سه‌ردار هێتوتى
گروڤێن فشارێ، یێن كو دشێن كاریگه‌ر بن ژ بۆ گوهرینێن بنگه‌هین ل هه‌ر وه‌لاته‌كى، د سه‌د ساڵا نوكه دا بوونه خۆدان پێگه‌هـ و جهـ، ئه‌ون دشێن مروڤان یان ژى بێژین جڤاكان هشیاركه‌ن و بێخنه سه‌ر رێسنێ دروستێ كار و بریار و ژیانێ، هه‌روه‌سا دشێن ب باندوور بن بۆ سه‌ر ده‌ستهه‌ڵاتێ و نه‌هێلن كو مافێ گشتى بهێته بن پێكرن.
پله و پایه و كاریگه‌ریا گروڤێن فشارێ ل وه‌لاته‌كى بۆ ئێكێ دیتر د جدانه و گوهرین ب سه‌ر دا دهێن، ئه‌و ژى یا بێگومانه كو ئه‌ڤ گروپه خۆدان روله‌كێ زندینه د ناڤا جڤاكێن پیشه‌سازى دا لێ د جڤاكێن هزر عه‌شائیر دا پێگه‌هه‌كێ له‌رزوك و ب ترس و نه‌مه‌ردى یا هه‌ى.
ئه‌گه‌ر ده‌لیڤا باش هه‌بیت و ڕێك لێ نه‌هێته گرتن ژ لایێ كاربده‌ست و رێڤه‌به‌رێن وه‌لاتان ڤه، ئه‌ڤ گروپێن فشارێ دشێن خۆدان روله‌كێ باش بن د چاڤدێریا كارێن په‌رله‌مانى و یاسایى یێن گرێداى ژیانا خه‌لكى چونكى سروشتێ حوكمێ دیموكراسیه‌تا بنه‌جهـ هاریكاره ژ بۆ كار و خه‌باتا ڤان گروپان. چالاكیێن گروپێن فشارێ ئاماژه‌نه ژ بۆ زندیبوونا مروڤى و دیموكراسیه‌تێ له‌ورا نابیت حكومه‌ت یا ڕێگیر بیت ل هه‌مبه‌ر كار و خه‌بات و پێدانا ئازادیێ ژ بۆ ئه‌ندامێن گروپێن فشارێ چونكى ئه‌ڤ ئه‌ندامه دڤێت بشێن بووچونا خۆ بسه‌پینن یان ژى ببن ڕێگر ل هه‌مبه‌رى هه‌ر یاسایه‌كا له‌نگ و ئازادى به‌رته‌نگ.
ژێهاتیبوونا ڤان گروپان بۆ به‌رده‌وامیێ یا په‌یوه‌نداره ب ژێهاتیبوونا كه‌نالێن په‌یوه‌ندیێ ژ لایێ ڤان گروپان و گشت جه‌ماوه‌رى و ده‌سهه‌لاتێ. لێ ئه‌وا نوكه ل هه‌رێما كوردستانێ و ل ژێر ناڤێ گروپێن فشارێ دهێته كرم ب تنێ له‌نگیه‌كا شه‌رمزاریێ یه و ئه‌و نه‌شیانه خۆ ژ هێزا ئایدولوژیا حزبى بده‌نه پاشان و بكه‌ڤن د خزمه‌تا گشتى دا، له‌ورا نوكه ئه‌ڤ گروپه وه‌ك پشكه‌ك ژ ناڤه‌نده‌كا حزبى دهێنه ل قه‌له‌م دان و نه‌زێده‌تر.
