ردوان گولی/سوید
هیچ گومان تێدا نینە دەستهەلاتا روژنامەڤانیێ دهێتە نیاسین ب دەستهەلاتا جارێ،ئەڤروکە کارێ روژنامەڤانی لسەرانسەری دونیایێ تووشی گرفت وئاستەنگان دبت،بەلێ هندەک وەلات ئێکجار بووینە زیندان وگرتیخانە بو روژنامەڤانێت دلسوز وخودان وژدان،یا خویایە روژنامەڤانێ راستەقینە ئەوە یێ ئاریشێن شەقام وخەلکێ هەژار وبەلنگاز ڤەدگوهێزت بو دەستهەلاتێ یان کێم وکاسیێن حکومەتێ بەرچاڤ دکەت دابهێن چارەسەرکرن،ئەگەر روژنامەک یان روژنامەڤانەک یان رادیو وتەلەفزیونەکا راستەقینە هەبیت وراستیا بێژت ودیارکەت،دێ بینی پارتێن دەستهەلاتدار بسەدان دام ودەزگەهێن راگەهاندنێ هەنە چ روژنامەڤانێت قەلەم فروش بن یان رادیو وتەلەفزیون بن بشەڤ وروژ بتنێ ب بەژن وبالا پارتێن دەستهەلاتدار وسەروک ومالباتا وی دبێژن،نەشێن هەڤرکی وکێبەرکێ لگەل یێن بەرامبەر بکەن،ژبەر هندێ ئەڤ کەنالە هاتە دائێخستن وئەڤ روژنامەڤانە هاتە رەڤاندن وتیرورکرن،ل باشورێ کوردستانێ چەندین روژنامەڤان هاتینە تیرورکرن مینا سوران مامه حه‌مه سه‌رنڤیسه‌رێ گوڤارا لڤین ل که‌رکوکێ پشتی به‌لاڤه‌کرنا راپورته‌کێ لدور گروپێن له‌شفروشیێ وپه‌یوه‌ندیێن هنده‌ک به‌رپرسێن میری پێڤه ودکتورعبدالستار ورەئوف ئاکره‌یی وسه‌رده‌شت عوسمان ویدات حسین ووو،زێدەباری یێن نوکە دزیندانێن تاری دا وەکی شێروان شێروانی وگوهدار زێباری وو،ئەو دەستهەلاتا بەرسفا پەیفێ وخامەی ب چەکی وگرتن وتیرورکرنێ ددەت،ئەو یا گورێ خوە دکولت ونزانت،ئەگەر هەر دەستهەلات دێ ب مەنتقێ هێزێ سەرەدەریێ دگەل خودان پێنووس وخامان کەت،هەبوونا ب هزارا نڤیسەر وروژنامەڤان ودیرووک زان وو یێن مووچەی ژ حکومەتێ وحزبێن حکومران وەردگرن بو چیە ؟ ما شول وکارێ وان چیە ؟ بلا ئەو بەرسفا بدەن نەک برێکا هێزێ وگرتن وتیرورکرنێ بیت، له‌وما ویلیه‌م شکسپیری دگوت پێنوسێ نڤیسکاری وخوینا شه‌هیدان وه‌کی ئێک پیروزه،به‌لێ ئه‌ڤ کارێ پیروز نه یێ رائێخستیه ب گول به‌یبینا سالانه ب سه‌ده‌هان روژنامه‌ڤان دبنه قوربان سه‌خمه‌راتی دیڤجوونا کێشێن مه‌ترسیدار وه‌کی گه‌نده‌لی وبه‌رتیل وکوشتن ومایتێکرنا حزبێ دناڤ دام وده‌زگه‌هێن میریدا وووو. ل کوردستانێ جه‌ندین روژنامه‌ڤانێت جه‌له‌نگ هاتینه تیرورکرن،براستی ده‌ست هه‌لاتا کوردی هنده‌ک لاپه‌رێن ره‌ش وناپاک لسه‌ر خوه تومارکرینه هه‌مبه‌ری ده‌نگێن ئازاد ، به‌لێ ئه‌و روژنامه‌ڤانێت ده‌هولێ بو ده‌ستهه‌لاتێ دقوتن و ب به‌ژن وبالا وێ دبێژن هه‌می خودان ئیمتیازات ومووچەنە ویێن ره‌خنا ئاڤاکه‌ر دگرن ده‌رگه‌هێن گرتیخانا بو وان ڤه‌کرینه، سه‌رکردێ فره‌نسی ناپلیونی دگوت سێ روژنامه دشێن له‌شکه‌ره‌کی بشکێنن.
