اابراھیم سپینداری
ھەکە ب دیدە و زمانێ ئاینی و ئایندارا وەحیێ بخوینین، دکارین بێژین، د قوناغا ئەفسانە و ئایناندا، نەمازە ھەرسێ ئاینێن ابراھیمی، وەحی سەرچاڤکێ سەرەکی بو یێ ڤەگێڕانێن(سەردیات)خاندن و شروڤەکرن و تێگەھشتنا سروشتی و ژیانا جڤاکێ مروڤاتیێ . تا ڤی سەردەمی ژی ، پڕانیا گەلێن مسلمان ، ل روژھەلاتا پیروز ، دەقێن وەحیێ ، ب ڕێیا شروڤەکرنێ، دگڤشن و دبشێڤن ؛ دا چارەسەریان، ژ دەرڤەی ئەقلێ سەردەست و پیس، ئەقلێ زانستی یێ روژئاڤا ، بو پرسگرێکێن خو ببینن!. ھەر پێغەمبەرەکی ژ پێغەمبەرێن ابراھیمی ب ئاوایەکێ جودا میکانیزما ئەنجامدانا وەحیێ دیارکریە، پێغەمبەرێن بێ پەرتوک ، کو ب سەدەھانە، ژ ئادەم دەستپێدکەن، بێ دەستەک (واسطة) دیالوگەک وژدانی و بێدەنگ دگەل خودایێ خوە ئەنجامدایە : واوحینا الی نوح …. و دعی نوح ربە انی لمغلوب …. بھەمان ئاوای ل گەل ایوب و ابراھیم و یەعقوب و اسحاق …. بەلکو ل بەر ئاستێ پێشکەڤتنێ یێ بلندتر و پەیدابونا خاندن و نڤیسینێ بیت، وەحی ل جەم ھەرسێ پێغەمبەرێن ابراھیمی یا جودابو، ھەرسێیا ئاخڤتنا خودێ خو نڤیساند و ئاینێن پەرتوکدار پەیدابون، نەخو، ھەکە ل سەردەمێ پێغەمبەرێن پێش وان ژی ئامرازێن خاندن و نڤیسینێ ھەبان، ئەوژی دبون خودان پەرتوک . لێ دیساژی میکانیزما ئەنجامدانا وەحیێ ل جەم ھەر سێ ئاینێن پەرتوکدار یا جودا بو. موسا دچو ئالیێ چەپێ یێ کێلەکا چیایێ طور، دگەل دئاخڤت، دەنگێ وی دبھیزت . ئەگەر وی خو ب مەرجێ وەحیێ نەزانیبا، ئەو دکاری ب یەک جار ، یان ب دو جار، ھەمو رێنمایێن خو ژ خودایێ خو وەرگریت و ئێدی وەحی بداوی بھێت و چ کێموکاسی د ئاینیدا نەمینن ، لێ ئەڤێ روینەدا و تا موسا مری وەحی نەھات بڕین . وەحی ل جەم عیسای ب رەنگەکێ دن بو ،چونکو مەسیح ب ئالیێ روحیڤە دەرئەنجامێ روی ب روی یێ ڤین وپەیڤێن خودایبو، لەوما ئەو کاری ب وێ پەیوەندیێ خو ژ بەندا وەحیێ ئازادبکەت، خو ب خوداوەند بزانیت، دەما ئەو دئاخڤت خودێ دئاخڤت، تەنێ دەما توشی ئاڕێشەیان دبو گازندێن خو بو ئەسمانی دکرن. محەمەد ھەردو جورێن وەحیێ سەرھەڤکرن ، یا پێغەمبەرێن بێ پەرتوک، دگەل شێوەیێ تایبەت بخو، کو جبریل ل بان سەرێ وی خویادبە و بانگدکە و ئاخڤتنا خودێ ، وەک خو، دگەھینە،. ھێشتا محەمەد ل مەککەھێ بو دەما چویە ئەسمانی و دەنگێ خودایێ خو بھێزتی و ستونێن ئاینی گرتینەدەست، ژبلی موعتەزەلیان، کو ل ناڤچوینە، ھەمو رێچکەیێن مسلامانا دبێژن قورئان ئەزەلیە، ئێ چما د گەشتا خو یا عەسمانیدا ھەمو نە ئانی خار؟ھەکە ئەم بزانین محەمەد دکاری ب رێیا وەحیێ ژمارا نڤێژ و روژیانژی وەرگریت، دێ خویابیت کو وی ڤیایە ژ پێغەمبەرێن پێش خورا بێژە: ھەکە موسی ھەڤدیالوگێ خودێبیت، عیسا بەرھەمێ روحا خودێبیت ، ئەز یارێ خودێمە ، بنێرن ئەز تا سدرة المنتھی برم و ژمنرە گوت ” فەرمو خوشتڤیێ من ، پێن خو دانە سەر بەرکا من و بمن شاددبە” گەر خودا ( ب تێگەھێ پێغەمبەرا بخو) ھزر و بیر و ئارێشەیێن جڤاکێن مروڤان بو خو بخەم بزانیت، و پێدڤی ب پێغەمبەرا بیت، وەحیێ وەک ئامراز ێ گەھاندنێ بکاربینیت، ئەو دکاریت دینی ، وەک پاکێت، ب یەک جاری بو وان پێغەمبەرا بنێرە ، لێ خویایە پئغەمبەر خوە ب مەرجێ وەحیێ دبینن، چونکو ئەو ھەنە ، و تا ئەو ھەنە دەبێ وەحیژی ھەبیت، تەنێ جارەکێ محەمە خو شەپرزەکریە و گوتیە” چەند مەھەکە وەحی ژمنرا ناھێت” نەخو وەحی ل سەر داخازا وان بویە، ھەردەما کەڤتبان ئاڕێشەیان، ب رێیا وەحیێ، ژخوەرا چارەسەرکرن،.تەمەنێ وەحیێ ب تەمەنێ وانڤە گرێدایبو، عیسا و موسا و پێغەمبەرێن پێشیا وان ژی ب وەحیڤە مرن ، ئاینێ وی بنیڤا رێدا ما، ھەر دوازدە پەیامبەرێن وی بداوی ئانی .ل جەم محمد ئایەتا داویێ((الیوم اكملتُ لكم دينكم واتممتُ عليكم نعمتي و رضيتُ لكم الاسلام ديناً….))بو، کو د تایا مرنێدا، ل سەر بەڕکا مرنێ ھاتەخار. گەلو ئەگەر محەمەد نە مربا وەحی دمر؟ سەردەمێ پێکدادانێن خویناوی دناڤبەرا ئوسمان و عەلی و معاوییەی چەند پێدڤی ب وەحیێ ھەبون، چما ھایێ ئەسمانی نەبو ؟
