د. شه‌عبان مزوری
ئه‌ڤا ئه‌ڤه چه‌ند رۆژه بویه مژاره‌ك سه‌ره‌كی بو پرانیا كه‌سێن كوردێن بتایبه‌ت چالاك ل تورێن كومه‌لایه‌تی و هه‌روه‌سا به‌شه‌ك نڤیسه‌ر و خوه‌دان باوه‌ریێن جودا،، جاره‌ك دن جڤاتا كوردین دو پارچه كریه، ئه‌ڤ پارچه بونه وه‌ك هه‌می پارچه بونێن دی لسه‌ر پرسه‌ك نه ژدویر نه ژ نێزیك گرێدای مه كوردایه، له‌وما پرس بو مروڤی دوروست دبیت گه‌لو ئه‌ڤ پارچه پارچه بونا دناڤا مه كوردا دا به‌س نینه، دڤێت پتر پارچه پارچه بین؟ گه‌لو ئه‌وێن ئه‌م لسه‌ر وان دبن كه‌فشێن ئێكودو دچین چه‌ند ئاگا ژ مه هه‌یه؟ گه‌ر ئه‌م لبه‌رسڤا وان پرسا بگه‌رین بمن بو مه بێ دو دلانه وێ ئاشكرا بیت كانێ ئه‌م كورد چه‌ند ساویلكین.
مه كوردا پێویسته ئه‌م لسه‌ر ئالوزی و گرفتێن خوه كاركین، خه‌مخور بین لسه‌ر ره‌وشا چه‌وساندنا ئه‌م تێدا دژین بسه‌دان سالا، ره‌وشا گه‌لێ كورد رۆژ بو رۆژێ ئالۆز و لاوازتر دبیت، مه كوردا هه‌یا رۆژا ئه‌ڤرو شیان نینن ئه‌م خوه ژ داگیكرن و وێرانیێن داگیركه‌را قۆرتالكین، باشه ملله‌ته‌ك دره‌وشا مه‌دا ئه‌گه‌ر دلسوزی یان لایه‌نگری بو هه‌ر هه‌ڤركیه‌كا لناڤبه‌را دو لایه‌نا دا هه‌بیت وێ چه‌ند بكاره ته‌رازیێ بگهوره؟ یانژی سه‌رئه‌نجام وه‌ك زۆر جاران ئه‌م دێ بو خوه هنده‌ك دوژمنێن دی په‌یداكین؟
هه‌ڤركیا لناڤبه‌را فره‌نسا و توركیا دا هیچ په‌یوه‌ندی بكوردا یان موسلمانانڤه نینه. فره‌نسا وه‌ك وه‌لاته‌ك زلهێز خوه‌دی پێگه‌هه‌ك به‌رچاڤ ل ئه‌وروپا لرۆژهه‌لاتا ناڤین ته‌نیا ئه‌ردوگان و توركیا دبینیت ئاسته‌نگ هه‌مبه‌ر پروژێن خوه، لسوریا، لوبنان، لیبیا ئانكو بگشتی لده‌ریا سپی. هه‌می هه‌ڤركیه‌ك دبه بهه‌ر شێوازه‌ك به‌رده‌وام بیت ( شه‌ره ده‌ڤ، شه‌رێ دوبلوماسی، شه‌رێ ئابوری یانژی شه‌ره‌ك له‌شكه‌ری ) وێ هه‌ر بدوماهی بێت و سه‌رئه‌نجام دێ لهه‌ڤهاتنه‌ك بیت. ره‌وشا ئه‌ڤرو بمن دوره ژ راستیێ كو كه‌سه‌ك پێشبینا شه‌ره‌ك له‌شكه‌ری لناڤبه‌را توركیا و فره‌نسا بكه‌ت، ئانكو هه‌ردو وه‌لات لدویف هێزا خوه وێ هنده‌ك تشتا بده‌ست ڤه بینه و پێگه‌ها خوه ل روژهه‌لاتا ناڤین بهێزكه. بمن به‌شه‌ك مه‌زن ژڤێ لهه‌ڤهاتنێ وێ بازاركرن بكوردا بیت.
ئه‌م كورد بباوه‌ریا من دڤێت كار لسه‌ر كێمكرنا دوژمنا بكه‌ین، ژ لایه‌كی دی دڤێت هه‌می هه‌ولا بده‌ین ژبو نه‌یارێن مه گه‌ر نه‌بن یار نه بنه دوژمن. ژبه‌ر دابه‌شبونا مه لسه‌ر چار وه‌لاتێن هاڤبه‌ش بئولا ئیسلامی، تێكه‌ل لگه‌ل ناسیۆنالیسمه‌ك دورونده، كولتوره‌ك بیابانی عه‌ره‌بی تێكه‌ل لگه‌ل هوڤاتیا توركی و رێبه‌ریا فارسا بو جیهانا شیعی ئه‌م كورد لاوازترین خه‌له‌كه‌ینه دناڤ ڤی بازنیدا له‌وماژی هه‌رده‌م ئه‌م تاپویێ دده‌ین. زور كوردێن مه ژ نه‌زانین یانژی هنده‌ك ژوان دبیت ژ زانینه‌كا زۆر ئه‌م دبینین ده‌م بو ده‌م دێ ئالایێن ئیسرائیلی به‌لاڤكه‌ن لكێله‌كا ئالا هه‌رێما كوردستانا عیراقێ، تایبه‌تی سه‌رده‌ما پروپاگاندا رێفراندومێ ٢٠١٧ وه‌سا نیشان ددا كو ئه‌م و ئیسرائیلی نێزیكترین دوستین لروژهه‌لاتا ناڤین، بڤی كاری مه خه‌لك زۆر لخوه كره دوژمن و نه‌یار. راسته باشترین دوستێ ئیسرائیل توركیا یه و دوڤدا وه‌لاتێن عه‌ره‌بینه، لێ چونكه زۆربه‌یا خه‌لكێ ڤێ هه‌رێمێ ساویلكه‌نه پر بئاسانی تێنه هاندان ژ لایێ نه‌ته‌وه‌په‌رستێن داگیركه‌رێن مه لژێر ناڤێ به‌ره‌ڤانی ژ ئولێ ئیسلامێ دژی مه كوردان، له‌وما دوباره دبێژم دڤێت ئه‌م زۆر هشیارانه و به‌رپرسانه سه‌رده‌ریێ لگه‌ل ڤان جوره رویدانا بكه‌ین. ئه‌م كورد بموخابنیڤه تا رۆژا ئه‌ڤرو مه‌تالێن چه‌په‌رێن هه‌ڤركێن جوداینه و لسه‌ر وان هه‌ڤركیا خوه پارچه پارچه دكه‌ین، ئه‌م چه‌په‌رێن خوه چولدكین و ژبو خه‌لكێ قوربانیا ددین، ئه‌و خه‌لكێ راسته‌و خوه یان نه‌راسته‌و خوه به‌شدارن د پروسێسا لاواز كرن و ژناڤبرنا مه.
بكوردی و بكورتی یا گوتی گوڤه‌ندا میرا گر به‌ربو فه‌قیرا.
