د. شەعبان مزوری
بباوەریا من پرانیا نفشێ من و کێماسی نفشەک بەری من و نفشەک پشت من لبیرا مەیە شانویا ( پێکێ تە وەلات ) کو ئەکتەرێ سەرەکی غەوار توشی بو. ئەڤ شانویە ژ نڤیسینا موهەممەد ماغوتە، کو نڤیسەرێ هەمی بەرهەمێن هەرێن دەنگ داین یێن غەوار توشیە. موهەممەد ماغوت ببوچونا من باشترین نڤیسەر بویە ب شێوەک کومیدی د چەند بەرهەمەدا هەمی شکەستن و خوێریاتیا شێوێ دەستهەلاتداریا روژهەلاتا ناڤین دایە ناسکرن، لێ دوشاڤا ڤان بەرهەما بدیتنا من دێ مینیت شانویا پێکێ تە وەلات.
بەرهەمێن نە مرن و هەردەم روژەڤ بمینن بمن سەرئەنجاما بەردەوام بونا هەمان جورێ بیکرن و سەردەریێ یە. لەوما ژی ئەگەر نفشێن لدویف مەژی هاتین ئەگەر ئەڤرو تەماشە بکەن بمن قەت باوەر ناکەن کو ئەڤە بەریا پتر ژ چل سالا هاتیە نڤیسین، ئەگەر نڤیسەری سەردەما خوە ئەڤ بەرهەمە لسەر رەوشا سوریێ و ئەوا ژێرا دبێژن جیهانا عەرەبی بو، لێ بمن ئەڤە ١٠٠% پێشبینیەک بو ئەگەر روژەکێ کورد ببنە دەستهەلاتدار.
ئەگەر ئەم چەند دیمەنەکا بینین پێش چاڤێن خوە، ئەم بێ دو دلی دێ دەستهەلاتداریا باشور بینین. ئەز دێ هەولدەم چەند پارچەکا لسەر راوەستم و دێ دلوپا بو خوەندەڤانی هێلم بلا بخوە بەراوردیەکێ بکەت.
لپێش چاڤێن مەیە دەما دخوازیت ژنا ویا ئاڤس زاروکێ خوە لنەخوشخانێ ببیت تا دگەهیتە دەما زاروکا وی دمریت و دبێژیت کچا من نەمر، کچا من هات کوشتن، یانژی دەما دبێژیت ئەڤە چ شیرە شیر تێدا نە، باسا ئەمبولانسێ دکەت ئەڤە هەمی ژ لایەکی، ژ لایەکێ دن دەما خوێری نوینەرێ دەستهەلاتێ تێت و دبێژتە دوکتوری لڤێ گەرا خوەیا دوماهیێ بو دەرڤەی وەلات نەی سەرکەفتی بو د نوینەریا خوەدا لسەر تەختێ قەحپا. گەلو ئەم ڤێ روژانە نابینین.
دەما دبەن ئەشکەنجە ددەن و دبێژیت مروڤ یێ بوی سەرێ خوە بلند کەت، هوین دبێژن پێت خوە بلندکە، بێژە تو سیخوریێ بو کێ دکەی، ئەوژی دبێژیت موخابەراتێن زیمبابوی ژی مە نادەنە شولی، لڤێرە پرسەک بو وان کەسێن بەرپرس ژ گرتنا هەمی کەسەکی لسەر پرسا ژێرا دبێژن ئاسایشا نەتەوی و تایبەتی ئەو کەسێن ڤان چەند هەیڤا هاتین گرتن، گەلو ژ وان کارێن ستاندەرتێن سیخوریا جیهانی یێن کو ئەز دوزانم و دبیت پتر هەبن، لێ بمن ئەڤە سەرەکینە:
- ئەڤ مروڤە نەشێن سیخوریا وەلاتێن جیران بکەن، چونکە هەبونا لەشکەر و دەسگەهێن سیخوریا وان بهەڤکاری لگەل دەستهەلاتێ هەیە.
- نکارن ببن سیخورێن زلهێزا، چونکە هوین دەستێ هەمی زلهێزا ماچدکەن و بەرکا سور بو ددانن.
- ئەگەر تاوان هەڤکاری یانژی ئەندام بونا پەکەکێ بیت، ژخوە رۆژانە هوین پەکەکێ دبینن و لگەل دروینن، هندەک کەس دبێژن ١٠% ژ ئەو خاکا لژێر دەستهەلاتداریا هوکمەتا باشور ددەستێ پەکەکێ دایە. ئانکو ئەوژی ئاشکرانە هوین دکارن پرسێن خوە لگەل وان یەکلا بکەن بێی تێکەل کرنا خەلکەکێ دن.
- یا ئەز ئاگاهدارم مە هیچ زانستەک و پیشەسازی نینە کو هەژی وێ یەکێ بیت، وەلاتەک یان کومپانیەک بو خوە سیخورا لباشور دانیت.
رەوشا کارەبێ ژی هەمان رەوشە لزیندانان دگەهیتە ق… خەلکی بەری بگەهیتە مالا خەلکی.
هەلبەت لشانویێ غەوار زاروکێن خوە دفروتن، نوکە خەلکێ مە دەست کریە بفروتنا ئورگانێن خوە.
هەلبەت پەیوەندیا تەلەفۆنی ناڤبەرا غەوار و بابێ وی یێ شەهید، رەوشا وەلات، بەرهەمێ خوین و رەنجا وان، رەوشا دایکا، خویشک و برایێن وی، هەمان دیمەنە ئەڤرو دبینین و بهیسین روژانە چەندا جارا. دگوتن ئەم خودان هەزارا قارەمانی، بەرخوەدان، سەرهەلدان، شەهید…… هتد، مە گوندێ ئەلمانی، ئنگلیزی، ئیتالی…….هتد ئاڤاکرن، دێ بێژی نەتەوێن یەکگرتی نە ل ئەمریکا و سویسرانە نە بەلکو یێ لباشورێ کوردستانێ، مە چەند سیتی ئاڤاکرن، لێ ناڤێ ستیخانێ لسەر نینە. بەرهەمێ خوینا شەهیدا کوچک و تەلارێن تالانکەرانە، دۆلارێن خستینە د بانکێن سویسرا دانە.
بکورتی و بکوردی دێ هەربێژم نوش وەلات، تا ئەو دەم بێت ببینین روژ لتە هەلات.
