نێرین

گەلێ کورد / شەپرزەیێ ژیاتیێن هه‌ڤدژ

har skickat Idag kl. 13:08

کەسێ کورد نیە، ل دەرڤەی وەلاتی، نەمازە یێن ل ئەوروپایێ دژین، نەمازە ژ ئالیێ تورکاڤە،راستی ڤان پرسیارا نەبیت: ژ کودەرێ ھاتی؟ مروڤ د ناڤبەرا راستیا سروشتی و راستیا سیاسەتێدا شەپرزەدبە، دزاني تو راستی ڕویبرویبونەکا دژواربوی، نەمازە ئەگەر سوارێ ل پێشیا تە دەرکەفت تورک. ب ھشیاریڤە بەرسڤددەی: ئەز ژکوردستانێ ھاتیمە. ئەگەر پرسیارکەر تورکەکێ فاشستبیت، ئێکسەر دبێژە: کوردستان توننەیە، کورد تەننەیە . ب راستیژی کوردستان وەک پێکھاتەکێ سیاسی نینە. ل ڤێرە مروڤ خو ل بەرامبەر ئەرکێ نەتەوەیی دبینە و دیالوگێ ب خەبات دزانە و دبێژە: تورکیا توننەیە، تورک توننەنە، کوردستان وەک دەولەت تونەیە، لێ ئەو وەلاتێ من و باب و باپیرێن منە، یێ ھاتیە دابەشکرن، ئەمێ تا داویێ پێخەمەتی دەولەتبونێ بجەنگین، ھن جارا ب لێدان و سەرشکەستن و ھاتنا پولیسی بداویدھێت . ئەگەر پرسیارکەر تورک نەبیت، یان تورکەکێ نەرمبیت، دێ پرسیارا دویێ کەت: کیژان کوردستان؟ تورکیا، عراق، ایران، سوریا؟ ئەز ژ باشورێ کوردستانێمە، دابەشکرنا وەلاتێ خو ناسناکەم. ھاااا، یانی عیراق؟ پێخەمەتی ژ بابەتی برەڤیت دێ بێژیت: ئەم ھەمو برایێن ھەڤین ، مسلمانین. پڕانیا ڤان پرسیارکەرا ب توڕەبونڤە سەرێ خوە دھژینن و بێدەنگ دمینن. ئەم ل ئەورپا راستێ ڤان پرسیارا دبین، لێ ب راستی تەڤایا کوردستانیا، ل تەڤ دەرا، و ھەرتم، راستی ڤان پرسیارا دبن، ئەو بخو ڤێ مونولوگێ ژخوەرە پێکدئینن. لێ ب راستی ئەڤ ئاوایێ بەرگریکرنێ پێخەمەتی ناسنامەکێیە د پێشەروژێدا، وەک دورھێل ئەم کەتینە دگێژەلوکا تێگەھێن: گەل، نەتەوە، وەلات، ھەڤوەلاتی، ھەڤوەلاتیبون،. ئەمێ ل سەر باشور بئاخڤین، لێ باوەرم بو ھەرسێ پارچێن دن ژی راستە. دیارە (ھەرچەندە ل تورکیا ب ئاستەک دنە)ل جەم دوژمنی زەلالە ئەم کوردین، لێ کوردێن عیراقینە، ئەم نە کوردستانینە،. ھەرچەندە ئەو دزانە ل جەم مە حەزا ژێیاتیا نەتەوەییە و ئەنجامدانا وێ حەزێ پڕ ئالوز و دوورە، لێ دیسا ژێیاتیا مە بو وەلاتەکی ب ناڤێ ،،کوردستان،، پەسەندناکە و تورەدبە: چ وەلات نینن ناڤێ وی کوردستان، ھەرێمەک ھەیە ل باکورێ عراقێ دبێژنێ کوردستان. تو ھەڤوەلاتیێ باشورێ کوردستانێژی نینی، بەلکو تەنێ عراقیی، چونکو وەلاتەک د کارتا سیاسەتا جیھانیدا نینە ناڤێ وی کوردستان. ب راستیژی ھەڤوەلاتی، (ب تێگەھێ یاسایی)وەک ئەرک و ماف و رەگەزنامە توننەیە . د رەوشەکێدا ئاسو یێ جودابونێ پێشچاڤژی نەبویە، نەچاری د ھوندرێ عراقێدا بژی، تو و کەسەکێ عەرەبێ ئاکنجیێ ،،بصرة،، ھەلگرێن ھەمان رەگەزنامێنە. ل ڤێرە پرسگرێکا ژێیاتی و تێگەھان دھێتە پێش و ھەڤدژیەک دژوار دناڤبەرا خەبات پێخەمەتی ھەڤوەلاتیبونێ و عراقەک سڤیل و دیموکراتیک و دناڤبەرا خەبات پێخەمەتی نەتەوەبون و سەرخوبونێ پێکدھێت . ھەر کەسەک دخازە تەڤ کوردژی،وەک عەرەبان، بێ جوداھی بژین، تەڤ عراقی بەرامبەر یاسایێ وەکھەڤبن، یاسا ھەرکەسی بپارێزە، لێ ئەڤ ژیانا شاد پێکناھێت ھەکە ژێیاتی بو دەولەتا عراقێ ، ل جەم کورد و عەرەبا،ب سەر تەڤ ژێیاتیێن دن نە کەڤیت. واتە ژیانەک شاد، مروڤەک خودان سەروەری د عیراقەکا دیموکراتیک و خورتدا پێکدھێت. چاوا ئەمێ ئەرکێن پێشدابرنا پروسێسا ھەڤوەلاتیبون و دیموکراتیزەکرنا عیراقێ و ئەنجامدانا ئەرکێ پێشدابرنا پروسێسا نەتەوەبونێ ب ھەڤرا گرێدەین ؟ ھن دبێژن دیموکراتیزەکرنا ڤان چوار وەلاتا وێ مە بگەھینە چارەسەریا نەتەوەیی، لێ ب راستی ، د سەردەمێ گلوبالیزمێدا، دیموکراتیزەکرن و ناسیونالیزەکرن دو ئەرکێن ھەڤدژن، دێ چاوا عراقییێن ئاڤاکەر و کوردستانیێن ناسیونالیستبین ؟دەبێ، یان خەباتێ بو عراقەک دیموکراتیک بکەی، یانژی درێژیێ ب خەباتا نەتەوەیی بدەی، خەباتا نەتە ی ناھێتە دابەشکرن، بەلو بو گشت نەتەوەی و گشت جوگرافیا نەتەوەیی بھێتە ئاراستەکرن. وی دەمی ئەگەرا ژدەستدانا رێڤەبرنا ھەرێمێ یا خورتە و دێ جاردن دەست ب شەرێ پارتیزانی کەین و ڤەگەرین بو چارگویشەیێ یەکێ. ئەڤ ستداتیجیکا سیاسەتا نەتەوەیی ل ھەرێمێ برێڤەدچیت چ خاندن و بەگرەوەنێن سیاسی و فەلسەفی نینن، لەوما تەکتیکێن شاش و پڕ ژتەم و مژ و نە زەلالدا شەپلیە. سەربورێن جیھانێژی پشتراستدکەن، کو ژیانا د وەلەتەک دیموکراتیکدە ھزر و ھشێن ناسیونالستی لاوازدکەن. ئەگەر نەتەوەبونێ و دەولەتا نەتەوەیی بخازین، دەبێ دەرفەتێ بکاربینین،د عیراقەکا نەدیموکرات و پاشکەفتیدا، رێچکەیێن ئاینی و پاشکەفتیدا، ئەم ب شەڤ و بروژ کار ل سەر وێ نەتەوەبونێ و دەولەتا نەتەوەیی بکەین. دەبێ ژێیاتیا نەتەوەیی بسەر ژێیاتیا ھوز و مالبات و حزب و ئاین و سەندیکا و کومەلەیاندابیت، دەبێ ھێز بھێتە سیستەماتیککرن و بتنێ د دەستێن حکومەتەکا یەکگرتیدابیت، دەبێ ھەڤوەلاتی بھێتە ئاڤاکرن، یاسا سەردەستبیت و ھەمویان ب یەک چاڤ ببینیت. ئەنجامدانا ڤان ئەرکان، پێش ھەمو ئالیەک دن، یا دستویێ ھەردو حزبێن دەستھەلاتداردا، ئەگەر ب راستی نەتەوەبون و سەرخوبونێ بخازن دەبێ ھەرێمەک دیموکراتیک پێکبینن، ھزرا نەتەوەیی، تاکێ نەتەویی ئاڤابکەن، بەری عراق بەرەڤ پروسێسا دیموکراتی بچیت، چونکو وی دەمی، بخازی و نەخازی، دێ کەڤی دناڤدا، دێ بیتە خازتەکاجەماوەری. لێ ب راستی، سەرکردێن مە نە عیراقەک دیموکرات دخازن، و نە پێنگاڤنان بەرەڤ سەرخوبونێ دخازن . ل بەغدا ئارێشەیا پێکدئینن و فاکتەرەکێ پارازتنا تەڤلھەڤیێنە، ل کوردستانێژی گەل پەرت و بەلاڤکریە، ژێیاتیا ئێکێ بو مالباتێیە، پاشی بو ھوزێ، پاشی بو حزبێ، پاشی بو زونێ، پاشی بو ( کوردستانا مە !!!!) ژ ئالیەکیڤە ئالایێ خو ب ئالایێ کوردستانا مەزن دزانن و دخازن ھەمو ئالی بپارێزن، ((لێڤەگەڕ)) ێن ھەمو کوردستانێنە، ژ ئالیەک دنڤە لەشکەرێن دوژمنا دئینن ژوور و پارتێن پارچێن دن ب مێھڤانێن نەخوازیار دزانن. سیاسەتا نە دیالوگ نە شەڕ و چاڤەرێکرنا بڕیارێن بەختی، دێ گەلێ مە راستی کارەساتێن نە خوازتی کەت. یان عراقیبن و ئارێشا پێکنەئینن، ب زەلالی کار بو ئەنجامدانا دستوری و عیراقەکا دیموکراتیک بکەن، یانژی کوردستانی بن، بەرەیێن کوردستانی و کونگرا نەتەوەی دامەزرینن. داھاتێ وەلاتێ وە یێ ددەستێن وەدا، وەلاتێ خو ژ ئالییێ ئابوری و سیاسیڤە ئاڤابکەن و پشتا خو بدەن بەغدا . خەباتا نەتەوەیی، دەولەتا نەتەوەیی بو ھەمو نەتەوەی نەبیت نەتەوەیی نینن، بەلکو د ناڤچەگەری و بێ پاشەڕوژن. ابراھیم سپینداری ١٩-١١-٢٠٢٠ بەرلین

پتر به‌رچاڤ بكه‌
ڤێژی ب بینه‌
Close
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close