ئەڤ رەوشا ئیرۆ گەلێ مە تێرا دبۆریت، دوورهێل و سیستەمەک رەشبین بەرهەڤکر، کو ل هەردەرێ بێهیڤیبوونێ چادرا خوە ڤەدایە. ئەڤ بێدادی و هەڤرکیا نەرەوایا د ناڤبەرا پێکهاتێن گەلێ مە دا دهێنەکرن، تەڤ دەرگەهێن وێرانکرنێ ل بەر پاشەرۆژێ ڤەدکەن! ئەڤ رەوش و سالێن درێژ سەرهەڤی کاراکتەرێ براکوژیێ بووینە، کو ئەڤ شانەیا خوەکوژیێ وەک رەهێن هەڤرکیێ د جڤاکی دا هاتینە چاندن. لەورا ئەڤ ئەقلیەتە، بوویە بەشەکێ کاراکتەکێ مرۆڤێ کورد. بنێرە ئیرۆ ل چاخێ برسێ و سەهما مرنا کۆرۆنا، ترسا براکوژیێ وەک کابووسەکی ب مە را دهێت. ب ئەنجام، رەوشا مە بۆ هەموو ئەگەران، تا شەرێن براکوژی و هلوەشیانێ ژی یا بەرهەڤە.مەترسیترین شەرێن براکوژیێ، شەرێن ملیێن هزری‌نە، پرانیا جاران نڤیسکار و مەدیاکار ئاگرێ شەرێ براکوژیێ هلدکەن، کو دکەڤیتە وارێ تیرۆرا هزری. مەبەست ژ شەرێ ملی یێ هزری/ رەوشەنبیری، ئەو هەڤرکیا ژ سینۆرێن خوەیێن رەوا دەردکەڤیت. ئەڤ شەرێ دۆنکیشۆتێ راگەهاندنێ، ئەڤ رەوشەنبیر و مەدیاکارێن فتنەکار، ئەقلێ تۆلڤەکرنێ سەردەستکریە، کو هەڤرکیا ژ بیاڤێ تێکهلی و بهایێن رەوشەنبیری ڤارێکری. مخابن چەوا دیرۆکا ئەرەب/ ئیسلامێ یا پری فتنەیە، وسا ژی دیرۆکا تەڤگەرێن کوردی یا ژ فتنە و خوەکوژیێ پرە. بنێرە هندی پێکهاتێن سیاسی و جڤاکی ل کوردستانێ مژوولی هەڤن، هند مژوولی خزمەتا خەلک و کولتوری دەولەتێ نینن. هەروها ئەم ژ ئالەکی، ل ژێر گەفێن دەردۆرانین و ئالێ دی دووبەرەکیا ناڤخوەیی، کو ئەم راستی مەترسیەکا دوئالیزم کرینە.ب سەرهەڤ، تەڤگەرێن کوردی ژ سالێن شێستان وەرە، یێ ل فۆمەکێ ل هەڤهاتنێ دگەرن، بەلێ تا نوکە فۆرمەکێ دوورهێلی و ئەقلانی نەدیتیە. ب ئەنجام ژی، پارتێن کوردی راستی چەندین شەرێن خوە/ براکوژیێ هاتینە. ئێدی یەک ژ پرسگرێکێن مەزنێن د ناڤبەرا پارت و پێکهاتێن کوردستانێ دا، هێشتا پرۆسێسا باوریێ درست نەبوویە. دیارە ئەڤە ژی، باندۆرەکا مەزن ل سەر ئاشتیا جڤاکی دکەت. ل سەر ڤی بنگەهی، ژ سالێن شێستان وەرە شەرێ سار/ گەرم، د ناڤبەرا پێکهات و پارتێن کوردی دا بەردەوامە. ئێدی ئەو ئەنەرگی و دەمێ پارتێن کوردی، ل سەر ئاستێ پارچەکێ/ هەرچوار پارچان دژی هەڤ بکاردئینن، دیمۆکراتیا ل هەڤهاتنێ هەبیت باشترە، بلا ئەو دەم ژ بۆ خزمەت و پێشدابرنا کوردستانێ بیت. مە یەکرێزیا مالا کوردی نینە، هەروها مە چ ئارمانجێن هەڤبەش ژی نینن، بەلکو پارچەبوونە ب هەموو واتەیا پەیڤێ. ئێدی د پێڤاژۆیا تەڤگەرێن کوردی دا، ژ بلی دەستێوەردانا دەرەکی و بەرژەڤەندیێن کەسی و پارتاتی، دوو حەز و ئاراستەکرن هەبوون. یەکەم، دژی داگیرکرنێ و دووهەم، دژی هشمەندیا کەڤنار بوو، کو ئەڤە بەشەکێ ئەقلیەتا کوردی ڤەدگریت، لەورا د ئەنجام دا شەرێن براکوژی درستبوون.تەڤگەرێن سیاسی یێن کوردی راستی گەلەک مالوێرانیان هاتینە، ب تایبەتی “1975، ئەنفال، شەرێن براکوژی، شەرێ داعش و پرسگرێکێن ئیرۆ” دیارە ئەڤە چەند تراژیدینە، هند ژی پرسێن هشمەند دەرێژ دکەن و وان ئەفسانە و پەیکەرێن سەختەیێن د سەرێ مە دا هاتینە چاندن، هێدی ــ هێدی ژ ناڤ دبەن. ئێدی رۆلێ دەسەلاتا کوردی ب هەموو واتەیێن گەلەک لاوازبوویە، لەورا ئیرۆ دخوازن ڤێ لاوازیێ، ب شەرێ خوەکوژیێ پر بکەن!ب گەلەمپەری، کوردان ب درێژیا دیرۆکێ، پێکۆلا رەخنا شاشیێن خوە نەکریە و شاشیێن خوە ژی راست نەکرینە، لەورا تراژیدی ل سەر تراژیدیێ ب رەنگێ “خوەکوژیێ” سەرهەڤبووینە.گەلۆ ئەڤا هندە سالە دەسەلاتا کوردی ڤێ تالانیێ دکەت، جورەکێ خوەکوژیا خوەیە یان ژی یا ملەتیە؟! ب ئەنجام و ب تەڤ واتەیا پەیڤێ، سەروبەرێ مە ستەمکاری و کەڤنەشۆپی سەردەستی رەوشێ کر، تاکو ئیرۆ گەهاندیە مەترسیەکا دژوارێ خوەکوژیێ. ئەڤێ یەکێ نە بەس پرسێن ئالۆز و دودل ل هەمبەر پاشەرۆژێ، بەلکو ل بەرامبەر دیرۆکا دوهی و ناسناما ئیرۆ ژی سەردەستکرن. ل داویێ دبێژم، یان دڤێت ئەم کورد هەر ل سەر ڤێ هەڤرکیا خوەکوژیێ بەردەوام بین یان ژی دڤێت گوهداریا دەنگێ ئەقلی بکەین.تێبینی: هەر کەسێ ئاگرێ خوەکوژیێ گەرم بکەت یان رۆلێ دژمنان د رەخنا خوەیا ل سەر ئالیەکی بکەت، دێ وی/ وێ ژ هەڤالینا خوەیا فەیسبۆکێ دەرێخم.محسن ئۆسمانبەرلین، 2020.11.04
