وەزارەتا ناڤخۆیا توركیا ب فەرمی كوشتنا هژمارەكا سەربازێن خۆ ل باكوورێ كوردستانێ راگەهاند و هەتا نۆكە پارتا كاركەرێن كوردستانێ ب فەرمی چ راگەهاندن ل سەر وی شەڕی بەلاڤ نەكرینە.
وێ وەزارەتێ د بەیانەكا خۆ دا راگەهاند: د چارچۆڤێ ئۆپەراسیۆنەكا سەربازی دا ل سنوورێ پارێزگەها وانێ یا باكوورێ كوردستانێ، شەڕ ل ناڤبەرا هێزێن ئێمناهیێ و گەریللایێن پەكەكێ دا هاتییە رویدان و ئەڤ شەڕە بوویە ئەگەرێ كوشتنا سێ جەندرمەیان و ئەفسەرەكێ وان هێزان.
ل دویڤ گۆتنا وێ وەزارەتێ، فەرماندەیەكێ جەندرمەیان و ئەفسەرەك و دوو ئەندامێن هێزێن جەندەرمەیان د وی شەڕی دا هاتینە كوشتن و سێ گەریللایێن پەكەكێ ژی شەهید بووینە.
فەرە بێژین كو هەتا نۆكە هێزێن پاراستنا گەل (هەپەگە) چ رۆنكرن یان بەیان ل سەر وی شەڕی بەلاڤ نەكرینە، لێ وەزارەتا ناڤخۆیا توركیا ل سەر پەیجێ خۆ یێ تویتەرێ ناسنامە و ناڤێن كوشتیێن خۆ بەلاڤ كرینە یێن د وی شەڕی دا هاتینە كوشتن.
