نێرین

هیڤیا ده‌را خوه‌لیا سه‌را


د. شه‌عبان
سه‌ره‌دانا موسته‌فا كازمی سه‌روك وه‌زیرێن عیراقێ بو چه‌ند ده‌ڤه‌ڕێن باشورێ كوردستانێ لڤان رۆژێن ده‌رباسبوی بمن زۆر كارڤه‌دانێن نه‌ ته‌ندوروست لدویف خوه‌ ئینان، به‌شه‌ك ڤه‌دگه‌ریت بو پویته‌پێدانه‌كا زۆرا مه‌زن هه‌م ژ ئالیێ خه‌لكێڤه‌ و هه‌م ژ ئالیێ ده‌ستهه‌لاتداران ڤه‌. ئه‌ڤێ پویته‌پێدانێ بێ ئومێدی بێ هیڤیه‌كا خه‌لكێ مه‌ نیشادا ژ ده‌ستهه‌لاتدارێن خوه‌، ده‌ستهه‌لاتدارا نیشاندا كو هیڤیه‌ك مه‌زن بوی هه‌یه‌ ژبو جاره‌ك دن ئاڤ ڤه‌گه‌ریت سه‌ر جوكا هه‌ڤپشك و بكارن كازمی قایلكه‌ كو لگه‌ل وان رێككه‌ڤیت. سه‌رده‌ریا هه‌ردو لا بمن به‌دبه‌ختیا مه‌ كوردا نیشان دده‌ت كو ئه‌م خوه‌دی دونیا بینیه‌ك نینن دا بكارین لسه‌ر كاربكه‌ین، مه‌ پرانی سوینا كاركرنێ مه‌ كارڤه‌دان هه‌بوینه‌، له‌وما شوینا ئه‌م بونیاته‌كێ ته‌ندوروست ئاڤاكه‌ین و لسه‌ر به‌رده‌وامبین، مه‌ كار لسه‌ر كه‌سا كریه‌ كو ئاریشا برێكا وان چاره‌سه‌ركین، له‌وما هه‌رده‌ما كه‌س هاتینه‌ گوهارتن مه‌ ژسفرێ جاردی ده‌ستپێكریه‌. ئه‌م وه‌ك گه‌ل و ده‌ستهه‌لات دڤێت ده‌ستبه‌رداری ڤێ سیاسه‌تا چه‌وتبین چونكه‌ بسالانه‌ ئه‌م تاپویا وێ دده‌ین. یامن ژهه‌میێ بێ ئومێد دكه‌ت كو گه‌لێ مه‌ سه‌ربور ژ ئه‌حمه‌قیێن ده‌ستهه‌لا خوه‌ وه‌رنه‌گرتینه‌ و ئه‌وژی هیڤیا خوه‌ دگه‌هیننه‌ كه‌سه‌كی كو هه‌رێ زۆر ساله‌كێ ّوێ لسه‌ر ده‌ستهه‌لاتێ بمینه‌. پاشان ژده‌رڤه‌ی پروپاگاندا ده‌هول قوت و زۆرنابێژێن وی وه‌ك چاكسازیا مه‌سرور بارزانی كه‌سه‌ك دكاره‌ یه‌ك چه‌مكێ سه‌ره‌كیێ ده‌ستهه‌لاتا ناڤه‌ند بو من بناڤكه‌ت كو چاكسازیه‌كا به‌رچاڤكریه‌؟
موخابن ده‌ستهه‌لاتدارێن دیتنا به‌رپرسه‌كی ژ نێزیكڤه‌ بو خه‌لكی كره‌ خه‌ون، له‌وما مه‌ ددیت چه‌وا خه‌لكێ مه‌ لهه‌رێمێن جودا خوه‌ دكازمی وه‌ردكر، نه‌ ژبه‌ر به‌ژن و بالا وی بو، نه‌ ژبه‌ر جامێری و مروڤاتیا وی بو، چونكه‌ جژڤان هه‌میا خه‌لكێ مه‌ لده‌ف نه‌دیتیه‌، لێ ژ ساویلكیا خه‌لكێ مه‌ یه‌ كو ته‌نیا نێزیك بون یانژی هه‌ڤپه‌یڤین لگه‌ل به‌رپرسه‌كی بو وی خوه‌شحالیه‌. نێزیك ٢٠ سالا نێچیرڤان بارزانی سه‌روك وه‌زیر بو ژبلی رێزا تورومبێلا بدویف ڤه‌ خه‌لكێ مه‌ چه‌ند جاران كاریه‌ لگه‌ل باخڤن، گازندێن خوه‌ بو بكه‌ن ، بلا كاره‌كی ژی بو وان نه‌كه‌ت، مه‌سعود بارزانی ١٢ سالا سه‌روكێ هه‌رێمێ بو و چه‌ندین سه‌روك په‌رله‌مان، وه‌زیر، گزیر، پارێزگه‌ر، سه‌روك پارت، له‌ق و مه‌لبه‌ند، چه‌ند جاران ژ نیشكه‌كێڤه‌ چوینه‌ ناڤخه‌لكی، چه‌ند گوتن یان پاریه‌ك نانی لگه‌ل خه‌لكێ خوه‌ پارڤه‌كرینه‌؟
راوێژكارێن بێ راوێژ
من هیچ سه‌رژمێر ئانكو داتا لبه‌رده‌ست نینن لێ ژ زۆر كه‌سا من گوهلێبویه‌ كو ماسترین وه‌لاتێ ئه‌وروپی ته‌مه‌ت هوكمه‌تا مه‌یا هه‌می راوێژكارنینن، بملیونا دۆلارا تێچونا وان هه‌یه‌. وه‌ك ئه‌ز دوزانم ده‌ما كه‌سه‌ك بو خوه‌ راوێژكاره‌كی تینه‌ مه‌ره‌م ژێ ئه‌وه‌ ئه‌ڤ كه‌سه‌ دواره‌كی بسپوره‌ و تێراوانینێن خوه‌ پێشكێشدكه‌ بو پرس بكه‌ڤیته‌ سه‌ر مێزا وی. لێ وه‌ك ژیانێ نیشاندای مه‌ راوێژكار نینن، مه‌ ئه‌زبه‌نی و ئه‌ز خوله‌مێن هه‌ین. راوێژكار ئه‌و كه‌سه‌ یێ دیتنا خوه‌ لسه‌ر پرسا سه‌كێ دده‌ت نه‌ گرێدای كه‌س و حه‌زا وی، له‌وما ل وه‌لاتێن ته‌ندوروست وه‌ك رێزه‌ك بو كه‌ساتیا خوه‌ راوێژكار ده‌ستبه‌رداری كارێ خوه‌ دبیت ئه‌گه‌ر بپه‌رسه‌ك سه‌رنجراكێش دیتنا وی لبه‌رچاڤ نه‌گرن. پرس لڤێره‌ گه‌لو ژ له‌شكه‌رێ مه‌یێ راوێژكارا ناڤه‌كی بو من بێژن ده‌ستبه‌رداری كارێ خوه‌ ببیت؟ گه‌ر مه‌ راوێژكار هه‌بن چه‌وا سه‌ره‌دانا كازمی دا بڤی شێوه‌ی ده‌رباسبیت؟
ترس و برس ملله‌تی لهڤ نێزیك دكه‌ن لێ موخابن كوردا پارچه‌ دكه‌ن
یه‌ك ژ یاسایێن سروشتیێن كومه‌لایه‌تی ئه‌وه‌ سه‌ره‌رای هه‌می كێم و كاسیا ده‌ما گه‌فا ترس و برسێ بسه‌ر گه‌له‌كی دا تێت، گه‌ك یه‌كودو دگریت، ناكوكیا ژبیر دكه‌ت، كه‌سانێن چه‌وتی و كارێ نه‌ ته‌ندوروست ئه‌نجام دابن ڤه‌كری داخوازا لێبورینێ ژ خه‌لكێ خوه‌ دكه‌ن، ده‌ستهه‌لاتدار هه‌ولدده‌ن بهه‌می شیانا خوه‌ و بده‌مه‌ك به‌رچاڤ زۆر تشتا سه‌ره‌راستبكه‌ن ژبو یه‌كێتیا خه‌لكێ خوه‌ بپارێزن. رێكخستنێن جودا نێزیك هه‌ڤدبن جودایێن خوه‌ ژبیر دكه‌ن و لسه‌ر خالێن هه‌ڤپشك كاردكه‌ن. من نه‌دیتیه‌ سه‌ركردێن هیچ وه‌لاته‌كی وه‌ك وه‌لاتێن جیهانێ سێ ئاخفتن لسه‌ر یه‌كرێزیێ كربیت، لێ ئه‌م هه‌می دوزانین كو مه‌به‌ستا خودانێ ده‌ستهه‌لاتا مه‌زن ئه‌وه‌ كو هه‌می لدویف رێز بن. هه‌رده‌ما گرفتاریه‌ك هاتیه‌ رێكا مه‌ بكوردی و بكورتی مه‌یێ گوتی دونیا ره‌ڤ و رویه‌ هه‌ركه‌سێ ئاگا ژ خوه‌یه‌، له‌وما ئه‌م وه‌ك نوكا لبه‌ری دای لێتێین و كه‌س بسه‌لامتی ژێ ده‌رناكه‌ڤیت.

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close