشتی بو هندێ گوزارشتێ ژ ماف و ئازادیێن خو بکەن،کا چاوا د یاسا رێکخراوێن جڤاکێ سڤیل دا هاتی دامەزراندنا رێکخراوێ مافەکێ دەستوریە و نابیت هێچ ئاستەنگیەک ژ دەرڤەی مەرجێن یاسایێ بو دامەزراندنا رێکخراوێن جڤاکێ سڤیل بهێنە دروست کڕن ، کەواتە پشتی دامەزراندنێ ژی دڤێت حکومەت هەمان یاسایێ پەیرەو بکەت ب پشگیریا مادی و معنوی و ئازادیەکا رەها بو ئەنجامدانا هەر چالاکیەکا رێکخستی لگورەی یاسا و وپرەنسیپێن کارێ مەدەنی رێک پێ بهێتە دان ،ودڤێت بو دەستخستنا هەر زانیاریەکا پێدڤی ژبو بەرژەوەندیا گشتی بو هەر رێکخراوەکێ لایەنێ پەیوەندیدار پشتەڤانی و رێکخوشیێ لێ رێکخراوان بگشتی بکەت ،ژبەرکو رێکخراوا چالاک سونبولا حکومەتا دیموکراتە، و پێدڤیە حکومەت گرنگیێ ب چالاکیێن رێکخراوان بدەن و رولێ وان بەرز بنەرخینن ، ژبەرکو رێکخراوێن جڤاکێ سڤیل فاکتەرەکێ ب هێزن ژبو دابینکرنا ژینگەها ئازاد ل سەر بنیات وپرەنسیپیٚن ماف و کەراماتا مروڤی و چەسپاندنا دەستهەلاتا یاسایی و دیموکراسی ، وریزگرتن ل ئازادیا تاکە کەسی و پاراستنا ئاسایشا جڤاکی و رێزگرتن ل رەنگ و رەگەز و ئایدلوژیان ،دیسان چالاکڤان و رێکخراوان رولەکێ گرنگ دگێرێن ژبو هشیاری و رەوشەنبیریا جڤاکەکێ شارستانی ،تایبەت ژبو پێشکەفتن و گەشەپێدانا گەل ونێشتمانی، وپشتگیریا پێکڤەژیانێ دناڤا پێکهاتەیێن جڤاکیدا دکەن ، و پشتەڤانیێ ل گەنجێن خودان ئەزمون و ژێهاتی دکەن، کو تیدا گەنج ب ئیرادەیەکا ئازاد و ب پەروەردەکا مەدەنی بهینە فیٚرکرن ، داکو هەمی تەخ و چینیٚن جڤاکی ئەڤێ رەوشەنبیریا ساخلەم پەیرەو بکەن ، و بکەنە دروشم و پەیام بو دەستهەلاتدران بو هێندێ دادپەروەریا کومەلایەتی بهیتە بەرقەرار کرن، کو تێدا چڤاک هەست ب یەکسانی و دادپەروەریێ بکەت ،دگەل هندێ دام ودەزگەهێن حکومی ژی دێ شێن مفای ژ شیان و چالاکیێن رێکخراوان وەربگرن بریا ئەنجامدانا پروژێن هەڤبەش ، رێکخراو دەستەیەکا سەربەخویە و ناکەڤیتە لبن کاریگەری وهەژمونا چ کەس ولایەنەکێ بو ڤەشارتن و بەرزەکرنا هەر زانیاریەکێ ،
چ دەستهەلاتەک ژی نەشێت رێکخراوان نەچار بکەت لدیف حەز وداخازیان وان کار و چالاکیان ئەنجام بدەت ، بەلکو ئێک ژ ئارمانجێن هەرە گرنگ یێن رێکخراوێن جڤاکێ سڤیل ئەوە چاڤدێرەکێ کارا بن ژبو هەمی ئەو دەزگەهـ و ناڤەندێن گشتی چ حکومی یان سیاسی وئابوری و کومەلایەتی و بازرگانی هتد… کو بەرژەوەندیا خەلکێ لنک وان بیت ،
لێ سەرەرای نەدان و راگرتنا بودجەیا رێکخراوێن جڤاکێ سڤیل کو ئەڤە بو پتر ژ 5 سالانە ئەو بودجە ژ لایێ فەرمانگەها رێکخراوێن ناحکومی ڤە نەهاتێە دان ب بهانەیا کریزا ئابوری، لێ هەر بەشەک ژ چالاکڤانێن خوبەخش و رێکخراوێن هەست بەرز ، بەردەوامن لسەر کار و چالاکیێن خو، لێ ژبەر نەبونا ئازادیەکا رەها و هەژمونا حزبی لسەر رێکخراوان ، ئەو نەشیانە وەکا پێدڤی لدیف حەز و داخازی ومافێن خەلکێ بهێنە دەنگ و خزمەتا تەخ و چینن جڤاکی بکەن ، لەو پێدڤیا رێکخراوان ئازادیەکا رەهایە کو ئەو ئازادی ببیتە ئەگەرێ گهورینا سیستەمێ ژیانێ کو ئەم تێدا وەک چالاکڤان وێرەکیا گوتن و رەخنە گرتنێ و چالاکیان هەبیتن ،
دیسان گرنگیا ئازادیێ بو رێکخراوان گرنگیا ئاڤێ بو ماسی یە ژبەرکو ئەگەر بودجە پێش ئازادیێ کەفت دبیت گەلەک ژ ئەوان رێکخراوێن دیڤەلانک و سیبەر هەمان میتود سیستەمێ حزبان پەیرەو بکەن، و ئەڤە دبیتە ئەگەرێ جێبەبەجێکڕنا فەرمان و بریار و رازیکڕنا وێ حزبێ نەک خەلک و جادە و جەماوری بگشتی ، لەو پێدڤیە ئەم گەنجەکی ئازاد بدامەزرینین داکو ئەوی گەنجی بکەینە بنیانێ وەلاتەکێ ئازاد ، داکو تاکێن جڤاکێ هەست بە ئازادبونا خۆ بکەن کو ئەو ئازادی ببیتە رەنگڤەدانا دەربرین گوتن و کریارێن وان..
