باوەرناکەم کەسەکێ خودان ژیر هەبیت لدونایێ وحەز ل بەرەلایێ هەبیت،ژیان بێ یاسا ورێسا بشێوەکێ گونجای دێ بیتە دارستان ویێ بهێز وشیان دێ لدویڤ حەز وبەرژەوەندیا خوە سەرەدەریێ کەت،هەر ژبەر ڤێ چەندێ دڤێت بو هەمی کەسان یاسا سەروەر وبلند بیت،کەسێن سەرپێچیا یاسایی دکەن وئازادیا خەلکی تێک ددەن دڤێت سنورەک بو بهێت دانان،زیندانکرن راستە یا نە خوش وتەحلە بەلێ دبیت چارەسەری بو کەسێن دەست درێژ وسەرپێچکار دناڤ چڤاکی دا،بەلێ دڤێت باش بزانین نە هەر کەسێ هاتە زیندانکرن ئەو تاوانبار ودەستدرێژە چونکە مە زور نموونە دناڤ لاپەرێن دیرووکێ دا هاتینە تومارکرن مینا یوسف پێغەمبەر سلاڤ لێ بن وئیمامێ شافعی وئیمام ئەحمەد ووو،کەتینە ناڤ گرتیخانان وهیچ تاوانەک ئەنجام نە دابوو،بەلێ چونکە دەستهەلات یا ستەمکار وزالم بوو،ئەگەر لێرینەکێ بکەین وتەماشە بکەین گیانەوەر ژدایک دبیت وهەر دمینت گیانەوەر،بەلێ ئادەمیزاد ژدایک دبن ودڤێت بهێنە پەروەردەکرن تا بمینن مروڤ،پاسەوانێ گرتیخانێ دبیت کورێ باژێرێ تە بیت یان نێزیکی تە بیت یان دراوسێ تە بیت،بەلێ یێ ئامادە تە ئەشکەنجە بدەت بشێوەکێ درندانە وهوڤانە چونکە ئارمانج ژ گرتنا تە دبیت رەنگەکێ تولڤەکرنێ بیت نەک چاکرنێ، لسالا 2014 حکومەتا بەرازیل بەرنامەک راگەهاند بناڤێ رزگارکرن ب خاندنێ وهەر زیندانیەک 12 پەرتووکا بخوینت دبیاڤێ تورەی وزانستێن مروڤایەتی وفەلسەفێ وبابەتێن کلاسیکی دێ (48) روژ ژ هەر سالەکێ هێن برین وب هەمان شێوە وەلاتێن ئیتالیا وبریتانیا هەمان پروژە هەیە دگەل زیندانیان،ونوکە ژی ل وەلاتێ سوید ماموستا ئەحمەد موفتی دچت گرتیخانا لدویڤ داخازا پولیسان بمەرەما گێرانا سمینار وئاموژگاریان بو زیندانیان،ل وەلاتێن پێشکەفتی یێن خودان یاسا ورێسا هیچ زیندانەک بێ پەرتووکخانە نینە وگرتی دشێن پەرتووکان ببن وبخوینن،وگەلەک ژ زیندانیان فێری سەربورێن باش وپری مفا دبن برێکا خاندنا پەرتووکان دناڤ هەر جار دیوارێن گرتیخانێ دا،باش بیرا من دهێت هەتا من زانکو خلاس کری چەند جاران هاتم زیندانیکرن ژبەر هەلویستێ سیاسی،وگەلەک جاران من دگوت پاسەوانی بو من پەرتووکەکێ یان روژنامەکێ بینە دگوت قەدەغە ؟! ئەوان دڤیا شەرەکێ دەرونی بکەن لگەل من نەک مەرەم ژ گرتنا من چاکرن ولخوە زفرین بیت،کورت وکرمانج دڤێت گرتیخانە ببیت جهێ چاکرنێ وفێربوونێ نەک تولڤەکرنێ وشەرێ دەرونی… ردوان گولی/سوید
