د. شه‌عبان مزوری
به‌ری دو هه‌فیتیا لسه‌ر په‌یجێ خوه لفه‌یسبوكێ من داخوازا لدارخستنا كونگره‌ك بو كوردێن باشور لده‌رڤه‌ی وه‌لات كر، هه‌یا ناڤێ كونگرێ ژی من پێشنیاركر ( باشورێ كوردستانێ گرفت و چاره‌سه‌ری ). ئه‌ڤ پێشنیاره ژ باوه‌ریه‌كا منا بێگومان هاتیه كو ره‌وشا خه‌لكێ مه لباشورێ كوردستانێ گه‌هشتیه پلا هه‌را ئالوز ژ هه‌می لایێن كومه‌لاتی، ئابوری و رێڤه‌به‌ری، له‌وما لێگه‌ریان ژبو قورتال بون ژ ڤێ ره‌وشێ بكێمترین زیان ئه‌ركه بمن لسه‌ر ملێ هه‌ر تاكه كه‌سه‌كێ كوردێ باشور.
بباوه‌ریا من دڤێت ئه‌م ژوێ قوناغێ ده‌ركه‌ڤین كو ته‌نیا و ته‌نها ره‌خنا بگرین و كێماسیا ده‌ستنیشان كین، وه‌ك بكوردی دبێژن كون ژ پاته‌ی ماستر لێهاتیه له‌وما تا ئاسته‌كێ به‌رز خه‌لك ڤان كێموكاسیا ناسدكه‌ت و هه‌ست پێدكه‌ت. بێگومان ده‌ست دانان لسه‌ر برینان نیڤه‌كا رێكێ یه لێ بێ چاره‌سه‌ری ئه‌ڤ برینه ساخنابن، په‌یداكرنا رێچاره‌سه‌ریا زۆر گرنگه. ئه‌گه‌ر ملله‌تێ ئه‌لمانیا پشتی شه‌رێ دویه‌مینێ جیهانێ دابه‌شببان لسه‌ر لایه‌نگر و دژبه‌رێن هێتله‌ر و روژانه گه‌نگه‌شه كربان لسه‌ر وێ یه‌كێ كانێ هێتله‌ر شاشبو یان دوروست بو، ئه‌لمانیا هیچ ده‌م نه رادبو سه‌رپیا پشتی شه‌رێ دویه‌مینێ جیهانێ.
كه‌سێن وه‌لاتپه‌روه‌ر و مروڤ دوست پرانیا ده‌مێ خوه مژویلی په‌یداكرنا رێچاره‌سه‌ریانه ژ بو گرێفتاریێن تێن پێش، ژڤێ پێگه‌هێ ئه‌ز دوباره لڤێره بانگه‌وازی ته‌ڤایا خه‌لكێ باشورێ كوردستانێ دكه‌م، ئه‌وێن بهیچ ره‌نگه‌كی تێكه‌لی ڤێ ده‌ستهه‌لاتا شكه‌ستیخوار نه‌بوین، كار بكه‌ن ژبو ڤی كونگره‌ی بپێشنیارێن زه‌لال ژبو هه‌می گرفتا. وه‌ك من پێشنیاركری ئه‌گه‌ر ئه‌ڤ كونگره سه‌ربگریت دڤێت كونگره‌ك دن ل هه‌ولێر بێتا دارخستن ببه‌شداریا هه‌ركه‌سێ بخوازه ته‌نها به‌شدار نه‌بیت دڤێ ده‌ستهه‌لاتا هه‌ی ڤان ٢٩ سالا.
ئه‌ز بپێویست دبینم لڤێره كو بچه‌ند رۆژا پشتی پێشنیارا من مه‌لا به‌ختیار ئه‌ندامێ به‌رێ یێ مه‌كته‌ب سیاسیا یه‌نه‌كێ دنڤیسه‌ك خوه‌دا و پاشان د سمیناره‌ك خوه‌دا پێشنیارا كونگره‌كی كر ژبو قورتال كرنا باشور ژڤێ ره‌وشا هه‌ی ئه‌ڤرو. لڤێره من نه‌ڤێت بێژم كو مه‌لا به‌ختیار پێشنیارا من دیت یه له‌وما وی ژی ئه‌ڤ پێسنیاره كر. لڤێره بو من گرنگه هه‌می كه‌س بزانیت و زۆر هشیار سه‌ره‌ده‌ریا لگه‌ل هه‌ر پێشنیاره‌كێ بكه‌تن.
بمن نه مه‌لا به‌ختیار كو كه‌سه‌ك خوه‌دان پوسته‌ك بریارده‌ر بویه ل ژیانا سیاسیا باشور و نه‌ژی هه‌می هه‌ڤالێن ژ هێزێن جودایێن به‌شداری ده‌ستهه‌لاتا باشور بوین و به‌شه‌ك بوینه ژڤێ وێرانیا ئه‌ڤرو ئه‌م گه‌هشتینێ، نه‌ك خوه‌دان چاره‌سه‌ری نینن به‌لكو هه‌بونا وان گرفتاریه. مه‌لا به‌ختیار بانگ لهه‌مان كه‌سان دكه یێن ٢٩ ساله رێڤه‌به‌ریا ڤی خه‌لكی دكه‌ن و ژكوچكی هاڤێتین ته‌رینێ، كو كومببن ژبو مه ژ گرفتێن هه‌ین رزگاركه‌ن. لڤێ پرسه‌ك بو مه‌لا به‌ختیار و به‌ختیاران ٢٩ ساله كێ رێ لوه‌گرتبو هون بو یه‌ك رۆژ پێداچونه‌ك بخوه‌دا بكه‌ن، یه‌ك جار بێژن لكاره‌كی هون شاشبون، یه‌ك جار بێژن فلان كه‌س بناڤ و نیشان تالانچیه، گه‌نده‌له، دزه، زۆرداره؟؟؟؟؟؟ لێ ئه‌ز بانگ لخه‌لكێ باشور دكه‌م ئه‌وێن خوه‌دی دونیابینی ژبو هاریكاربن دو باره دبێژم بكێمترین زیان ژڤێ ره‌وشێ ده‌ركه‌ڤین، چونكه چه‌ندی گیرو بین دێ زیان ماستر بیت.
بكورتی و بكوردی ده‌ما ته سازی نه‌بن دێ چاكیێ د چدا كی؟؟؟؟؟؟؟؟
