ئەندامەکێ لیژنەیا داراییا عێراقێ ڕاگەهاند، ناهێتە چاڤەڕێکرن د ٢٠٢١ێ ژی دا چاکسازیەکا بەرفرەهـ د حکومەتا عێراقێ دا بهێتەکرن و گۆت ژی،”چێدبیت سالا ٢٠٢١ێ ژی وەک ٢٠٢٠ێ بیت و سالەکا تەژی کریز و ئالۆزی بیت”.
جەمال کۆچەر، ئەندامێ لیژنەیا دارایی د پەرلەمانا عێراقێ دا ئەڤرۆ یەکشەمبێ، د دەما پشکداریکرن د نوچەیەکا ئێن ئاڕ تی دا ڕاگەهاند، ئەنجامدانا چاکسازیێ د کابینەیا مستەفا کازمی سەرۆککوەزیرێن عێراقێ دا کارەکێ گەلەگێ زەحمەتە، ژبەر کو پڕانیا گرۆپ و حزبێن یێن پشکدار د پێکئینانا کابینەیێن بەرێ دا، دەستێ وان د گەندەلیێ دا هەبووینە و هەمی بزاڤان دکەن ئاستەنگان بۆ کابینەیا مستەفا کازمی درۆست بکەن”.
بەحسا وێیەکێ ژی کر، د دەما کوشتنا قاسم سولەیمانی فەرماندەیێ فەیلەقا قودس یا ئیرانێ و ئەبوو مەهدی موهەندیس فەرماندارێ حەشدا شەعبی یا عێراقێ، تنێ ٦٧ گرۆپێن چەکدار ل عێراقێ هەبوون، لێ پشتی کوشتنا وان ١٠ گرۆپێن دی درۆست بوون، د نها دا بووینە ٧٦ گرۆپ، کو پڕانیا وان ئاستەنگان لهەمبەری ئەنجامدانا چاکسازیێ دا کابینەیا مستەفا کازمی دا درۆست دکەن.
د پرسیارەکا دیا ئێن ئاڕ تی دا، جەمال کۆچەر ئەندامێ لیژنەیا دارایی ل پەرلەمانێ عێراقێ زەلالکر ژی”، ئەگەر حکومەتا عێراقێ پارەی قەر بکەت، دێ موچەیێ فەرمانبەرین هەرێمێ ژی دەت. گۆت ژی، ئەگەر چاکسازی نەهێتەکرن، دێ ڕەوشا خەلکی خرابتر بیت، لەورا دڤێت خەلک خۆ بێدەنگ نەکەت و ب چ ئاوایەکێ ڤێ یەکێ ژ حکومەتا هەرێمێ و هەروەسا عێراقێ ژی قبول نەکەت”.
