د. شەعبان مزوری
ئەڤە پتر ژ ٤٠ سال دەرباس بون ژ دەما ئەوا لدەف مە دبێژنێ ( سیاسەت، وەلاتپەروەری، مروڤدوستی، جاشاتی، وەلاتفروشی، هوڤاتی ) کو منژی وەکی زۆر کەسێن دی بو خوە کریە خەم و ژ وێرانیێ دەرکەڤیت من تشتەک نە دیتیە جهێ شانازیێ بیت، ژڤێ هەمیێ کومباختر نڤشێ من بو دیدەڤانێ زۆر گوهارینێن لسەر ئاستێ هەرێمی و جیهانێ. بدوماهیک هاتنا جەنگێ سار لناڤبەرا هەڤپەیمانیا وراشو و ناتۆ، کو ئەنجاما وێ نەمانا بلۆکێ وەلاتێن دهاتن ناسکرن بسوسیالیزمێ نەخشا بەشەک مەزن ژ هەرێمێن جیهانێ هاتن گوهارتن، ژمارەک زۆر ژ وەلاتێن تازە دوروست بون لسەر بنەمایێن جوراوجور ( ئولی، مەزهەبی، نەتەوی )، دەما سوڤیەتا بەرێ لسەر تەختێ مرنێ، پێشیا ڤان هەمی خوەدان کێشا بو مە کوردێن باشور دەلیڤەک زێرین هاتە پێش بپالپشتیا وەلاتێن خوەدان هێزەک ئابوری و لەشکەری هەری مەزن. هەرچەندە بەشەک بچویک ژ باشور بو لێ دیسان دەرفەتەک زێرین بو کو ئەم کورد بسەلمینین بو نەیارێن خوە بەری دوستێن گەلەک سەرکەفتینە د رێڤەبرنا خوەدا و هەژینە ببین خوەدان وەلاتەک سەر بخوە.
ئەڤە ئەم نە زۆر دویرن ژ ٣٠ سالیا رێڤەبەریا خوەمالی لێ تا ئەڤروژی ژبەر مەژیێ مە ڤێ دەستهەلاتداریا تالانکەر و قومارچی برەنگەکی ژ کارخستیە کو ئەم نکارین راستی و درەوێ ژ هەڤ جوداکین، دەما تەماشەی نوینەرێن هەمی پارت و رێکخستنا، وەزیر و پەرلەمانتەرا، سەروک و بنوکا، ماقویل و دیندارا دکەی، گەر مروڤ راسگو بیت ژخوە پێڤەتر کەسەک درەوین، خشیم و ساویلک نابینیت.
ئەڤە بسالانە ئەم دبینی و بهیسین کو خەلکانەکی بملیارا دولار تالانکرینە، زەڤی و ئاڤاهیێن خەلکی و میری داگیرکرینە، قاچاخچینە، بوینە رێبەرێن لەشکەرێن داگیرکەرێن وەلاتێ مە، بسەدان کومپانیێن شەلاندنێ لژێر ناڤێن جودا هەنە. لێ بەریا چەند سالا و ئەڤ سالە جوداهیەک هەیە، ئەوژی بمن سالێن دەرباس بوی کەس نە دهات بناڤکر وەک دز، تالانچی، قەچاخچی، تەنها دگوتن هەیە، لێ ئەڤ سالە هەما بێژە هەفتیەک دەرباس نابیت کو یەک ژ ئەڤێت ژێرا دبێژن سیاسەتمەدارێن دلسوز ناڤێ چەند کومپانی و کەسێن تێکەل لگەل ڤێ شەلاندنێ ببیر نەخیت. هەر بو نمونە عەلی هەمە سالح دبێژیت لیستا ناڤ و نیشانێن وان کەسا هەیە و دایە حوک مەتێ، پەرلەمانی، داواکارێ گشتی لێ کەسەک لسەر بدەنگ نە هاتیە، ژ لایەک دنڤە کەسێن تێنە تاوانبارکرن بڤێ شەلاندنە و لایەنگڕەن وان دبێژن شەلاندن هەیە لێ نە ئەمین. لڤێرە بمن هەر دو لایەن دخوازن مەژیێ خەلکێ مە تێکدەن و وەسا پێ بدەن زانین کو هەر دو لایەن راست دبێژن و لەوماژی لسەر پاوانێ مە بهەڤرا دچەرن.
زۆر ئاسانە بو دەستهەلاتێ، دادگای، دادوەرێ گشتی، بەرپرسەکی ژبو گوتنەکێ کەسەکی گەفا لێ بکەن، ژ کار دەرکەن، نانبرکەن، کرێتیا پێ بکەن، ترور کەن، ئەشکەنجە دەن، زیندانکەن … هتد ژ بێ رەوشتیا، لێ ئەڤ هەمی دامودەزگا هیچ پویتە ببابەتێ شەلاندنا وەلاتی و خەلکی ناکەن. باشە ئەگەر عەلی هەمە سالح و کەسانێن وەک وی درەوین بن دڤێت بێنە زیندان کرن و ئەگەر پێچەوانە راستگو بن دڤێت ئەڤ دەستهەلاتداریە بهەمی دەزگەهێن پەیوەندایار و بەرپرس ژڤێ شەلاندنێ بێنە زیندانی کرن، بەشەک ژوان وەک تاوانبارێن راستەو خوە و بەشێ دن وەک پارێزەرێن تالانکەرا.
