سەرۆکێ پارتا دیموکراتا کوردستانێ ڕاگەهاند، جارەکا دی ئالیێن سیاسیێن عێراقێ ب شیعە و شونەیان ڤە د جڤاتا نوینەرێن عێراقێ دا خەنجەر ل پشتا گەلێ کوردستانێ دا و بودجە و ڕزقێ خەلکێ کوردستانێ وەک کارتەکا گڤاشتنێ لسەر هەرێما کوردستانێ بکارئینایە.
ئەڤرۆ پێنجشەمبێ، مەسعود بارزانی سەرۆکێ پارتا دیموکراتا کوردستانێ د ڕاگەهاندنەکێ ئاماژە ب وێیەکێ کر،” گەلەک جهێ داخێ یە، جارەکا دی ئالیێن سیاسیێن عێراقێ ب شیعە و شونەیان ڤە د جڤاتا نوینەرێن عێراقێ دا خەنجەر ل پشتا گەلێ کوردستانێ دا و بودجە و ڕزقێ خەلکێ کوردستانێ وەک کارتەکا گڤاشتنێ لسەر هەرێما کوردستانێ بکارئینایە”.
بەحسا وێیەکێ ژی کر، د دەمێن دەربازبووی دا د ناڤبەرا حکومەتا هەرێمێ و بەغدا لهەڤهاتن و ئیمزا هاتنەکرن، لێ لهەڤهاتن نەهاتنە جیبجیکرن.
ئەویەک ژی دایە دیارکرن،” ئەم وێ یاسایا جڤاتا وەزیرێن عێراقێ کو بێ لبەرچاڤگرتنا بنەمایێن شەراکەت و لهەڤهاتنان دەرکریە، ب بابەتەکێ سیاسی و بۆ درۆستکرنا گڤاشتنێ لسەر هەرێمێ و سزادانا خەلکێ کوردستانێ دبینین و کو بەرۆڤاژی بنەمایێن شەراکەت و تەوافوق و هەڤسەنگیا ناڤەبەرا پێکهاتەیێن عێراقێ یە و جۆرەکە ژ درۆستکرنا ئالۆزیان و شەڕ فرۆشتنێ”.
مەسعود بارزانی لسەر وێیەکێ ژی، داخوازیەک ئاراستەی سەرۆکایەتیا هەرێمێ و پەرلەمان و حومەتێ کریە و داخواز ژێکریە کو دگەل نوونەرێن کوردستانێ ل بەغدایێ و ئالیێن سیاسیێن هەرێمێ، ب هەڤڕا لسەر وی بابەتی بجڤن و بگەهنە بڕیارەکا هەڤپشک.
دبێژیت ژی،دڤێت ئالیێن هەرێمێ بڕیارەکێ بدەن کو د ئاست بەرپرسیارەتیێ دا بیت بۆ چارەسەکرنا کریزان و د هەمان دەمدا ژی، ” کەڕامەتا میلەتێ مە بهێتە پاراستن و سنورەکی بۆ وان ڕەفتاران دابنێت، کو مەرەم ژێ سزادانا گەلێ کوردستانێ یە”.
ئەڤەژی د دەمەکی دایە، سپێدەهیا ئەڤرۆ پێنجشەمبێ، پەرلەمانێ عێراقێ پرۆژەیاسایا قەران بێ ڕازیبوونا پەرلەمانتارێن کورد پەسەندکر و لگۆڕەی پرۆژەیسایێ،پێدڤیە هەرێما کوردستانێ پێگیربیت ب شاندنا ئەو بڕە نەفتا کو کۆمپانیا سۆمۆ دیاردکەت.
