نێرین

مروڤ و وه‌ك مروڤ ب زكی ناسكه‌

مروڤ و وه‌ك مروڤ بزكی ناسكه‌
د. شه‌عبان مزوری
ده‌ما ئه‌ز وه‌ك كورده‌ ته‌ماشای مێژویا به‌رخوه‌دانا كوردا دكه‌م، بێگومان پره‌ ژ قوربانی، بسه‌دان هه‌زارا كورد ئه‌گه‌ر نه‌ بملیونا خوه‌ كرنه‌ قوبانی كو لسه‌ر خاكا خوه‌ ئازاد و به‌خته‌وه‌ر بژین. مێژویا گه‌لێ كورد پره‌ ژ به‌رخوه‌دانا هه‌مبه‌ر داگیركه‌را. هه‌لبه‌ت هه‌می به‌رخوه‌دانژی بڤی ره‌نگی یان ره‌نگه‌ك دی رێكخستی بوینه‌ و رێبه‌رێن خوه‌ هه‌بوینه‌. ئه‌گه‌ر نه‌ لڤان هه‌می به‌رخوه‌دانا لێ پرانیا وان ژماره‌ك زۆر ژ گه‌لێ مه‌ كه‌فتیه‌ ناڤ زیندانێن داگیركه‌را و دپرانیا جاران دا كار و خه‌باتا كه‌سێن لبه‌رخوه‌داین ل زیندانێ بدوماهی هاتیه‌. لڤێره‌ من دڤێت بێژم ئه‌و مێژویا كوردیا من خوه‌ندی و گوهداری لێ كری به‌ری هاتنا پارتیا كاركه‌رێن كوردستانێ لباكورێ وه‌لات په‌یڤا گره‌ڤا برسیبونێ لناڤا كوردا من نه‌ بهیستیه‌. لڤێره‌ براستی من نه‌ڤێت ئه‌ز لسه‌ر مێژویا گره‌ڤا برسیبونێ بكه‌م و نمونا بینم خوار چونكه‌ ئه‌ڤه‌ كاتره‌ك ئاسانه‌ بو هه‌ركه‌سی ڤان پێزانینا بو خوه‌ په‌یداكه‌ت برێكا گۆگلێ.
كه‌فتنا گره‌ڤا برسیبونێ شێوه‌كێ كه‌ڤنارێ به‌رخوه‌دانێ یه‌ به‌ری دایكبونا عیسا پێغه‌مبه‌ر. ئه‌ڤه‌ به‌رخوه‌دانه‌كه‌‌ دور ژ توندوتیژی، كه‌سێن به‌شدار بڤی كاری پرۆتێستا خوه‌یا پۆلیتیكی نیشان دده‌ن هه‌مبه‌ر كه‌سێن ده‌ستهه‌لاتدار ژبو بگه‌هن ئارمانجێن خوه‌ دگوهارتنا ره‌وشا هه‌ی و ژ لایه‌كێ دیڤه‌ بشێن بالا خه‌لكێ دن یێ كو دهه‌مان ره‌وشا دژیت بكێشن سه‌ر داخواز و ئارمانجێن خوه‌ و هه‌ستا تاوانێ لده‌ف خه‌لكێ په‌یداكه‌ن هه‌مبه‌ر بێ ده‌نگیا وان. پرانیا جاران ئه‌ڤ چالاكیه‌ بدارێ زۆرێ بدوماهیك هاتینه‌ ژ لایێ ده‌ستهه‌لاتدارانڤه‌.
پشتی هاتنا جونتا له‌شكه‌ری بو ده‌ستهه‌لاتێ لسالا ١٩٨٠ زیندان هاتن داگرتن لتوركیا بكوردێن گرێدای رێكخسنێن جودا. بهه‌زاران كورد كه‌فتێن زیندانێن ده‌وله‌تا تورك، ئارمانجا وان وه‌ك هه‌رده‌م هێزا به‌رخوه‌دانێ لناڤ زیندانێ بكوژن و بڤی ئاوای خه‌لكێ بێ ئومێد بكه‌ن. هه‌مبه‌ر ڤی پلانی هه‌ڤبیر و ئه‌ندامێن په‌كه‌كێ بو یه‌كه‌مین جار لدویف پێزانینێن من، زیندان ژ جهێ كوشتنا هه‌ست و كارێ به‌رخوه‌دانێ، كره‌ بیڤا به‌رخوه‌دانێ، لڤێره‌ من نه‌ڤێت ناڤێ هنده‌ك كه‌سا بینم، چونكه‌ ئه‌ز كه‌سێ ژ كه‌سێ ماستر نابینم، هه‌می بهه‌ڤرا خوه‌دانێ گوتنا به‌رخوه‌دان ژیانه‌ كو هه‌یا ئه‌ڤرو ل زۆر قادێن خه‌باتێ ژ لایێ قه‌هره‌مانێن مه‌ تێ گوتن.
هه‌ر ژ سه‌رده‌ما جونتا له‌شكه‌ری ل توركی هه‌یا رۆژا ئه‌ڤرو ئه‌ندام و لایه‌نگرێن په‌كه‌كێ بسه‌دان جارا گره‌ڤا برسیبونێ راگه‌هاندیه‌ ببێسداریا گه‌له‌ك مروڤان هنده‌ك جاران و جارناژی هه‌بویه‌ ته‌نها یه‌ك كه‌س بڤی كاری رابویه‌. ئه‌و ژێده‌رێن من خواندین وه‌سا نیشان دده‌ كو بدرێژیا مێژویێ رێكخستنه‌ك نه‌بویه‌ وه‌ك په‌كه‌كێ نه‌ ب هژمارا جارێن گره‌ڤا برسیبونێ و نه‌ك بهه‌ژمارا كه‌سێن به‌شداری كری هه‌بوینه‌، چونكه‌ په‌كه‌كه‌ ژی رێكخستنه‌ك كوردیه‌، واته‌ كورد یه‌كه‌م نه‌ته‌وه‌یه‌ لسه‌ر رویێ زه‌مینی بگره‌ڤا برسیبونێ، كو ئه‌وژی هه‌می په‌كه‌كه‌ و لایه‌نگرێن په‌كه‌كێ نه‌.
مروڤ ئازادیا خوه‌ دڤێت لپێشیا هه‌می تشته‌كی ببینه‌، زك نه‌جامێرترین هه‌ڤاله‌ چونكه‌ هه‌رچی تو بكه‌یێ پشتی كێمتره‌ ژ شه‌ش ده‌مژمێرا ژبیردكه‌ت له‌وما نه‌هه‌ژی وێ یه‌كێ یه‌ كو مروڤ بو خوه‌ بكه‌ت خه‌م و هه‌می قوبانیه‌كێ بده‌ی ژبو وی زكی شادكه‌ی؟
گه‌هشتنا نوچا مرنا كچا كوردا قه‌هره‌مان ئابرو تیمتیك پشتی ٢٣٨ رۆژا لبه‌روه‌داخێ د گره‌ڤا برسیبونێ دا ئه‌ز هه‌می جانگوریێن كوردستانێ ببیرتینم و به‌ژنا خوه‌ لبه‌ر وان دچه‌مینم، دبێژم هون روناهیا مه‌نه‌ لێ موخابن ئه‌م هه‌ر لدوف تاریێ دچین تا رۆژا ئه‌ڤرو، دبێژم هون ژیان بر بون لێ ژیان خوه‌شه‌ویست بون، لێ بومه‌ ژیان هه‌ر داگرتنا زكیه‌. بمریت كوردێ ده‌ستێ خوه‌ دخه‌ ده‌ستێ بكوژێ خه‌لكێ خوه‌، بمره‌ كوردێ به‌ره‌ڤانی ژ ئیخوان موسلمینا بكه‌ت، بمره‌ كوردێ ژیان بو وی هه‌ر داگرتنا زكی بیت، چونكه‌ زك تێر نابیت.
بكوردی و بكورتی مه‌ زك خسته‌ پێش مه‌ژی له‌وما سه‌ر لمه‌ بو ته‌شی.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close