نڤیسینگەها نەجمەدین کەریم، پارێزگارێ بەرێ یێ کەرکوکێ و ئەندامێ مەکتەبا سیاسیا یەکێتی ڕاگەهاند، ب سەدەما جەلتا مێشکی ژیانا خۆ ژ دەست دا.
ئەڤرۆ شەمبیێ، نڤیسینگەها نەجمەدین کەریم، پارێزگارێ بەرێ یێ کەرکوکێ و ئەندامێ مەکتەبا سیاسیا یەکێتی ڕاگەهاند، پشتی کو نەخۆشکەتی ب جەلتەیا مێشکی د چەند رۆژێن دەربازبووی دا، دەمژمێر ١١ یێ شەڤا ئەینی ٣٠ێ جۆتمەها ٢٠٢٠ێ، نەجمەدین کەریم پارێزگارێ بەرێ یێ کەرکوکێ ل ئەمریکا ژیانا خۆ ژ دەست دا.
دبێژیت ژی، لسەر وەسیەتا وی تەرمێ وی دێ هنێرنە کوردستانێ و بشێوەیەکێ دەمی دێ ل کوردستانێ ڤەشێرن، هەیا کو باژێرێ کەرکوکێ دهێتە ئازادکرن و لبن ئەولەهیا هێزێن پێشمەرگەی بیت، پاشان دێ بەنەف کەرکوکێ.
ئاماژە ب وێ ژی کریە، ژبەر رەوشا نها ژبەر کۆرۆنایێ چ جۆرە قەلەبالغیەکێ دروست نەکەن و تازی نەهێتە دانان.
نەجمەدین کەریم پارێزگارێ بەرێ یێ کەرکوکێ، ل سالا ١٩٤٩ ژدایک بوویە ل تاخێ ( رەشیداوا ) ل باژێرێ کەرکوکێ ، قوتابخانا بنەرەو ناڤەندی و ئامادەیی ل وی باژێری تەمام کریە و ل سالا ١٩٧١ باوەرناما بەکالۆریۆسێ ل نوژداریا گشتی ل زاکۆیا موسل بدەست ڤە ئینایە و ل سالا ١٩٧٢ بوویە پێشمەرگە.
ل سالا١٩٧٦ بوویە نوژدارێ مستەفا بارزانی سەرۆکێ بەرێ یێ پارتی دیموکراتا کوردستانێ و پاشان دکتۆرا د بوارێ نشتەرگەریا سیستەمێ دەمار ل زانکۆیا (جۆرج واشنتۆن) ل ئەمریکا بدەست ڤە ئینایە.
نەجمەدین کەریم ل سالا ٢٠٠٩ ڤەگەریایە هەرێما کوردستانێ و بوویە ئەندامێ مەکتەبا سیاسیا یەکیتی یێ ، دەستپێکا مەها چار ٢٠١١ هەیا کو ١٦ ێ جۆتمەها ٢٠١٧، پارێزگارێ کەرکوکێ بوویە .